Chitral Times

Apr 17, 2024

ﺗﻔﺼﻴﻼﺕ

شجر کاری اور پودے لگانا سنت عمل ہے، موسمیاتی تبدیلی پر قابوپانے کیلئے ہر ایک کو اپنے حصے کا کردار ادا کرنا ہوگا۔شاہی خطیب مولانا خلیق الزمان 

Posted on
شیئر کریں:

شجر کاری اور پودے لگانا سنت عمل ہے، موسمیاتی تبدیلی پر قابوپانے کیلئے ہر ایک کو اپنے حصے کا کردار ادا کرنا ہوگا۔شاہی خطیب مولانا خلیق الزمان

چترال (نمائندہ چترال ٹائمز )خطیب شاہی مسجد چترال مولانا خلیق الزمان کاکاخیل نے آج جمعہ کے اجتماع سے خطاب کرتے ہوئے کہا کہ شجر کاری اور پودے لگانا سنت عمل ہے، نبی کریم صلی اللہ علیہ و آلہ و سلم نے نہ صرف اس کی بھرپور حوصلہ افزائی فرمائی ہے بلکہ اپنے مبارک ہاتھوں سے پودے لگا کر اس کی اہمیت کو اپنے عمل سے اجاگر کیا ہے، اسلام کی نگاہ میں درختوں اور جنگلات کی اس قدر اہمیت ہے کہ خلافت راشدہ میں جب سیدنا صدیق اکبر رضی اللہ عنہ نے لشکر اسلام کو اسلام کی سرحدات کی طرف روانہ کیا تو اس بات کی بطور خاص تاکید فرمائی کہ سبزے اور درختوں کو مت اجاڑنا۔مولانا خلیق الزمان کاکا خیل نے کہا کہ اسلام نے اپنے پیروکاروں کی ذاتی اور انفرادی زندگی سے لیکر اجتماعی اور سماجی زندگی تک ہر ہر قدم پر رہنمائی کی ہے اور زندگی گزارنے کے طور و تہذیب بتلائی ہے۔ انہوں نے کہا کہ اسلامی تعلیمات اور تہذیب کو اپنانے سے انسان کامل بن جاتا ہے اور وہ دنیا اور اس کی ہر چیز کیلئے نفع رساں بن جاتا ہے۔ انہوں نے کہا کہ ہم نبی کریم صلی اللہ علیہ وآلہ و سلم کے طورطریقوں اور سنتوں کے مطابق اپنی زندگی ڈھالیں تو ہمارا ہر قدم عبادت سے عبارت ہو سکتا ہے، انہوں نے کہا کہ دین اسلام میں ماحول کی حفاظت،صفائی ستھرائی کی بڑی اہمیت ہے اور راستوں کو صاف رکھنے کے ساتھ ساتھ درختوں اور سبزے کی حفاظت کو بھی انسانیت کی مشترکہ ضرورت بتایا گیا ہے، انہوں نے کہا کہ قدرتی ماحول کی حفاظت کیلئے درختوں کی حفاظت کرنا اور پودے لگانا بہت ضروری ہے، نبی کریم صلی اللہ علیہ و آلہ و سلم نے اپنے دست مبارک سے شجرکاری فرمائی ہے، اس لیے ہم اگر شجر کاری کریں تو نہ صرف یہ کہ یہ ہمارے ماحول کیلئے فائدہ مند ہوگی بلکہ یہ عبادت میں بھی شمار ہوگی۔ انہوں نے کہا کہ حضور صلی اللہ علیہ و آلہ و سلم نے اپنے مبارک ہاتھوں سے مدینہ میں حضرت سلمان فارسی رضی اللہ عنہ کے باغ میں سینکڑوں پودے لگائے ہیں۔ اس لیے پودے لگانا اور درختوں کی حفاظت کرنا اسلامی تہذیب کا ورثہ ہے، نہ کہ جنگلات تباہ کرنا اور درختوں کی بے دریغ کٹائی۔ انہوں نے کہا کہ درخت لگانا اور ان کی حفاظت کرنا حکومت اور عوام الناس دونوں کا فرض ہے۔ انہوں نے بذاتِ خود نصف درجن پودے لگانے کا بھی اعلان کیا اور نمازیوں سے بھی اپیل کی کہ ہر شخص کوشش کرے کہ سیزن میں ایک پودا اپنے کھیت، صحن یا گھر کے قریب کہیں بھی لگائے اور اس کی اچھی طرح حفاظت کرے۔انھوں نے یہ خطاب آج پانی کی عالمی دن کی مناسبت سے خطاب کرتے ہوئے کیا ، انھوں نے کہا کہ موسمیاتی تبدیلی پر قابوپانے کیلئے ہر ایک کو اپنے حصے کا کردار ادا کرنا ہوگا۔


شیئر کریں:
Posted in تازہ ترین, چترال خبریں
86659