Chitral Times

Jan 21, 2022

ﺗﻔﺼﻴﻼﺕ

پختونخوا انرجی ڈویلپمنٹ آرگنائزیشن (پیڈو) کے پالیسی بورڈ کاوزیراعلیٰ کے زیرصدارت اجلاس

شیئر کریں:

پشاور ( چترال ٹائمز رپورٹ ) وزیراعلیٰ خیبرپختونخوا محمود خان نے پختونخوا انرجی ڈویلپمنٹ آرگنائزیشن کی مجموعی کارکردگی رپورٹ طلب کرتے ہوئے متعلقہ حکام کو ہدایت کی ہے کہ ادارے کی مجموعی کارکردگی سے متعلق جملہ تفصیلات پیڈو پالیسی بورڈ کے اگلے اجلاس میں پیش کی جائیں ۔ اُنہوںنے متعلقہ حکام کو یہ بھی ہدایت کی ہے کہ پختونخوا انرجی ڈویلپمنٹ آرگنائزیشن اور ہائیڈل ڈویلپمنٹ فنڈ کے جملہ معاملات میں اصلاحات اوراِن کی استعدادکار میں بہتری کیلئے متعلقہ قوانین میں ضروری ترامیم کیلئے بھی اقدامات اُٹھائے جائیں۔


وہ گزشتہ روزپختونخوا انرجی ڈویلپمنٹ آرگنائزیشن کے نویں پالیسی بورڈ اجلاس کی صدارت کر رہے تھے ۔ وزیراعلیٰ کے معاون خصوصی برائے توانائی صاحبزادہ سعید، ایڈیشنل چیف سیکرٹری شہاب علی شاہ، سیکرٹری خزانہ اکرام اﷲ، سیکرٹری توانائی سید امتیاز حسین شاہ، سیکرٹری قانون عابد مجیداور پیڈو کے چیف ایگزیکٹیو آفیسر محمد نعیم کے علاوہ بورڈ کے دیگر ممبران نے بھی اجلاس میں شرکت کی ۔ اجلاس میں بورڈ کے گزشتہ اجلاس کی روداد کی توثیق کی گئی جبکہ پیڈو کے نظر ثانی شدہ بجٹ برائے مالی سال 2020-21 اور بجٹ تخمینہ جات برائے مالی سال 2021-22 پر تفصیلی غور خوض کے بعد فیصلہ کیا گیا ہے کہ معاملہ متعلقہ فنانس کمیٹی کی جانچ پڑتال کے بعد حتمی منظوری کیلئے بورڈ کے اگلے اجلاس میں پیش کیا جائے۔


اجلاس میں پیڈو کے تحت پن بجلی کے متعدد منصوبوں کیلئے عارضی آسامیوں کی منظوری کا معاملہ بھی ضروری اسکروٹنی کیلئے متعلقہ کمیٹی کے حوالے کیا گیا ۔ اجلاس میں صوبہ بھر میں پیڈو کے تحت قائم کئے گئے منی مائیکرو ہائیڈل پاور اسٹیشنز کو پائیدار بنیادوں پر چلانے اور اُن کے بہتر انتظام و انصرام کیلئے یکساں طریقہ کار وضع کرنے کیلئے پیڈو حکام کو ایک پالیسی تشکیل دینے کیلئے ضروری اقدامات کی ہدایت کی گئی ۔


اسی طرح اجلاس میں پیڈو بورڈ کے ایک نجی ممبر کے استعفےٰ کا معاملہ صوبائی کابینہ کے اجلاس میں پیش کرنے کی منظوری دیتے ہوئے متعلقہ حکام کو ہدایت کی گئی کہ مستعفی ہونے والے ممبر کی جگہ بلا تاخیر نئی تعیناتی کیلئے اُمیدواروں کے ناموں کا پینل بھی کابینہ کے سامنے پیش کیا جائے۔

وزیراعلیٰ خیبرپختونخوا محمود خان کا شمالی وزیرستان میں سیکورٹی فورسز اورپولیس پر حملوں کی مذمت، اہلکاروں کی شہادت پر تعزیت کا اظہار

پشاور ( چترال ٹائمز رپورٹ ) وزیراعلیٰ خیبرپختونخوا محمود خان نے شمالی وزیرستان میں سکیورٹی فورسز اور پولیس پر حملوں کی مذمت کرتے ہوئے ان حملوں میں سکیورٹی فورسز اور پولیس کے دو اہلکاروں کی شہاد ت پر تعزیت کا اظہار کیا ہے ۔ یہاں سے جاری اپنے ایک بیان میں وزیراعلیٰ نے شہداءکے اہل خانہ سے دلی ہمدردی کا اظہار کرتے ہوئے شہداءکے درجات کی بلندی اور پسماندگان کیلئے صبر جمیل کی دُعا کی ہے۔ دریں اثناءوزیراعلیٰ نے لکی مروت میں نامعلوم افراد کی فائرنگ سے ایک انٹیلی جنس اہلکار کی شہادت پر بھی تعزیت کا اظہار کیا ہے ۔ وزیراعلیٰ نے شہید کے اہل خانہ سے دلی ہمدردی کا اظہار کرتے ہوئے شہید کے درجات کی بلندی اور پسماند گان کیلئے صبر جمیل کی دُعا کی ہے ۔


شیئر کریں: