Chitral Times

Dec 1, 2023

ﺗﻔﺼﻴﻼﺕ

عوام کو خدمات کی فراہمی کیلئے سرکاری ملازمین اپنے حصہ کے فرائض ایمانداری سے انجام دیں،گورنرغلام علی

شیئر کریں:

عوام کو خدمات کی فراہمی کیلئے سرکاری ملازمین اپنے حصہ کے فرائض ایمانداری سے انجام دیں،گورنرحاجی غلام علی
گورنرسے آگیگاکے صوبائی چیئرمین ناصرالدین کی قیادت میں نمائندہ وفد کی ملاقات، سرکاری ملازمین کودرپیش مسائل سے آگاہ کیا
گورنر سے نگران صوبائی وزراء حاجی منظور آفریدی اورفضل الٰہی اور عوامی نیشنل پارٹی کے رہنما سردار حسین بابک کی بھی الگ الگ ملاقات،مختلف امورپرتبادلہ خیال

 

پشاور ( چترال ٹایمز رپورٹ ) گورنرخیبرپختونخوا حاجی غلام علی نے کہاہے کہ ملکی ترقی وخوشحالی میں سرکاری ملازمین کا کردار انتہائی اہم ہے، سرکاری ملازمین ایک دوسرے پر الزام تراشی کی بجائے عوام کو خدمات کی فراہمی کیلئے اپنے اپنے حصہ کے فرائض ایمانداری سے انجام دیں۔

یہ بات انہوں نے آل گورنمنٹ ایمپلائز گرینڈ الائنس خیبرپختونخوا (آگیگا)کے صوبائی چیئرمین ناصرالدین کی قیادت میں ایک نمائندہ 20 رکنی وفد سے گورنرہاؤس میں ملاقات کے دوران کی۔ وفد میں آگیگا کے سرپرست اعلی سمیع اللہ خان خلیل، وائس چیئرمین عزیزاللہ خان، صوبائی جنرل سیکرٹری وزیرزادہ، ڈپٹی جنرل سیکرٹری زرین شاہ،اراکین ممتازعلی خان، فضل دایان، نصیرشاہ آفریدی، امجدخان ترکئی، محمدعثمان، محمدشیرخان، ہدایت الحق، نویدگل، اکرام باچا، رفاسیت قمر،محمدآصف خان آفریدی اوردیگر شامل تھے۔ وفد نے سرکاری ملازمین کے دیرینہ مسائل سے گورنر کو آگاہ کیا۔ وفد نے گورنر سے درخواست کی کہ سابق حکومت کی جانب سے پنشن اصلاحات کے نام پرجتنے بھی مراعات لئے گئے تھے ان مراعات کو واپس بحال کیاجائے۔وفدنے محکمہ صحت میں لیڈی ہیلتھ ورکرز کو دیگرصوبائی ملازمین کی طرح سروس سٹرکچردینے کابھی مطالبہ کیا۔ وفد کے شرکاء نے کابینہ سے منظورشدہ اساتذہ کیلئے اپ گریڈیشن کے معاملے پرعملدرآمد کی بھی درخواست کی جبکہ سرکاری ملازمین کو درپیش دیگر مسائل سے بھی گورنر کو آگاہ کیا اور ان کے حل کیلئے گورنرسے اپنا کردار ادا کرنے کی درخواست کی۔

 

اس موقع پر گورنرنے وفد کو یقین دلایا کہ ان کے مسائل کے حل کیلئے نگران صوبائی حکومت کے ساتھ ملکر اقدامات اٹھائے جائیں گے۔ انہوں نے کہاکہ صوبے کی سرکاری ملازمین کے مسائل کو ترجیحی بنیادوں پر حل کرنا اپنا فرض سمجھتاہوں تاکہ سرکاری اداروں سے وابستہ ملازمین بلا کسی جھجک اور ذہنی دباؤ کے اپنے فرائض سرانجام دے سکیں۔ انہوں نے کہاکہ ملک اس وقت سخت معاشی بحران سے گزر رہا ہے، صوبائی خزانہ سے بھاری رقم ملازمین کی تنخواہوں پر خرچ ہو جاتی ہے لہذا ملازمین کو بھی چاہئے کہ وہ ملک کوموجودہ مشکل حالات سے نکالنے کیلئے نہ صرف اپنا کردار ادا کریں بلکہ عوام کو خدمات کی فراہمی ایمانداری سے انجام دیں۔انہوں نے کہاکہ سرکاری ملازمین ہمارے بھائی ہیں اورتنخواہوں میں اضافے، اپ گریڈیشن اورالاؤنسز کامسئلہ درپیش ہیں تاہم ملک اورصوبہ اس وقت مشکل میں ہے، ان کومشکل حالات سے نکالنے کیلئے ہرایک کو اپنا فرض اداکرناہوگا اور یہ ارادہ کرناہوگا کہ ہم اپنی فرائض انتہائی صلاحیت اور ایمانداری کے ساتھ ادا کرتے رہیں گے۔

 

ہماری خواہش ہے کہ جو لوگ سرکاری اداروں میں ملازمتیں کررہے ہیں اوریاسرکاری ملازمتوں کے حصول کیلئے کوشش کررہے ہیں ان کے مشکلات کا حل نکالیں۔21ویں صدی بات چیت کے ذریعے مسائل کے حل کادرس دیتی ہے،ہڑتالیں، دفتروں کی تالہ بندی وقت کی ضیاع کے علاوہ کچھ نہیں، مہذب طریقے سے ان تمام مسائل کاحل نکالاجائیگا۔ بعد ازاں گورنر سے نگران صوبائی وزیر ایکسائز، ٹیکسیشن اینڈ نارکاٹیکس کنٹرول حاجی منظور آفریدی اور نگران صوبائی وزیر آبپاشی فضل الٰہی اور عوامی نیشنل پارٹی کے رہنما سردار حسین بابک نے بھی گورنر ہاؤس میں الگ الگ ملاقات کی، گورنر کو عید کی مبارکباد پیش کی اورحکومتی و محکمانہ امور سمیت مختلف امور پر تبادلہ خیال کیا۔

chitraltimes governor kp meeting with agega delegation 2


شیئر کریں: