مرثیہ : بہ یاد سید جعفر شاہ کارگین ۔۔۔۔۔۔۔۔۔۔۔۔۔ارشاد علیٰ ارشاد
بو لوٹ ہردی تہ غونہ پھوردل انسان نو لیسی
پردومو فہل توُ سوم توُ تے فہلان نو لیسی
پردیس ہمش پردیسہٰ توُ بوکو ژان پردیسی
توُ چقہ مہ ژانیرو بئیرو اہلان نو لیسی
مہ غون غریب بنی آدم حا جتار ہونی محروم
کیہ بے حاجت حاجتی چمور پورزان نو لیسی
دیہو دولتہ مڑاغ ثے ہر ہمدرد ہر ای والئیو
پھوک نو پھوکروؤ توُ کو سوم ہش خزانان نو لیسی
مہرگیں مہرو وفا توُ نام نو یوکو اوشوئی
ژور گنیان ژاوؤ سوم بِیش کردو مہر ان نو لیسی
معصوم ثے سیدھا سادہ فرسکئیو لوؤ دئیاور
قہر درویشو خوؤ مشکی قہران نو لیسی
مہ شریں تتو اوشوئی بئرائے بو جام ملگری
جوست ہونی کھاڑ ای بتی ہاروش دوستان نو لیسی
دعا اللہُ ساری مشکیم وا تتے دئیارئیے
جنت بہشت تہ ژاغہ دنیا ویران نو لیسی
ارشاد زبان تہ مو ٹو زوبانہ وار تو کھیو بوس
مہ جو کمزور خیالات بے زبان تان نو لیسی