تربیت اولاد – گل عدن چترال

اس میں شک نہیں کہ تربیت اولاد ہر وقت کی اہم ضروت ہے ۔میں اس پر تو بات نہیں کر سکتی کہ اولاد کی تربیت کس طرح کی جائے۔کہ یہ چھوٹی منہ بڑی بات ہوگی۔مگر میں اتنا ضرور کہنا چاہتی ہوں کہ تربیت ہی ہر ایک اولاد کی بنیادی حق ہے ۔اور دینی تعلیم اولاد کی اولین ضرورت بھی ہے اور حق بھی ۔جو والدین اپنی نادانی کے سبب اپنی اولین ذمہ داری یعنی اولاد کی تربیت کو چھوڑ کر اولاد کو آسائشات دینے کو اہمیت دیتے ہیں ۔وقت ثابت کرتا ہے کہ ایسے والدین نے نہ صرف اپنی جانوں پر ظلم کیا بلکہ اپنے اولاد پر بھی ظلم کیا ۔کیونکہ یہ وہ عظیم نقصان ہے (اولاد اور والدین دونوں کا مشترکہ نقصان ) کہ جسکا ازالہ پھر وقت گزرنے کے بعد نہیں کیا جاسکتا۔

اولاد جو اللہ رب العزت کی طرف سے انسان کے لئے تحفہ اور نعمت ہے وہیں اولاد کو اللہ نے آزمائش بھی قرار دیا ہے ۔ کہا گیا ہے کے تین چیزیں انسان کے لئے دنیا اور آخرت میں عذاب کا سبب بنتی ہیں ۔وہ زمین جس پر کوئی شخص نا حق قابض ہو جائے۔ ایسا مال جسے اللہ کہ راہ میں خرچ نہ کیا جائے۔اور ایسی اولاد جسے دین نہ سکھایا گیا ہو ۔اور یہی حقیقت ہے کہ جب اولاد کی تربیت نیہں کی جاتی تو ایسی اولاد آنکھوں کی ٹھنڈک نہیں بلکہ دل کا بوجھ بن جاتی ہے ۔تربیت کے سلسلے میں جو دو بڑی غلطیاں والدین سے سرزد ہوتی ہیں وہ ایک تو اولاد میں تفریق کرنا ہے ۔

دوسرا دینی تعلیم کو معمولی سمجھنا ہے ۔جب بات تفریق کی ہو تو زمانہ شاہد ہے کے جب معاشرے سے انصاف ختم ہوجا تا ہے تو بگاڑ شروع ہوجاتا ہے ۔نا انصافی کی وجہ سے معاشرہ ظلم و زیادتی کا گہوارہ بنتا ہے اور ایسا معاشرہ امن اور سکون کو ترستا ہے ۔یہی حال گھر کا ہے ۔والدین کو اتنا سمجھنے کی ضرورت ہے کہ جسطرح باپ کی موت کہ بعد جب میراث کی تقسیم ہوتی ہے تو جائیداد میں اس اولاد کو بھی حصہ ملتا ہے جسے والدین نے اپنی زندگی میں (بےشک) عاق کیا ہو۔

یہ اللہ کا انصاف ہے جسکا صاف اور واضح مقصد یہ ہے کہ اولاد چاہے جیسی بھی ہو ماں باپ کی ذمہ داری ہے کہ وہ اولاد میں تفریق سے گریز کریں ان کے درمیان مساوات عدل اور انصاف قائم رکھیں ۔اولاد میں اپنی محبت ‘توجہ ‘ شفقت برابر تقسیم کریں بلکل ایسے جیسے ایک دن عدالت نے میراث تقسیم کرنی ہے ۔ورنہ جو بچہ ماں باپ کی بے توجہی اور نا انصافی کا شکار ہو۔پھر میراث میں ملنے والی زمین اس بچہ کی نقصان کا مداوا نہیں کرسکتی۔کیونکہ جن بچوں کی تربیت نیہں ہوتی ان بے چاروں کو زندگی برتنے کا سلیقہ نیہں ہوتا۔انکی زندگی جنگلی پودوں کی مانند ہوتی ہے الجھتی بگڑتی ٹوٹ پھوٹ کا شکار ۔ جسے سلجھانے والا کوئی نہیں ہوتا۔

دوسری غلطی جو والدین سے سرزد ہوتی ہے وہ دینی تعلیم میں لاپرواہی ہے۔جتنا نقصان کسی بھی فرد کا (کسی بھی مذہب کا) دین سے دوری پر ہوتا ہے اتنا نقصان دوسری کسی چیز نے انسان کو نہیں پہنچایا۔اپنی اور اپنی اولاد کی کامیابی کے لئے اسلامی ماحول ہر گھر کی اولین ضرورت ہے ۔اسلامی لباس اور اسلامی زبان گھر کے تہذیب کی بنیاد ہے ۔جس گھر کے مرد گالم گلوچ کرتے ہوں اس گھر کی بیٹیوں کو حیا ء اور عزت داری کے سبق نہیں پڑھائے جاسکتے۔مجھے حیرت ہوتی ہے کہ جب کوئی تربیت کی بات کرتا ہے تو ہم میں اکثر لوگ تربیت کے معنی صرف بیٹی کی تربیت سمجھتا ہے کیونکہ اسے دوسرے گھر جانا ہوتا ہے ۔

اس خیال کے تحت لوگ بیٹیوں کی تربیت پر زور دیتے ہیں ۔ہم بیٹی کی لباس پر کڑی تنقید سے باز نیہں آتے۔لیکن کیا آپکا بیٹا اسلامی لباس پہنتاہے؟ ۔بیٹیوں کو کہتے ہیں ہماری عزت خراب مت کرنا مگر اپنے بیٹوں کو کالج بیجھتے وقت ہاسٹل میں ڈالتے وقت گھر سے نکلتے وقت کھبی نہیں کہتے کہ ہماری عزت خراب مت کرنا۔کسی کی بیٹی پر گندی نگاہ مت ڈالنا۔کسی کی بیٹی کے دل سے اسکے جذبات سے محبت کے نام پر مت کھیلنا ۔شادی کا جھانسا دے کر کسی بیٹی کے مجبور بے بس ماں باپ کی آہیں مت لینا۔کسی کی گمراہی کا زریعہ مت بننا۔کسی ماں کی بد دعائیں نہ لینا ۔کسی باپ کا سر مت جھکانا ۔کھبی آپ میں سے کسی نے اپنے بیٹے کو یہ نصیحت کی ہیں؟؟۔

مختصرا یہ کے تربیت پر بیٹی ہو بیٹا دونوں کا یکساں حق ہے ۔دنیاوی تعلیم تو ہماری ضرورت ہے سو ہے لیکن ضروت اس بات کی ہے کہ جو سختی سکول بیجھنے کے لئے آپ بچوں پر کرتے ہیں وہی سخت رویہ نماز اور قرآن پاک پڑھنے کے لئے بھی رکھی جائے۔سکول سے اچھی پوزیشن نہ لانے پر جو سزا آپ اپنے بچے کے لئے مقرر کرتے ہیں نماز قضاء کرنے پر بھی بچے کو سزا دی جائے۔دینی اور دنیاوی تعلیم ملکر ہی انسان کو زندگی کا سلیقہ سکھا سکتے ہیں۔ ورنہ بے تعلیم اولاد عمر کے آخری حصے میں بھی اپنی مصیبتوں کا ذمہ دار اپنے ان والدین کو ٹھراتی جاتی ہے جن کے قبروں کے نشان تک دنیا سے مٹ چکے ہوں۔آپکو شاید حیرت ہو مگر دنیا میں ایسے لوگ بھی موجود ہیں جو عمر کے چالیس پچاس بہاریں دیکھ چکیں ہیں لیکن جب بھی کوئی غلطی کرتے ہیں تو اسکا ذمہ دار اپنی بوڑھی والدین کو ٹھرا کر خود بری الذمہ ہو جاتے ہیں۔

یہ تحریر ان لوگوں کو تقویت دینے کے لئے بلکل نہیں لکھی گئی ۔اس تحریر کا مقصد صرف اتنا ہے۔کہ جن لوگوں کو اولاد کی نعمت حاصل ہے اور وہ تربیت کے قابل ہیں کمسن ہیں تو ابھی بھی وقت ہے کہ اپنی تمام تر توجہ انکی تربیت پر لگادیں۔اور انہیں اپنی دنیا میں راحت اور آخرت میں نجات کا زریعہ بنادیں۔باقی پچاس سالہ جاہل بچوں کو میں اتنا کہوںگی کہ حقوق کی جنگ کا اتنا فائدہ نہ اٹھائیں کہ بوڑھے والدین کو تمام عمر کٹہرے پر ہی کھڑا کردیں۔اللہ نے اولاد کو اتنے حقوق نہیں دئیے جتنا حق والدین کو دیا ہے ۔ اگر آپکے والدین آپکا حق ادا نہیں کرسکے تو اللہ نے آپکو علم عقل اور دماغ سے محروم تو نہیں رکھا ؟اللہ تمام والدین کے لئے دنیا اور آخرت میں آسانیاں پیدا فرمائے۔آمین

خوش قسمتی اور بد قسمتی کا فیصلہ

  بعض اوقات سالوں سے سمجھ نہ آنیوالے سوالوں کے جواب اچانک کسی ایک لمحے میں آپکو سمجھ آجاتے ہیں ۔میرے ساتھ بھی کچھ ایسا ہی ہوا ۔دراصل بچپن  سے میں ہمیشہ سے سوچتی آئی ہوں کہ آخر یہ خوشقسمت یا بد قسمت لوگ کون ہیں ۔ کھبی کوئی کہتا ہے دولت کا ہونا خوش قسمتی ہے تو کوئی غربت کو بد قسمتی قرار دیتا ہے مگر میں کھبی کسی حتمی نتیجے پر نہیں پہنچ سکی۔جتنا سوچتی اتنا الجھتی۔مجھے قسمت کو ماپنے کے لئے دولت حسن نام پیسہ جیسے معیار بہت سطحی لگتے رہے ۔

آخر ان میں کونسی ایسی چیز ہے جو ہمیشہ کے لئے آپکے پاس رہ جاتی ہے۔صحت دولت حسن اور حتی کہ غربت بھی کوئی بھی شے ہمیشہ رہ جانے والی نہیں ہے ۔وقت کسی کے لئے بھی ہمیشہ ایک جیسا نہیں رہتاپھر آپ کیسے کسی کو خوش قسمت اور بد قسمت کا خطاب دے سکتے۔؟شاید معاشرے میں پھیلی بے ہنگم انتشار کو دیکھتے ہوئے میں اس نتیجے پر پہنچی ہوں کہ دنیا کے خوش قسمت ترین لوگ وہ ہیں جنہیں “قناعت” کی “دولت ” حاصل ہے ۔ جی ہاں قناعت ہی وہ دولت ہے جو انسان کی ذہنی سکون کا باعث بنتا ہے ۔اور ذہنی سکون سے بڑھ کر انسان کو اور کیا چاہئے ؟۔

یہ قناعت ہی ہے جو آپکی نظر کو آپکے اپنے ہی نوالے پر رکھتا ہے ۔آپکی نظر کی حفاظت کرتا ہے ۔  تبھی آپکو اللہ کی عطا کی ہوئی نعمتوں کی قدر ہوتی ہے ۔اور آپ شکر گزار بندوں کے لسٹ میں شامل ہوجاتے ہیں۔ دوسری طرف قناعت سے محروم وہ بدبخت لوگ ہیں جنکی نظر ہمیشہ دوسروں کے نوالے پر رہتی ہے ۔جسکی وجہ سے اسکا اپنا نوالہ کھبی اسے مزہ نہیں دیتا بلکہ اسکے گلے کا پھانس بن جاتا ہے ۔ایسے شخص کا سکون برباد ہوجاتا ہے ۔جلنا کڑھنا اسکا مقدر بن جاتا ھے۔نہ کسی کی خوشی اس سے برداشت ہوتی ہے نہ کسی کا سکون۔ہم میں ایسے بہت لوگ ہیں جو خاندان یا پڑوس میں کسی کی سفید پوشی کو خوب جانتے ہیں ۔انکی مصائب اور ضرورتوں سے باخبر ہوتے ہوئے بھی نظریں چرائے انجان بنے رہتے ہیں مگر جونہی انکے گھر تھوڑی خوشحالی آنے لگتی ہے ہماری توجہ فورا انکے جانب ہوجاتی ہیں پھر وہ ہر وقت ہماری حریص نظروں کے حصار میں رہتی ہیں کہ جب تک ہم انہیں اپنی بد نظری کا شکار نہ کرلیں۔نجانے کیوں ہمیں دوسروں کی سالوں کی محتاجی مشقت تنگدستی نظر نہیں آتی اور آسائشیں چار دن میں نظر آجاتی ہیں۔

ہم دراصل بڑے حریص لوگ ہیں ہم چاہتے ہیں کہ ہمارا ہاتھ ہمیشہ دینے والا ہو اور دوسروں کا ہمیشہ بس لینے والا ہاتھ رہے۔ہم اتنے تنگ دل کیوں ہیں کہ کسی کہ چار پیسے کسی کا بڑانڈد سوٹ کسی کا آرام و آسأش ہمیں بے چین کردیتا ہے ؟ہم اتنے گرے ہوئے اتنے کم ظرف کیوں ہوگئے ہیں ؟ کیا وجہ ہے کہ ہم کسی کو خود سے ایک قدم آگے کھبی برداشت نیہں کرسکتے؟۔ شاید اسی لئے کہتے ہیں کہ قناعت امیر کے لئے بھی اور غریب کے لئے بھی دو جہاں میں عزت کا باعث بنتا ہے ۔جتنی جلدی ہوسکے اس حقیقت کو سمجھ لیں کہ  ہر انسان اس دنیا میں اپنا رزق لیکر آتا ہے ۔

اپنے حصہ کی خوشیاں سمیٹتا ہے  اور اپنے حصہ کے غم اٹھاتا ہے اور چلا جاتا ہے ۔کوئی بھی ہم سے ہمارے حصہ کی خوشیاں نہیں چھین سکتا۔نہ ہم چاہ کر بھی کسی سے اسکا نصیب چھین سکتے ہیں۔اگر آپکو لگتا ہے کوئی مفت میں بیٹھ کر کھا رہا ہے تو اگر وہ مفت میں بھی کھا رہا ہے تو یقین کرے وہ اپنا ہی رزق کھا رہا ہے اسے اللہ تعالی کھلا رہا ہے آپ اللہ کے انتظام پر کس جرأت سے انگلی اٹھا رہے ہیں؟؟۔ ۔اسلئے ضرورت اس بات کی ہے کہ آپ اور ہم سب اللہ کی تقسیم کو تسلیم کرلیں۔اسکی رضا میں راضی ہوجائیں۔ جتنا آپکو ملا ہے اس پر صبر اور شکر کرلیں۔

ممکن ہے کہ اللہ کو آپکا قناعت پسند آجائے اور اللہ آپکو اس سے زیادہ عطاء فرمائے۔شاید ایسے ہی حالات کے پیش نظر حضرت محمد صلی اللہ علیہ وسلم نے فرمایا ہے کے تم اس شخص کی طرف دیکھو جو (دنیاوی اعتبار سے ) تم سے کم تر ہو ۔اور اس شخص کیطرف مت دیکھو جو (دنیاوی اعتبار سے ) تم سے بڑا ہو ۔کیونکہ اسطرح تم اللہ کی نعمتوں کو حقیر نہیں سمجھو گے ۔” بات بہت سادہ ہے کاش ہمیں سمجھ آجائے۔چاہے آپ امیر ہیں یا غریب جب دعا کے لئے ہاتھ اٹھا ئیں تو اپنے لئے عزت دولت شہرت صحت اور خوشیوں کے ساتھ ساتھ “قناعت” کی دولت مانگنا مت بھولیے گا کیونکہ قناعت سے محرومی امیروں کو حریص بنا دیتا ہے اور غریب کو رسوا کر دیتا ہے ۔اسی لئے قناعت کا حاصل ہونا ہر ایک کے لئے دونوں جہاں میں عزت کا باعث ہے ۔

