Chitral Times

Feb 5, 2023

ﺗﻔﺼﻴﻼﺕ

حج پالیسی 2023، سستے حج پیکیج میں مشکلات کا سامنا،سرکاری حج سکیم کے اخراجات میں اضافہ کا امکان

Posted on
شیئر کریں:

حج پالیسی 2023، سستے حج پیکیج میں مشکلات کا سامنا، سرکاری حج سکیم کے اخراجات میں اضافہ کا امکان

اسلام آباد( چترال ٹایمز رپورٹ )حج پالیسی 2023 کا اعلان فروری کے آخر تک متوقع ہے،سعودی عرب نے65 سال سے زائد عمر کے افراد پر پابندی ختم کر دی ہے۔ وزارت مذہبی امور کے ذرائع کے مطابق رواں سال پاکستان اور سعودی عرب سمیت عالمی اقتصادی صورتحال اور روپیہ کی گراوٹ کے باعث سستے حج پیکیج میں مشکلات کا سامنا ہے جس کی وجہ سے سرکاری حج سکیم کے اخراجات میں گذشتہ سال کے مقابلے میں اضافہ کی توقع ہے۔ رواں سال وزارت مذہبی امور کو حج سبسڈی ملنے کا بھی کوئی امکان نہیں ہے۔تمام حج درخواست گذاروں کیلئے بینک اکاؤنٹ ہونا لازم ہو گا۔ اس کے علاوہ حج درخواست کیلئے کار آمد پاسپورٹ، 3 تصاویر، کرونا سرٹیفیکیٹ، اپنا اور وارث کا شناختی کارڈ لازم ہو گا۔ وزارت مذہبی امور نے ایئرلائنز، بینکوں، سعودی حکام اور دیگر سٹیک ہولڈرز سے رابطے تیز کر دیئے ہیں۔حج درخواستوں کی وصولی کیلئے شیڈول بینکوں سے جلد معاہدے کا امکان ہے۔

حکومت نے توشہ خانہ کی معلومات مشتہر کرنے کی منظوری دیدی

اسلام آباد(سی ایم لنکس)وفاقی کابینہ نے توشہ خانہ سے متعلق معلومات اور ڈیٹا پبلک کرنے کی منظوری دے دی۔وزیراعظم شہباز شریف کی زیر صدارت وفاقی کابینہ کا اجلاس ہوا جس میں توشہ خانہ سے متعلق نظر ثانی شدہ پالیسی کی منظوری دی گئی۔اجلاس میں نئی پالیسی کو کلاسیفائیڈ نہ رکھنے کا فیصلہ کرتے ہوئے معلومات عوام کے سامنے لانے کی منظوری دے دی گئی۔نئی پالیسی کے مطابق تحفہ حاصل کرنے والی شخصیت اصل قیمت ادا کر کے تحفہ حاصل کر سکے گی۔اجلاس میں وزیر توانائی خرم دستگیر نے بجلی بریک ڈاؤن پر بریفنگ بھی دی۔ بجلی بریک ڈاؤن پر وفاقی کابینہ نے سخت اظہار برہمی کیا۔ وزیراعظم نے کہا کہ ذمہ داران کے خلاف کارروائی کی جائے۔کابینہ اجلاس میں ای سی سی اور لیجیسلیٹو کمیٹی کے فیصلوں، توانائی بچت سے متعلق میڈیا کمپین کی منظوری دی جائیگی۔


شیئر کریں: