وفاقی وزیر سینیٹر محمد اسحاق ڈار کی زیر صدارت حج پالیسی 2023ء کے جائزہ اجلاس کا انعقاد
وفاقی وزیر سینیٹر محمد اسحاق ڈار کی زیر صدارت حج پالیسی 2023ء کے جائزہ اجلاس کا انعقاد
اسلام آباد(چترال ٹایمز رپورٹ )وفاقی وزیر سینیٹر محمد اسحاق ڈار کی زیر صدارت حج پالیسی 2023ء سے متعلق جائزہ اجلاس کا انعقاد ہفتہ کو یہاں وزارت خزانہ میں ہوا۔ وفاقی وزیر مذہبی امور و بین المذاہب ہم آہنگی مفتی عبدالشکور، وزیر اعظم کے معاون خصوصی برائے فنانس طارق باجوہ، سپیشل سیکرٹری فنانس اور وزارت خزانہ و وزارت مذہبی امور کے اعلی حکام نے بھی اجلاس میں شرکت کی۔وزارت خزانہ کی جانب سے جاری اعلامیہ کے مطابق اجلاس کے شرکاء کو حج پالیسی 2023ء پر بریفنگ دی گئی اور بتایا گیا کہ رواں سال پاکستان سے کتنے عازمین حج کی درخواستوں کی وصولی متوقع ہے۔ اجلاس کو یہ بھی بتایا گیا کہ رواں سال تقریباً ایک لاکھ 79 ہزار پاکستانی حج کی سعادت حاصل کریں گے۔ وفاقی وزیر مذہبی امور و بین المذاہب ہم آہنگی مفتی عبدالشکور نے وفاقی وزیر خزانہ کو زرمبادلہ کے بعض مسائل کے حوالہ سے آگاہ کیا اور ان کی معاونت طلب کی۔وزیر خزانہ سینیٹر محمد اسحاق ڈار نے کہا کہ حج ایک مذہبی فریضہ ہے جو ہر صاحب حیثیت مسلمان کو ادا کرنا چاہئے اور ہم اللہ کے فضل و کرم سے اپنا کردار بخوبی ادا کریں گے۔ وزیر خزانہ نے حج کے مذہبی ایونٹ کو کامیاب بنانے اور عازمین حج کو ہر طرح کے مکمل تعاون کی فراہمی کا اعادہ کیا۔ وفاقی وزیر مذہبی امور نے وزیر خزانہ کے تعاون پر ان سے اظہار تشکر بھی کیا۔
وفاقی وزیر خزانہ سینیٹر محمد اسحاق ڈار سے وفاقی وزیر مذہبی امور و بین المذاہب ہم آہنگی کی ملاقات
اسلام آباد(سی ایم لنکس)وفاقی وزیر خزانہ سینیٹر محمد اسحاق ڈار سے وفاقی وزیر مذہبی امور و بین المذاہب ہم آہنگی مفتی عبدالشکور نے ملاقات کی ہے۔ وزارت خزانہ کے ٹویٹ کے مطابق اس موقع پر حج پالیسی 2023ء پر تبادلہ خیال کیا گیا۔ ملاقات کے دوران حج کو پرامن اور کامیاب بنانے کے عزم کا اعادہ کیا گیا۔