یوم استحصال کشمیر پر گورنر حاجی غلام علی کی قیادت میں وزیر اعلٰی ہاؤس سے گورنر ہاؤس تک واک کا انعقاد
یوم استحصال کشمیر پر گورنر حاجی غلام علی کی قیادت میں وزیر اعلٰی ہاؤس سے گورنر ہاؤس تک واک کا انعقاد
نگران صوبائی وزراء حاجی منظورآفریدی، حامد شاہ،مقامی حریت رہنما، ڈی سی پشاور شاہ فہد،سرکاری حکام، طلبہ، سول و سماجی شخصیات کی شرکت
عالمی مسئلہ کشمیر کے حل کئے بغیر خطہ میں پائیدار امن کا قیام ممکن نہیں، حاجی غلام علی
پشاور ( چترال ٹایمز رپورٹ ) گورنر خیبر پختونخوا حاجی غلام علی کی قیادت میں یوم استحصال کشمیر کے حوالے سے ہفتہ کے روز وزیراعلٰی ہاؤس سے گورنر ہاؤس تک واک کا انعقاد کیا گیا. واک میں نگران صوبائی وزراء حاجی منظورآفریدی، حامد شاہ،مقامی حریت رہنما، ڈی سی پشاور شاہ فہد،سرکاری حکام، طلبہ، سول و سماجی شخصیات نے شرکت کی. واک کے شرکاء نے کشمیری عوام سے اظہار یکجہتی اور مودی حکومت کے کشمیری عوام پر مظالم کیخلاف نعرے بازی کی. شرکاء کی جانب سے مقبوضہ کشمیر میں بھارتی حکومت کی طرف سے لاک ڈاﺅن، غاصبانہ قبضہ کی شدید مذمت بھی کی گئ.
اس موقع پر گفتگو کرتے ہوئے گورنر کا کہنا تھا کہ مقبوضہ کشمیر کے مطلوم عوام کئی دہائیوں سے بھارتی جبر و مظالم کا شکار ہیں. دنیا کو پیغام دینا چاہتے ہیں کہ بھارت کے زیر قبضہ مقبوضہ کشمیر کے عوام کی اخلاقی، سفارتی حمایت جاری رکھیں گے. انہوں نے کہ 5 اگست کو مودی حکومت نے کشمیر کی خصوصی حیثیت کا خاتمہ کرکے ظلم کی ایک نئی داستان رقم کی. گورنر نے عالمی انسانی حقوق کے اداروں سے مطالبہ کیا کہ وہ کشمیری عوام پر جاری مظالم کا نوٹس لیں. انہوں نے کہا کہ ہمیشہ سے کشمیری عوام کے حق خود ارادیت کے ساتھ کھڑے ہیں اور کھڑے رہیں گے. انہوں نے کہاکہ مقبوضہ کشمیر میں انسانی حقوق کی کھلی خلاف ورزیاں جاری ہیں جو انسانی حقوق کے اداروں کیلئے لمحہ فکریہ ہیں گورنر نے واضح کیا کہ عالمی مسئلہ کشمیر کے حل کئے بغیر پاک بھارت تعلقات میں بہتری نہیں آ سکتی اور نہ ہی خطہ میں پائیدار امن کا قیام ممکن ہے. انہوں نے کہا کہ اقوام متحدہ کی قراردادوں کیمطابق عالمی مسئلہ کشمیر فوری حل ہونا چاہئے اور کشمیری عوام کو حق خودارادیت ملنا چاہئے۔