چترال شہر میں متعدد دکانین سیل کردیا گیا، جوغیر قانونی پرنٹنگ اور مہر یں بنانے میں ملوث تھے،

چترال (نمائندہ چترال ٹائمز) ڈپٹی کمشنر لویر چترال محسن اقبال کی خصوصی ہدایت پر ایڈیشنل اسسٹنٹ کمشنر لویر چترال شہروزمفتی نے منگل کے روز چترال شہر میں متعدد دکانوں کو سیل کردیا جوکہ بغیر کسی رجسٹریشن کے پرنٹنگ، اسٹامپ(مہر) سازی اور اس سے متعلقہ کام کرنے میں ملوث تھے جس کے لئے محکمہ اطلاعات سے ڈیکلریشن حاصل کرنا لازمی ہوتاہے۔ شہروز مفتی نے رابطہ کرنے پر بتایاکہ انہیں ایک عرصے سے اطلاع مل رہی تھی کہ چترال بازار میں بعض دکاندار غیر قانونی طور پر پرنٹنگ پریس کاکام کرنے میں مصروف ہیں اور یہاں تک کہ سرکاری اسٹامپ(مہریں) بھی بناتے ہیں جبکہ کئی ایک افغان پاسپورٹ کی تیاری اور دوسرے سرکاری کاغذات اور کارڈز جعلی طور پر بنارہے ہیں۔ انہوں نے بتایاکہ انہوں نے کاروائی کے طور ان دکانداروں کو غیر قانونی پرنٹنگ اور مہرسازی کے کام میں ملوث پایا جس پر ان کے دکانیں سیل کردی گئی ہیں۔ انہوں نے کہاکہ ان دکانوں کو مناسب ضمانت پر ڈی سیل کرکے انہیں تمام قانونی تقاضے پورا کرنے کے لئے وقت دیا جائے گا جس سے پہلے وہ کسی بھی ایسی سرگرمیوں میں ملوث نہیں ہوں گے کیونکہ پرنٹنگ کاکام ریگولیشن اور ضابطے کے ماتحت کیا جاتا ہے جوکہ حساسیت رکھتی ہے۔