آئندہ بجٹ میں پی ایس ڈی پی میں نوجوانوں کی ترقی کیلئے خصوصی طور پر رقم مختص کی جائے، وزیراعظم کی ہدایت
آئندہ بجٹ میں پی ایس ڈی پی میں نوجوانوں کی ترقی کیلئے خصوصی طور پر رقم مختص کی جائے،نوجوانوں کو اعلی تعلیم، پیشہ ورانہ تربیت اور باوقار روزگار کے مواقع فراہم کرنے کیلئے اقدامات شامل کئے جائیں، وزیراعظم کی ہدایت
اسلام آباد(چترال ٹایمزرپورٹ) وزیراعظم محمد شہبازشریف نے ہدایت کی کہ آئندہ بجٹ میں پی ایس ڈی پی میں نوجوانوں کی ترقی کیلئے خصوصی طور پر رقم مختص کی جائے،نوجوانوں کو اعلی تعلیم، پیشہ ورانہ تربیت اور باوقار روزگار کے مواقع فراہم کرنے کیلئے اقدامات شامل کئے جائیں،نوجوانوں کی اعلی تعلیم کیلئے پاکستان اینڈؤمنٹ فنڈ قائم کیا جائے۔وزیراعظم آفس کیمیڈیا ونگ سے جاری بیان کے مطابق یہ ہدایات وزیراعظم نے اپنی زیر صدارت پبلک سیکٹر ڈویلپمنٹ پروگرام کے حوالے سے بجٹ تجاویز پر منعقدہ اعلی سطحی اجلاس میں دیں۔ اجلاس میں وفاقی وزراء اسحاق ڈار، خواجہ محمد آصف، احسن اقبال، رانا ثناء اللہ، رانا تنویر حسین، مشیر وزیرِ اعظم احد خان چیمہ، معاونین خصوصی ملک احمد خان، عطاء اللہ تارڑ، جہانزیب خان اور متعلقہ اعلی حکام نے شرکت کی۔وزیراعظم نے ہدایت کی کہ آئندہ بجٹ میں پی ایس ڈی پی کے تحت نوجوانوں کی ترقی کیلئے خصوصی طور پر رقم مختص کی جائے۔
آئندہ بجٹ میں نوجوانوں کو اعلی تعلیم، پیشہ ورانہ تربیت اور باوقار روزگار کے مواقع فراہم کرنے کیلئے اقدامات شامل کئے جائیں۔ نوجوانوں کی اعلی تعلیم کیلئے پاکستان اینڈؤمنٹ فنڈ قائم کیا جائے۔بجٹ میں باصلاحیت اور حسن کارکردگی کے حامل طلبا اور طالبات کو آئی ٹی کے ہنر سے لیس کرنے کیلئے مفت لیپ ٹاپس کا پروگرام شامل کیا جائے۔وزیرِ اعظم نیہدایت کی کہ اینڈؤمنٹ فنڈ سے نوجوانوں کو اعلی و پیشہ ورانہ تعلیم اور آئی ٹی میں مہارت کی تربیت دی جائے گی۔ وظائف و تعلیم کیلئے شفافیت اور میرٹ کے عنصر کو کلیدی اہمیت دی جائے۔ بجٹ میں آئی ٹی کے فروغ کیلئے منصوبے شامل کئے جائیں۔کسان پیکیج کے تحت شروع کئے گئے منصوبے جاری رکھے جائیں۔ بجٹ میں قابل تجدید توانائی کے منصوبے شامل کئے جائیں۔ پن بجلی کے منصوبوں اور توانائی کے شعبے کی جدت کیلئے بجٹ میں خصوصی رقوم مختص کی جائے۔ ایسے منصوبے جو سست روی کا شکار ہو کر سالہا سال سے پی ایس ڈی پی میں شامل ہیں اور اپنی اہمیت کھو چکے ہیں انہیں اس کے دائرہ کار سے نکالا جائے۔ بجٹ میں ترقیاتی منصوبوں کو شامل کرتے وقت صوبوں، متعلقہ شعبے کے سٹیک ہولڈرز اور اتحادی جماعتوں کو مکمل اعتماد میں لے کر انکی تجاویز کو شامل کیا جائے۔
اجلاس کو پی ایس ڈی پی کے تحت جاری منصوبوں پر پیش رفت اور آئندہ مالی سال کیلئے منصوبوں کے حوالے سے تجاویز کے بارے تفصیلی طور پر آگاہ کیا گیا. اجلاس کو بتایا گیا کہ وزیرِ اعظم کی ہدایت پر بجٹ میں زرعی شعبے، قابل تجدید توانائی، نوجوانوں کیلئے اعلی تعلیم، پیشہ ورانہ تربیت اور روزگار کے منصوبے ترقیاتی بجٹ کا اہم حصہ ہوں گے۔اجلاس کو مزید بتایا گیا کہ آئی ٹی شعبے کی ترقی اور برآمدات میں اضافے کیلئے بھی منصوبے بجٹ کا حصہ ہوں گے۔علاوہ ازیں اجلاس کو بتایا گیا کہ گزشتہ مالی سال میں وزیرِ اعظم کے کسان پیکیج اور با اختیار نوجوان پروگرام کے ثمرات عوام تک پہنچائے گئے۔ اس حوالے سے 60 ہزار نوجوانوں کی اس وقت مختلف سرکاری ترقیاتی منصوبوں میں انٹرنشپ فراہم کی جاری ہے جبکہ گندم کی گزشتہ دس سال کی نسبت ریکارڈ پیداوار حاصل ہوئی۔ وزیرِ اعظم نے بجٹ 24۔ 2023 کے ترقیاتی منصوبوں میں ملکی درآمدات کا متبادل فراہم کرنے، برآمدات بڑھانے اور مختلف شعبوں کی جدت کے منصوبوں کو ترجیح دینے کی واضح ہدایات جاری کیں۔
نومئی کے واقعات سے نظر ہٹانے کیلیے بے بنیاد الزامات لگائے جارہے ہیں، وزیراعظم
اسلام آباد(سی ایم لنکس) وزیراعظم شہباز شریف نے کہا ہے کہ نو مئی کے واقعات سے نظر ہٹانے کے لیے اداروں پر بے بنیاد الزامات لگائے جارہے ہیں۔وزیراعظم شہباز شریف نے سماجی رابطے کی سائٹ ٹویٹر پر اپنے بیان میں کہا کہ قانون نافذکرنیوالے اداروں اور پولیس کو بدنام کرنے کی عمران نیازی کی چال کو سمجھنے میں غلطی نہ کریں، 9مئی کے واقعات سے نظرہٹانے کیلئے وہ بے بنیاد الزامات لگا رہا ہے۔انہوں نے کہا کہ جوشخص اداروں کیخلاف مسلسل غلط زبان استعمال کرتا رہا اور لوگوں کو دفاعی تنصیبات پر حملے کیلئے اکساتا رہا وہ کسی بھی حد تک جاسکتا ہے، جو شخص شہداء کی یادگاروں کو نیچے گرانے کیلئے لوگوں کو اکساتارہا وہ کسی بھی حدتک جاسکتا ہے، نفرت، جھوٹ و قوم کو تقسیم کرنے والا شخص ہے۔