چیف الیکشن کمشنر کا صدر مملکت کو جوابی خط، ملاقات سے انکار
چیف الیکشن کمشنر کا صدر مملکت کو جوابی خط، ملاقات سے انکار
اسلام آباد(چترال ٹایمزرپورٹ )الیکشن کمیشن کی جانب سے صدر مملکت کو جوابی خط لکھا گیا ہے، جس میں چیف الیکشن کمشنر کی صدر سے ملاقات سے انکار کیا گیا ہے۔صدر مملکت ڈاکٹر عارف علوی کو لکھے گئے جوابی خط میں الیکشن کمیشن نے اپنے فیصلے سے آگاہ کیا ہے کہ فی الحال چیف الیکشن کمشنر صدر سے ملاقات نہیں کریں گے۔ خط کے مطابق قومی اسمبلی وزیراعظم کی ایڈوائس پر آئین کے آرٹیکل 58 (1) کے تحت تحلیل ہوئی۔ الیکشن ایکٹ کے سیکشن 57 میں ترمیم ہو چکی ہے۔خط میں کہا گیا ہے کہ الیکشن ایکٹ میں ترمیم کے بعد الیکشن کی تاریخ مقرر کرنا الیکشن کمیشن کا اختیار ہے۔ صدر آئین کے آرٹیکل کے 58 ٹو کے تحت اسمبلی تحلیل کرے تو ہی الیکشن کی تاریخ مقرر کرسکتا ہے۔ اگر اسمبلی وزیراعظم کی ایڈوائس پر تحلیل ہو تو پھر الیکشن کی تاریخ مقرر کرنے کا اختیار الیکشن کمیشن کو ہے۔
الیکشن کمیشن نے جواب میں مزید کہا ہے کہ صدرمملکت کے خط میں اٹھائے گئے نکات موجود حالات میں لاگو نہیں ہوتے۔ وزیراعظم کی ایڈوائس کے بعد صدر کے آرٹیکل 48 (5) کا اختیار ختم ہوجاتا ہے۔ الیکشن کمیشن انتخابات کروانے کی ذمے داری ادا کرنے میں بہت سنجیدہ ہے۔جوابی خط میں کہا گیا ہے کہ الیکشن کمیشن صدر کے دفتر کو بہت احترام دیتا ہے۔ صدر سے ملاقات باعث افتخار ہے اور مناسب وقت پر قومی معاملات پر صدر سے گائیڈنس لیں گے۔ الیکشن کمیشن سمجھتا ہے کہ ملاقات کے نتائج معمولی ہوں گے۔واضح رہے کہ صدر مملکت ڈاکٹر عارف علوی نے ایک خط کے ذریعے عام انتخابات کی تاریخ کا فیصلہ کرنے کے لیے چیف الیکشن کمشنر کو ملاقات کی دعوت دی تھی، جس میں کہا گیا تھا کہ صدر مملکت نے 9 اگست 2023 کو وزیر اعظم کے مشورے پر قومی اسمبلی کو تحلیل کیا۔ صدر مملکت آئین کے آرٹیکل 48 (5) کے تحت اسمبلی کے عام انتخابات کے انعقاد کے لیے تحلیل کی تاریخ کے 90 دن میں تاریخ مقرر کرنے کے پابند ہیں۔صدر مملکت کی جانب سے لکھے گئے خط میں مزید کہا گیا کہ چیف الیکشن کمشنر کو آج یا کل صدر کے ساتھ ملاقات کے لیے مدعو کیا جاتا ہے تاکہ مناسب تاریخ طے کی جا سکے۔
علامہ اقبال اوپن یونیورسٹی، انٹرنیشنل طلبہ کے آن لائن امتحانات 11ستمبرسے شروع ہوں گے
اسلام آباد(سی ایم لنکس)علامہ اقبال اوپن یونیورسٹی کے سمسٹربہار 2023ء کے میٹرک، ایف اے اور آئی کام پروگراموں میں داخل انٹرنیشنل طلبہ کے آن لائن(اِن کیمرہ)امتحانات 11ستمبر سے شروع ہوں گے جو 21ستمبر تک جاری رہیں گے،اِن امتحانات کے لئے یونیورسٹی نے تمام تر انتظامات مکمل کرلئے ہیں،یونیورسٹی نے طلبہ کے پورٹلز پر ضروری ہدایات، رول نمبر سلپس اور ڈیٹ شیٹ اپ لوڈ کردی ہیں۔وائس چانسلر، پروفیسر ڈاکٹر ناصر محمود کی خصوصی ہدایات پر شفافیت کو یقینی بنانے کے لئے یونیورسٹی امتحانات لینے والے جدید سافٹ ویئرزاور موبائل ایپس استعمال کرے گی اور اِن امتحانات کی نگرانی مائیکرو سافٹ ٹیمز کے ذریعے کیمرے کی مدد سے کی جائے گی۔ شعبہ بین الاقوامی امور کے ڈائریکٹر، ڈاکٹر زاہد مجید کے مطابق 36سے زائد ممالک سے کم و بیش 450طلبہ نے داخلہ لیا تھاجن کے آن لائن امتحانات شیڈول کردئیے گئے ہیں،اِن ممالک میں آسٹریلیا، روس، جنوبی کوریا، جاپان، چین، برطانیہ، امریکہ، آئرلینڈ، کینیڈا، فرانس، سپین، سویڈن، یونان، بیلجیئم، ایسٹونیا، جرمنی، ہنگری، اٹلی، ناروے، پرتگال، ترکیہ،تائیوان، تھائی لینڈ، بوٹسوانا، جنوبی افریقہ، ایران، بحرین، سعودی عرب، ابوظہبی، شارجہ، قطر، عراق، کردستان، اردن، کویت اور عمان شامل ہیں۔