نوٹ :یہ تحریر خاص طور پہ خواتین کے لئے ہے بغیر معذرت کے۔

خانہ کعبہ اور مسجد نبوی کے بعد مسلمانوں کے لئے تیسرا مقدس ترین مقام بیت المقدس یعنی مسجد اقصی ہے۔ ایک حدیث کے مطابق مسجد حرام اور مسجد نبوی کے بعد جس مسجد کی طرف سفر کی اجازت دی گئ ہے وہ مسجد اقصی ہے۔یہ وہ پاکیزہ مقام ہے جسکا ذکر قرآن میں آیا۔قرآن میں اک جگہ اسکا یوں ذکر ہے کہ ” پاک ہے وہ ذات جس نے اپنے بندے کو راتوں رات مسجد حرام سے مسجد اقصی تک کی سیر کرائی۔جسکے ماحول کو ہم نے برکت دی ہے۔” معراج کی رات آپؐ (ص) کے سامنے براق لایا گیا جس پر آپ ص سوار ہوئے اور مسجد حرام پھر طور سینا سے ہوتے ہوئے جہاں حضرت موسی علیہ سلام سے ہم کلام ہوۓ بیت المقدس پہنچے ۔جہاں حضرت آدم علیہ سلام سے لیکر حضرت عیسی علیہ السلام تک تمام انبیأکرام آپ ص کے منتظر تھے ۔

اس رات بیت المقدس کو اللہ کی طرف سے عزت و تکریم اور اللہ کی خاص برکت نےمسجد کا احاطہ کیا ہوا تھا ۔اس سے پہلے بھی یہ مسجد زمانہ قدیم سے ہی خاص اہمیت کا حامل رہا ہے یہ دنیا کی قدیم ترین اور یروشلم کی سب سے بڑی مسجد ہے جس میں ہزاروں کی تعداد میں بیک وقت نمازی نماز ادا کرسکتے ہیں ۔اور یہ یہودیوں عیسائیوں اور مسلمانوں کے لئے یکساں طور پے باعث عزت اور قابل احترام ہے ۔یہاں حضرت سلیمان کامزار تخت داؤد بھی ہے ۔اور حضرت عیسی علیہ السلام کی دینی کاوشوں کے ان گنت نشانات ہیں ۔انکے علاوہ بھی حضرت انبیأکرام اور دیگر مصلحین کے یادگار اس پاک مقام میں موجود ہیں۔

اس حساب سے مسجد اقصی مسلمانوں کا عظیم ورثہ اور زمین پر اللہ کی مقدس ترین امانت ہے جسکی حفاظت ہر مسلمان پر واجب ہے ۔اسکی بے حرمتی ہر مسلمان کی ایمان کا امتحان ہے ۔اسکا نقصان پورے عالم اسلام کا نقصان ہے ۔مگر اللہ کی شان ہے کہ اللہ کی زمین میں اللہ کا گھر جل رہا ہے مگر اللہ کے بندے اسرائیل جیسے غلیظ ملک سے ملکی دنیاوی مفادات کی خاطر دوستی کا ہاتھ بڑھاکر ان شعلوں کو ہوا دے رہے ہیں ۔چند واقعات کو بنیاد بنا کر پاکستان کو دہشت گرد ملک قرار دینے والے اقوام عالم آج اسرائیل کی اس کھلم کھلا دہشت گردی پر خاموش مسلمانوں کی بے بسی کا لطف اٹھا رہا ہے اور یہ سلسلہ تو سالوں سے جاری ہے ۔فلسطین کی بے بس قوم کشمیر کے اور برما کے مسلمان اور بلکل پڑوس میں افغانستان کے مسلمان تو نجانے کب سے اپنوں کی بے حسی اور کافروں کی بے رحمی کی عظیم آزمائش سے نبرد آزما ہیں

ہم صرف انکے حوصلے کی بلندی کی دعا کر سکتے ہیں۔کیوںکہ ہم بحثیت مسلمان اتنا کمزور ایمان رکتھے ہیں کہ ٹماٹر یا پٹرول مہنگا ہونے پر تو ہم احتجاج کے نام پر قانون اور انسانیت کی دھجیاں اڑادیں گے لیکن جب جہاد اور جنگ کا خطرہ نظر آۓ کوئی بڑی سے بڑی تباہی ہو جائے تب ہم دو بلین مسلمان بجائے کفن سر پے باندھنے کے ہم 57 ممالک کی چند ہزار آقاؤں کی طرف دیکتھے ہیں۔ کیونکہ ہم جانتے ہیں ہماری آقائیں وقتی طور پر مصالحت کی کوئی راہ نکال لیں گے ۔وہ بھی آقائیں گذرے جن کے پاس وسائل نہ ہوتے ہوئے بھی بصورت جنگ جو کہتے تھے کہ جنگ لازم ہو تو لشکر نہیں دیکھے جاتے۔اور آج ہمارا ملک اور ہم جیسے 56 دوسرے اسلامی ریاستیں وسائل کے ہوتے دنیا کی بہترین فوج رکھتے ہوئے بھی ایٹمی طاقت رکتھے ہوئے بھی جنگ سے گریزاں ہیں تو کیوں ہیں؟ کیونکہ ہمارا ایمان کمزور ہے ۔ہمیں اپنے مسلمان بھائی کی تکلیف پر تکلیف محسوس نہیں ہوتی۔

