الیکشن کمیشن کی سفارشات پر افسران کے تبادلوں کی رپورٹ طلب
الیکشن کمیشن کی سفارشات پر افسران کے تبادلوں کی رپورٹ طلب
اسلام آباد(چترال ٹائمزرپورٹ)ہائی کورٹ نے الیکشن کمیشن کی سفارشات پر افسران کے تبادلوں کی رپورٹ طلب کرلی۔نگراں دورِ حکومت میں الیکشن کمیشن کے حکم پر افسران کے ٹرانسفر کیس میں اسلام آباد ہائی کورٹ نے منگل تک رپورٹ طلب کرتے ہوئے پوچھا ہے کہ الیکشن کمیشن کی سفارشات پر کتنے افسران کے تبادلے ہوچکے ہیں؟۔جسٹس میاں گل حسن اورنگزیب نے الیکشن کمیشن کی سفارشات پر تبادلوں سے متعلق کیس کی گزشتہ سماعت کا تحریری حکمنامہ جاری کردیا، جس میں عدالت نے کہا کہ یہ بھی آگاہ کیا جائے کہ کچھ افسران کو موجودہ عہدوں پر کام جاری رکھنے کا کیوں کہا گیا؟۔ اسٹیبلشمنٹ ڈویڑن اور الیکشن کمیشن جامع رپورٹ آئندہ سماعت پر عدالت میں جمع کرائیں۔واضح رہے کہ الیکشن کمیشن نے مختلف محکموں کے سیکرٹریز اور آئی جی سندھ کے تبادلے کے احکامات جاری کیے تھے۔ الیکشن کمیشن نے چیف کمشنر اسلام آباد اور ڈپٹی کمشنر کے تبادلے کی بھی سفارش کی تھی۔ الیکشن کمیشن کے مطابق اسلام آباد پولیس اور انتظامیہ میں بھی تبادلوں کی ہداہت کی گئی ہے۔
الیکشن کمیشن نے حلقہ بندیوں پر جمع ہونے والے اعتراضات کی تفصیلات جاری کر دیں
اسلام آباد(سی ایم لنکس)الیکشن کمیشن نے حلقہ بندیوں پر جمع ہونے والے اعتراضات کی تفصیلات جاری کر دیں۔الیکشن کمیشن کے ترجمان کے مطابق الیکشن کمیشن میں حلقہ بندیوں پر 1324 اعتراضات جمع ہوئے۔ترجمان کے مطابق حلقہ بندیوں پر پنجاب میں 672، سندھ 228، خیبر پختون خوا میں 293 اعتراضات جمع ہوئے۔ترجمان الیکشن کمیشن کے مطابق حلقہ بندیوں پر بلوچستان میں 124 اور اسلام آباد میں 7 اعتراضات جمع ہوئے۔ترجمان کا کہنا ہے کہ الیکشن کمیشن یکم نومبر 2023ء سے حلقہ بندیوں پر اعتراضات کی سماعت کرے گا جس کے لیے بینچ تشکیل دے دیے گئے ہیں۔ترجمان الیکشن کمیشن کے مطابق یکم اور 2 نومبر کی سماعت کے لیے اعتراض کنندگان کو نوٹس بھی بھیج دیے گئے ہیں۔ترجمان کے مطابق تمام اعتراضات کی سماعت کے بعد 30 نومبر کو حلقہ بندیوں کی حتمی اشاعت کر دی جائے گی۔