Chitral Times

Apr 16, 2024

ﺗﻔﺼﻴﻼﺕ

پشاور ہائی کورٹ کا قومی اسمبلی کی نشستوں پر ضمنی انتخابات ملتوی کرنے کا حکم

Posted on
شیئر کریں:

پشاور ہائی کورٹ کا قومی اسمبلی کی نشستوں پر ضمنی انتخابات ملتوی کرنے کا حکم

پشاور(چترال ٹایمز رپورٹ)پشاور ہائی کورٹ نے 16 اور 19 مارچ کو قومی اسمبلی کی نشستوں پر ہونے والے ضمنی انتخابات ملتوی کرنے کا حکم جاری کرتے ہوئے فریقین کو نوٹس جاری کردیا۔ اسپیکر قومی اسمبلی راجہ پرویز اشرف کی جانب سے پی ٹی آئی ارکان اسمبلی کے استعفوں کی منظوری کے خلاف اور ضمنی الیکشن ملتوی کرنے کے لیے دائر درخواستوں پر سماعت ہوئی جس میں عدالت نے پہلے سے محفوظ کیا گیا فیصلہ سنا دیا۔پشاور ہائی کورٹ نے اپنے فیصلے میں قومی اسمبلی کی نشستوں پر ضمنی انتخابات ملتوی کردیئے۔ عدالت نے 16 اور 19 مارچ کو ہونے والے ضمنی انتخابات کا الیکشن شیڈول معطل کرنے کا حکم جاری کرتے ہوئے فریقین کو نوٹس جاری کردیا۔ بعد ازاں عدالت نے سماعت 7 مارچ تک ملتوی کردی۔واضح رہے کہ خیبرپختونخوا کی مجموعی طور پر 24 نشستوں پر ضمنی انتخابت ہونے تھے۔

 

یونان اور قبرص سے ڈی پورٹ 171 پاکستانیوں کو 8 مارچ کو لایا جائیگا

اسلام آباد(سی ایم لنکس)یونان اور قبرص سے ڈی پورٹ 171 پاکستانیوں کو 8 مارچ کو پاکستان لایا جائے گا۔پاکستان سے غیرقانونی طور پر یورپی ممالک جانے کی کوشش کے دوران گرفتار کیے گئے 171 پاکستانیوں کو 8 مارچ کو وطن واپس بھیجا جا رہا ہے۔یونان اور قبرص سے ڈی پورٹ 171 پاکستانیوں کو 8 مارچ کو یورپی یونین اسٹیٹ پولیس کی نگرانی میں خصوصی پرواز سے نیو اسلام آباد ایئرپورٹ لایا جائے گا۔مختلف الزامات کے تحت ڈی پورٹ ہونے والے ان افراد کے لیے چارٹر پرواز آپریٹ کی جائے گی۔وزارتِ داخلہ نے ڈی جی ایف آئی اے کو ڈی پورٹ افراد کے حوالے سے مراسلہ جاری کیا ہے۔مراسلے میں متعلقہ حکام کو ہدایت کی گئی ہے کہ وہ پاکستانی سفارتخانے سے جاری سفری دستاویزات کے حامل پاکستانیوں کو ہی امیگریشن کی اجازت دیں۔یہ بھی ہدایت جاری کی گئی ہے کہ سفری دستاویزات کے بغیر غیر مصدقہ افراد کو اسی پرواز سے یونان واپس روانہ کیا جائے اور پاکستانی سفارتخانے سے جاری فہرست میں شامل افراد کے علاوہ کوئی نیا مسافر قبول نہ کیا جائے۔ذرائع کے مطابق ڈی پورٹ کیے گئے پاکستانی غیر قانونی طریقے اور مختلف ذرائع سے یورپی ممالک جانے کی کوشش کے دوران مختلف اوقات میں گرفتار کیے گئے۔


شیئر کریں:
Posted in تازہ ترین, جنرل خبریںTagged
72118