نگران وزیر اعلیٰ خیبر پختونخوا سے پولیو اوور سائٹ بورڈ کے چیئرمین ڈاکٹر کرسٹوفرایلس کی ملاقات، صوبے سے پولیو کے مکمل خاتمے کے لیے مشترکہ جدوجہد جاری رکھنے کےعزم کا اعادہ
نگران وزیر اعلیٰ خیبر پختونخوا محمد اعظم خان سے پولیو اوور سائٹ بورڈ کے چیئرمین ڈاکٹر کرسٹوفرایلس کی ملاقات، صوبے سے پولیو کے مکمل خاتمے کے لیے مشترکہ جدوجہد جاری رکھنے کےعزم کا اعادہ
پشاور ( چترال ٹایمز رپورٹ ) نگران وزیر اعلیٰ خیبر پختونخوا محمد اعظم خان سے منگل کے روز پولیو اوور سائٹ بورڈ کے چیئرمین ڈاکٹر کرسٹوفرایلس کی قیادت میں ایک وفد نے وزیر اعلیٰ ہاوس پشاور میں ملاقات کی۔ ملاقات میں خیبر پختونخوا بالخصوص جنوبی اضلاع میں پولیو وائرس کے خاتمے بارے حکمت عملی پر تفصیلی تبادلہ خیال کیا گیا۔ چیف سیکرٹری خیبرپختونخوا ندیم اسلم چوہدری، وزیر اعلیٰ کے پرنسپل سیکرٹری امجد علی خان اوردیگر متعلقہ حکام بھی اس موقع پر موجود تھے جبکہ پولیو اوور سائیٹ بورڈ وفد کے دیگر اراکین میں ریجنل ڈائریکٹر ورلڈ ہیلتھ آرگنائزیشن ڈاکٹر احمد الماندھری، ایکٹنگ ریجنل ڈائریکٹر یونیسیف اور کینیڈا کی ہائی کمشنر برائے پاکستان کے علاوہ روٹری انٹرنیشنل، بل اینڈ ملنڈا گیٹس فاونڈیشن(بی ایم جی ایف) اور دیگر متعلقہ فورمز کے نمائندے شامل تھے۔
اس موقع پر خیبر پختونخوا سے پولیو کے مکمل خاتمے کے لیے مشترکہ جدوجہد جاری رکھنے کےعزم کا اعادہ کیا گیا اور اس مقصد کے لیے جنوبی اضلاع کے مخصوص علاقوں میں خصوصی اقدامات اٹھانے کی ضرورت سے اتفاق کیا گیا۔ وزیر اعلیٰ محمد اعظم خان نے پولیو اوور سائیٹ بورڈ کے وفد کو خوش آمدید کہتے ہوئے کہا کہ صوبائی حکومت پولیو وائرس کے خاتمے کے لیے تمام شراکت داروں کے کردار کو سراہتی ہے۔ انہوں نے واضح کیا کہ خیبرپختونخوا کو پولیو فری بنانا ہمارا حتمی ہدف ہے اور اس مقصد کے حصول کے لیے ٹھوس اور مربوط حکمت عملی کے تحت اقدامات اٹھائے جا رہے ہیں۔ وہ بچے جو اب تک انسداد پولیو کوریج سے باہر ہیں اور انہوں نے تاحال انسداد پولیو کی ایک بھی خوراک نہیں لی، ان تک رسائی حاصل کرنے اور ان کو انسداد پولیو کے قطرے پلانے کے لیے خصوصی مہم جاری ہے۔
محمد اعظم خان کا کہنا تھا کہ نئی نسل کو صحت مند اور محفوظ مستقبل دینے کے لیے پولیو کا خاتمہ ناگزیر ہے،حکومت کی کوشش ہے کہ زیادہ سے زیادہ بچوں کو انسداد پولیو کے قطرے پلائے جائیں، انہوں نے کہا کہ اس مقصد کے لیے عوامی سطح پر شعور اجاگر کرنے کی ضرورت ہے، لوگوں کو یہ باور کرانا ہو گا کہ یہ ان کے بچوں کے مستقبل کا معاملہ ہے، والدین کی اس معاملے میں غیر سنجیدگی بچوں کے لیے ناقابل تلافی نقصان کا باعث بن سکتی ہے۔ وزیر اعلیٰ نے کہا کہ اس سلسلے میں رائے عامہ ہموار کرنے والے طبقات خصوصی طور پر اہل علم اور مقامی عوامی نمائندوں کا کردار بڑی اہمیت کا حامل ہے۔ پولیو اوور سائٹ بورڈ کے اراکین نے اس موقع پر گفتگو کرتے ہوئے پولیو کے مکمل تدارک کے لیے صوبائی حکومت کے عزم اورصوبائی انسداد پولیو ٹیم کی کوششوں کو سراہتے ہوئے کہا کہ پولیو وائرس کے مکمل خاتمے کے لیے اوور سائیٹ بورڈ بھرپور تعاون فراہم کرے گا۔
خیبر پختونخوا حکومت خطے سے پولیو کے مکمل خاتمے کے لیے پرعزم ہے، ندیم اسلم چوہدری
بچوں کے صحت مند اور محفوظ مستقبل کو یقینی بنانے کے لیے پولیو کا خاتمہ ناگزیر ہے،چیف سیکرٹری خیبرپختونخوا
پشاور (چترال ٹائمز رپور ٹ) چیف سیکرٹری خیبرپختونخوا ندیم اسلم چوہدری کی زیرصدارت پولیو اوورسائٹ بورڈ کے وفد کا اجلاس منگل کے روز کیبنٹ روم سول سیکرٹریٹ پشاور میں منعقد ہوا۔ اجلاس میں پولیو اوور سائیٹ بورڈ کے وفد کے سربراہ ڈاکٹر کرسٹو فر الیئس، متعلقہ انتظامی سیکرٹریوں، کمشنرز، پاک آرمی اور پولیس کے حکام، یونیسیف اور عالمی ادارہ صحت کے نمائندوں سمیت دیگر اعلی حکام نے شرکت کی۔ چیف سیکرٹری ندیم اسلم چوہدری نے اجلاس سے خطاب کرتے ہوئے کہا کہ خیبر پختونخوا حکومت خطے سے پولیو کے مکمل خاتمے کے لیے پرعزم ہے۔انہوں نے پولیو ورکرز کی انتھک کوششوں کو سراہا اور کہا کہ پولیو کے خلاف جنگ میں پولیو ورکرز صف اول کا کردار ادا کر رہے ہیں۔ چیف سیکرٹری نے عالمی شراکت داروں بشمول ورلڈ ہیلتھ آرگنائزیشن، روٹری انٹرنیشنل اور بل اور میلنڈا گیٹس فاؤنڈیشن کی خطے سے پولیو وائرس کے خاتمے کیلئے تکنیکی اور مالی معاونت فراہم کرنے پر شکریہ ادا کیا۔ انہوں نے کہا کہ ہمارے بچوں کے صحت مند اور محفوظ مستقبل کو یقینی بنانے کے لیے پولیو کا خاتمہ ناگزیر ہے۔اجلاس سے خطاب کرتے ہوئے پولیو اوور سائیٹ بورڈ کے سربراہ ڈاکٹر کرسٹوفر الیئس نے خیبر پختونخوا حکومت کی انسدادپولیو اقدامات کی تعریف کی اور وائرس کے مکمل خاتمے تک مشترکہ کوششوں کو جاری رکھنے کی ضرورت پر زور دیا۔اجلاس میں پولیو سے پاک ماحول کو یقینی بنانے اور وائرس کے خاتمے کیلئے مشترکہ کوششیں جاری رکھنے کا اعادہ کیا گیا۔بعد ازاں چیف سیکریٹری ندیم اسلم چوہدری نے عالمی ادارہ صحت کی جانب سے عطیہ کردہ پچاس بائیکس وصول کیں، جنہیں صوبے کے جنوبی اضلاع کی ہائی رسک موبائل اور خانہ بدوش آبادی کے ہر بچے تک پہنچنے کے لیے توسیعی حفاظتی ٹیکوں کے پروگرام کو تقویت دینے کے لیے استعمال کیا جائے گا۔