Chitral Times

May 21, 2024

ﺗﻔﺼﻴﻼﺕ

وزیر اعلی خیبر پختونخوا سردار علی امین خان گنڈاپور کی زیر صدارت سالانہ ترقیاتی پروگرام سے متعلق اہم جلاس

Posted on
شیئر کریں:

وزیر اعلی خیبر پختونخوا سردار علی امین خان گنڈاپور کی زیر صدارت سالانہ ترقیاتی پروگرام سے متعلق اہم جلاس

پشاور ( چترال ٹائمز رپورٹ ) وزیر اعلی خیبر پختونخوا سردار علی امین خان گنڈاپور کی زیر صدارت سالانہ ترقیاتی پروگرام سے متعلق ایک اہم جلاس گزشتہ روز وزیراعلیٰ ہاﺅس پشاور میں منعقد ہوا جس میں سالانہ ترقیاتی پروگرام کے حجم اور دیگر متعلقہ اُمور پربریفینگ دی گئی جبکہ عوامی فلاح بہبود کے اہم منصوبوں کی بروقت تکمیل سے متعلق اُمور پر غور وخوض کیا گیا ۔وزیر اعلی کے مشیر برائے خزانہ مزمل اسلم اور ایڈیشنل چیف سیکرٹری امتیاز حسین شاہ کے علاوہ دیگر متعلقہ حکام نے اجلاس میں شرکت کی۔ اجلاس میں عوامی فلاح و بہبود کے اہم منصوبوں کی بروقت تکمیل کے لئے درکار فنڈز کی فراہمی سے متعلق معاملات پر گفتگوکی گئی ۔وزیراعلیٰ نے اس موقع پر ٹی ایم ایز اور ڈبلیو ایس ایس سیز کے تمام ٹیوب ویلز اور بڑی سڑکوں پر نصب لائٹس کو شمسی توانائی پر منتقل کرنے کا فیصلہ کیا ہے اور متعلقہ حکام کو اس سلسلے میں ضروری اقدامات اٹھانے کی ہدایت کی ہے ۔

 

وزیراعلیٰ نے واضح کیا کہ پہلے مرحلے میں تمام ڈویژنل ہیڈکوارٹرز میں لائٹوں کو شمسی توانائی پر منتقل کیا جائے۔ اجلاس میں بی آر ٹی کی ڈیزل ہائی برڈ بسوں کو مکمل طور پر الیکٹرک سسٹم پر منتقل کرنے سے متعلق امور پر بھی تبادلہ خیال کیا گیا۔ علی امین خان گنڈا پور نے متعلقہ حکام کو ہدایت کی کہ سالانہ ترقیاتی پروگرام میں تکمیل کے قریب منصوبوں کو فنڈز کی فراہمی میں پہلی ترجیح دی جائے اور کام کے معیار پر سمجھوتہ کئے بغیر ترقیاتی منصوبوں کی بروقت تکمیل یقینی بنائی جائے۔وزیراعلیٰ نے ترقیاتی منصوبوں کے معیار کو یقینی بنانے کے لئے مانیٹرنگ کے نظام کو مزید موثر بنانے اور ترقیاتی منصوبوں میں بدعنوانی کے مکمل سدباب کے لئے موثر نظام وضع کرنے کی ہدایت کی ہے ۔ اور واضح کیا ہے کہ ایسا نظام وضع کیا جائے جس میں بدعنوانی کے تمام راستے مسدود ہوں، بہتر اور شفاف طرز حکمرانی صوبائی حکومت کی ترجیحات میں شامل ہے اور اس مقصد کیلئے بد عنوانی پر مبنی سرگرمیوں کا راستہ روکنا ناگزیر ہے ۔

 

وزیر اعلی خیبر پختونخوا سردار علی امین گنڈاپور کا شہریوں سے چاند رات پر ہوائی فائرنگ سے گریز کرنے کی اپیل

پشاور ( چترال ٹائمز رپورٹ ) وزیر اعلی خیبر پختونخوا سردار علی امین گنڈاپور نے شہریوں سے چاند رات پر ہوائی فائرنگ سے گریز کرنے کی اپیل کی ہے اور کہا ہے کہ چاند رات اور عید کے موقع پر ہوائی فائرنگ سے مکمل اجتناب کیا جائے۔اس سلسلے میں پیرکے روز یہاں سے جاری ایک خصوصی بیان میں وزیراعلیٰ نے کہاکہ ہوائی فائرنگ کی اندھی گولی کسی کی جان لے سکتی یا کسی کو عمر بھر کی معذوری سے دوچار کرسکتی ہے، ہوائی فائرنگ کسی کی عید کی خوشیوں کو زندگی بھر کے غم میں بدل سکتی ہے ۔وزیر اعلی کا کہنا تھا کہ ہوائی فائرنگ ایک قانونی اور معاشرتی جرم ہے جس سے گریز کیا جائے۔ اُنہوںنے شہریوں سے اپیل کی کہ وہ اپنی چند لمحوں کی خوشی کے لئے کسی کے گھر کو ماتم کدہ نہ بنائیں، شہری نہ صرف خود ہوائی فائرنگ سے گریز کریں بلکہ دوسروں کو بھی اس بات کی تلقین کرکے ذمہ دار اور مہذب شہری ہونے کا ثبوت دیں۔ علی امین خان گنڈا پور نے انتظامیہ اور پولیس کو بھی چاند رات پر ہوائی فائرنگ کے سد باب کے لئے ٹھوس اقدامات اٹھانے کی ہدایت کی اور کہا کہ ہوائی فائرنگ پر پابندی کی خلاف ورزی کرنے والوں کے خلاف سخت کارروائی عمل میں لائی جائے۔


شیئر کریں:
Posted in تازہ ترین, جنرل خبریںTagged
87334