حکومت پاکستان گلگت بلتستان میں ترقی،امن، خوشحالی اور نوجوان نسل کی بہتری کے لئے بھرپور کردار ادا کر تی رہے گی،نگران وزیراعظم انوارالحق کاکڑ
حکومت پاکستان گلگت بلتستان میں ترقی،امن، خوشحالی اور نوجوان نسل کی بہتری کے لئے بھرپور کردار ادا کر تی رہے گی،نگران وزیراعظم انوارالحق کاکڑ
اسلام آباد( چترال ٹائمزرپورٹ) نگران وزیراعظم انوارالحق کاکڑ نے گلگت بلتستان کے عوام کو جنگ آزادی گلگت بلتستان کے 76 سال مکمل ہونے پرمبارکباد پیش کرتے ہوئے کہا ہے کہ گلگت بلتستان کے لوگوں کوبے مثال قربانیوں سے آزادی کی نعمت ملی،حکومت پاکستان گلگت بلتستان میں ترقی،امن، خوشحالی اور نوجوان نسل کی بہتری کے لئے بھرپور کردار ادا کر تی رہے گی،قومی یکجہتی، مذہبی ہم آہنگی اور پر امن بقائے باہمی کے ذریعے دشمن کے مذموم مقاصد کو ناکام بنانا ہوگا۔بدھ کو نگران وزیراعظم انوارالحق کاکڑ نے گلگت بلتستان کی جنگ ا?زادی کے 76 سال مکمل ہونے کے موقع پر اپنے پیغام میں کہا کہ آج کا دِن گلگت بلتستان اور پورے پاکستان کے لیے نہایت اہمیت کا حامل ہے اور ہماری تاریخ میں ایک اہم سنگِ میل کی حیثیت رکھتا ہے،آج سے 76 سال پہلے گلگت بلتستان کے غیور عوام نے قیامِ پاکستان کے بعد ڈوگرا راج کے خلاف کیپٹن مرزا حسن خان اور صوبیدار میجر بابر جیسے بہادر اور جَری رہنماؤں کی زیرِ قیادت بے سرو سامانی کے باوجود نہایت بہادری اور دلیری کا مظاہرہ کیا اور ہندو سامراج کے کٹھ پْتلی گورنر گھنسارا سنگھ کو ہتھیار ڈالنے پر مجبور کر دیا اور گلگت بلتستان کے بہادر لوگوں نے پاکستان کے ساتھ الحاق کو ترجیح دی۔
انہوں نے کہاکہ گلگت بلتستان کی آزادی ہمارا اثاثہ اور سرمایہء افتخار ہے اور اپنی نوعیت کا منفرد کارنامہ ہے جس کا تاج گلگت بلتستان کے باشندوں نے یکم نومبر 1947 کو خود پاکستان کے سر پر سجایا اور اپنی غیر مشروط،بے مثل اور والہانہ محبت سے ثابت کر دیا کہ ہم پاکستان کی ترقی اور استحکام کے لیے کسی بھی قربانی سے دریغ نہیں کریں گے۔ یہی وجہ ہے کہ پورا ملک اس علاقہ کے جذبہ حبْ الوطنی کو قدر کی نگاہ سے دیکھتا ہے،ان جَری لوگوں نے ہمیشہ کیلئے دشمن کو یہ بھی باور کروا دیا کہ گلگت بلتستان پاکستان کا حصہ تھا،ہے اور انشاء اللہ ہمیشہ رہے گا۔وزیراعظم نے کہاکہ گلگت بلتستان کے لوگ خوش قسمت ہیں کہ ان کی بے مثال قربانیوں سے آزادی کی نعمت ملی لیکن افسوس کہ بھارت کے غیر قانونی زیر تسلط جموں و کشمیر کے مسلمان آج تک ہندوستان کے غاصبانہ پنجے میں جکڑے ہوئے ہیں۔اگرچہ کشمیر کے مسئلہ کے حل کے لیے اقوام متحدہ کی واضح قراردادیں موجود ہیں لیکن بھارت کی ہٹ دھرمی اور عالمی طاقتوں کی خاموشی کی وجہ سے مسئلہ کشمیر ابھی تک حل نہیں ہوسکا۔
انہوں نے کہاکہ میں آج ایک مرتبہ پھر بھارت کے غیر قانونی زیر تسلط جموں و کشمیر کے مظلوم عوام کے ساتھ یکجہتی کا اظہار کرتا ہوں۔انہوں نے کہا کہ پاکستان کشمیریوں کی بھرپور سیاسی، سفارتی اور اخلاقی مدد تب تک جاری رکھے گا جب تک کہ ان کو اقوام متحدہ کی قراردادوں کے مطابق حقِ خود ارادیت نہیں مل جاتا۔ نگران وزیر اعظم نے کہا کہ آج میں اقوام ِ عالم کو یہ پیغام دینا چاہتا ہوں کہ ہم مسئلہ فلسطین اور مسئلہ کشمیر کا پْر امن حل چاہتے ہیں اور قِبلہ اَول کی زمین پر اسرائیل کی جارحیت کی بھر پور مذمت کرتے ہیں۔انوارالحق کاکڑ نے کہاکہ ساری دنیا اس حقیقت سے بخوبی روشناس ہے کہ گلگت بلتستان بہترین مواقع اور امکانات کی سرزمین ہے، قدرتی و معدنی وسائل اور عوام کی بیش بہا صلاحیتوں سے گلگت بلتستان خطے کا اقتصادی اور سیاحتی مرکز بننے کی راہ پر گامزن ہے۔ انہوں نے کہاکہ گلگت بلتستان سمیت پورے پاکستان کے روشن مستقبل کیلئے ہم سب کواتحاد و یگانگت کا مظاہرہ کرتے ہوئے درپیش چیلنجز کا مقابلہ کرنا ہوگااورقومی یکجہتی، مذہبی ہم آہنگی اور پر امن بقائے باہمی کے ذریعے دشمن کے مذموم مقاصد کو ناکام بنانا ہوگا۔وزیراعظم نے کہاکہ حکومت پاکستان گلگت بلتستان میں ترقی،امن، خوشحالی اور نوجوان نسل کی ترقی کے لئیبھرپور کردار ادا کر تی رہے گی۔