غیر شرعی نکاح کیس؛ چیئرمین پی ٹی آئی اور بشریٰ بی بی کو نوٹس جاری
غیر شرعی نکاح کیس؛ چیئرمین پی ٹی آئی اور بشریٰ بی بی کو نوٹس جاری
اسلام آباد(چترال ٹایمزرپورٹ)مقامی عدالت نے غیر شرعی نکاح کیس میں چیئرمین پی ٹی آئی اور بشریٰ بی بی کو نوٹس جاری کردیے۔دورانِ عدت نکاح کے کیس میں شہری کی درخواست پر اسلام آباد کی مقامی عدالت نے چیئرمین پی ٹی آئی اور بشریٰ بی بی کو 13 جولائی کے لیے نوٹس جاری کیے۔شہری محمد حنیف کی کمپلینٹ ناقابل سماعت قرار دینے کے سول جج کے فیصلے کے خلاف دائر درخواست پر سماعت سیشن جج ایسٹ اعظم خان نے کی۔ وکیل راجا رضوان عباسی کے توسط سے نگرانی اپیل دائر کی گئی، جس میں مؤقف اختیار کیا گیا ہے کہ عدالت نے کمپلینٹ ناقابل سماعت قرار دیتے ہوئے تمام قانونی تقاضے پورے نہیں کیے۔عدالت سے استدعا کی گئی ہے کہ عدالت 13 مئی کا فیصلہ کالعدم قرار دیتے ہوئے چیئرمین پی ٹی ا?ئی کیخلاف کارروائی شروع کرے۔درخواست میں مزید کہا گیا ہے کہ درخواستگزار محمد حنیف اسلامی اسکالر اور مفتی محمد سعید کے دوست ہیں۔مفتی محمد سعید نے چیئرمین پی ٹی آئی اور بشریٰ بی بی کے دورانِ عدت نکاح کرنے کا بیان دیا۔ عون چوہدری اور مفتی محمد سعید نے سول جج کے سامنے اپنا بیان ریکارڈ کروایا ہے۔بعد ازاں عدالت نے چیئرمین پی ٹی آئی اور بشریٰ بی بی کو نوٹس جاری کرتے ہوئے سماعت 13 جولائی تک ملتوی کر دی۔واضح رہے کہ سول جج نے دائرہ اختیار نہ ہونے پر چیئرمین پی ٹی آئی اور بشریٰ بی بی کے دوران عدت نکاح کے خلاف شہری کی کمپلینٹ ناقابل سماعت قرار دی تھی۔
چیئرمین پی ٹی آئی غیرشرعی نکاح کیس کے فیصلے کیخلاف نظرثانی اپیل دائر
اسلام آباد(سی ایم لنکس) ڈسٹرکٹ اینڈ سیشن کورٹ اسلام آباد میں چیئرمین پاکستان تحریک انصاف (پی ٹی آئی) کے خلاف غیر شرعی نکاح کیس میں درخواست گزار نے نظر ثانی اپیل دائر کردی۔درخواست گزار محمد حنیف نے سول جج نصرمن اللہ کے فیصلے کے خلاف نظرثانی اپیل دائر کی ہے، سیشن جج اعظم خان نے نظرثانی اپیل 13 جولائی کو سماعت کے لیے مقرر کردی۔سیشن جج اعظم خان نے چیئرمین پی ٹی آئی اور درخواست گزار کو نوٹس بھی جاری کردئیے ہیں۔درخواست میں کہا گیا ہے کہ بغیر کسی وجہ کے بشریٰ بی بی نیخاور مانیکا سے علیحدگی اختیار کرکے چیئرمین پی ٹی آئی سے نکاح کیا، مفتی سعید نے چیئرمین پی ٹی آئی اور بشریٰ بی بی کے دوران عدت نکاح کا بیان دیا، دوران عدت غیرشرعی نکاح کے بعد بشریٰ بی بی اور چیئرمین پی ٹی آئی بنی گالا میں رہے۔درخواست گزار کا کہنا ہے کہ فروری 2018 میں مفتی سعید سے دوبارہ چیئرمین پی ٹی آئی اور بشریٰ بی بی کا نکاح پڑھوایا گیا، عون چودھری اور مفتی سعید نے سول جج کے سامنے اپنا بیان ریکارڈ کروایا ہے۔درخواست گزار نے استدعا کی ہے کہ چیئرمین پی ٹی آئی کے غیر شرعی نکاح سے متعلق سول جج کا فیصلہ کالعدم قرار دیا جائے، سول جج نے شکایت ناقابل سماعت قرار دے کر قانونی تقاضے پورے نہیں کیے، سیشن عدالت اپیل منظور کر کے چیئرمین پی ٹی آئی کے خلاف کارروائی شروع کرے۔