ابھی نندن کو چائے پلانے کا واقعہ ابھی اتنا پرانا نہیں ہوا جب ہمارے حکمران اپنی اس بزدلانہ فعل کو رسول پاک ص کے صلہ رحمی اور معاف کرنے کے اس عظیم واقعہ سے ملا تے رہے کہ جب ایک کافر آپ ص کو نیند میں پاکر آپ ص کی جان لینے کی کوشش کرتا ہے ۔اتنے میں آپ ص کی آنکھ مبارک کھل جاتی ہے اور وہ کافر اپنی جان کو خطرے میں پا کر خوف سے تھر تھر کانپنے لگتا ہے۔مگر حضورپاک ص اسے معاف فرمادیتے ہیں جس سے متاثر ہو کر وہ اور دوسرے کہیں کافر اسلام میں داخل ہوجاتے ہی۔ اور یہاں کیا ہوا ابھی نندن بھارت کے حوالے کردئا جاتا ہے مگر مودی سرکار مسلمان تو کیا ہوتے الٹا پورا سال بھارتی فوج باردڈ پر مسلمانوں کی زندگی مشکل تر کر نے کی کوشش میں اضافہ کرتے ہے ۔وجہ صرف اتنی تھی کے وہ کافر جانتا تھا کے رسول پاک چاہتے تو اسکا سر تن سے جدا کر سکتے تھے لیکن انہوں نے نہیں کیا ۔اور یہ کافر ابھی نندن جانتا تھا کے ہم اپنی مفادات بزدلی اور بے غیرتی کے ہاتھوں اتنے مجبور ہیں کے چاہ کر بھی اسکا سر نہیں اڑا سکتے تھے۔اسی لیے تو جسکا جی چاہتا ہے وہ نبی کی شان میں گستاخی کرتا ہے ۔جسکی مرضی مدرسووں میں خودکش دھماکے کرواتا ہے۔آئے روز گستاخئ رسول کے واقعات تمام اسلامی ممالک سمیت ان کفار ممالک کے منہ پر بھی طمانچہ ہیں جو دنیا کو امن اور اخلاقیات کا درس دیتے نہیں تھکتے۔

کشمیریوں فلسطینی مسلمانوں پر اس ظلم میں سبھی مسلمان شامل ہیں ۔مسجد اقصی سالوں سے عالم اسلام کے سامنے اک سوالیہ نشان ہے ۔فلسطین جو امن کا شہر کہلاتا ہے مگر یہاں کے باشندوں کو امن اور سکون کھبی بھی نصیب نہیں ہوسکا۔یہ مقدس شہر تو کہیں بار اجڑ گیااور کہیں بار دوبارہ بسایا گیا۔جسکا شمار ناممکن ہے ۔یہ سنہرا رنگ والا مسجد ہزار بار اپنی بے حرمتی جھیل چکا ہے ۔اسکی معتبر دیواریں معصوم جانوں کی بے قدری کی گواہ ہیں اور یہ مقدس زمین ہزاروں بے گناہوں کا خون اور آنسو اپنے دامن میں جذب کر چکا ہے ۔

یہ زردی مائل رنگت لاکھوں آزردگیاں سہ چکا ہے ۔لیلۃ القدر کی یہ رات گواہی دے گی کہ جس اللہ نے ہمیں 57 اسلامی ممالک اور دو بلین سے زائد مسلمانوں کو عزت آرام اور عیش و عشرت کی زندگی عطاء کی وقت آنے پر ہم اس اللہ رب العزت کے گھر کی حفاظت نہیں کرسکے۔