Chitral Times

Aug 13, 2022

ﺗﻔﺼﻴﻼﺕ

چترال؛ مذہبی ہم آہنگی حوالے کھلی کچہری، آئمہ مساجد و کالاش قاضیوں میں وضائف کے چیک تقسیم

شیئر کریں:

چترال (نمائندہ چترال ٹائمز) وزیر اعلیٰ خیبر پختونخوا کے معاون خصوصی وزیر زادہ نے کہاہے کہ بمبوریت، بریر اور رمبور کی وادیوں میں کالاش اور مسلم کمیونٹی کے درمیان اتحاد ویگانگت اور ہم آہنگی کا مثالی ماحول موجود ہے جس کی وجہ سے کالاش اقلیت کو ترقی کرنے اور آگے بڑھنے کے مساوی مواقع حاصل ہیں اور یہی وجہ ہے کہ آج کالاش کی نوجوان نسل بھی تعلیم سمیت زندگی کے مختلف شعبوں میں بڑی تعداد میں نظر آرہے ہیں۔


بدھ کے روز ٹاؤن ہال چترال میں منعقدہ ‘مذہبی ہم آہنگی ‘کے حوالے سے کھلی کچہری سے خطاب کرتے ہوئے انہوں نے اس بات پر اطمینان کا اظہار کیاکہ کالاش کمیونٹی کی قدیم ترین تہذیب وثقافت کو ان کے مسلمان بھائیوں کو کوئی خطرہ لاحق نہیں ہے بلکہ خطرے کے وقت ان کی مدد کے لئے بھی حاضر ہوئے ہیں۔ انہوں نے کہاکہ پی ٹی آئی حکومت نے اقلیتوں کو ان کا حقوق دلوانے اور ترقی سے ہمکنار کرنے میں کوئی کسر نہیں چھوڑی اور ان فلاح وبہبود کے لئے کئی ایک انقلابی اقدامات کئے ہیں جن کے نتائج سامنے آنا شروع ہوگئے ہیں۔
انہوں نے کہاکہ آئمہ مساجد کے لئے وظائف کا اجراء بھی اسی حکومت کی انقلابی کاموں میں سے ایک ہے جس سے لاکھوں خاندان مستفید ہوں گے جبکہ کالاش کمیونٹی کے مذہبی پیشوا ؤں کو بھی وظائف دئیے جارہے ہیں۔ وزیر زادہ نے اس موقع پرمسلم کمیونٹی کے 409 آئمہ مساجد ، 73 کالاش مردو خواتین قاضیوں اور کرسچن کمیونٹی کے 2 فادر میں چیک تقسیم کئے اور ان کو مبارکباد دی ۔ انہوں نے کہا ۔ کہ عمران خان نے سکول و کالجوں میں قرآن پاک کو لازمی قرار دیا ہے ۔انہوں نے کہا ۔ کہ جن آئمہ کرام کا نام رجسٹرڈ نہیں ہے ۔ انکو رجسٹرڈ کرنے کے بعد یہ اعزازیہ انہیں بھی دیا جائے گا ۔ چترال میں ساٹھ مساجد میں سولر پینل لگائے جارہے ہیں

قبل ازین کھلی کچہری سے خطاب کرتے ہوئے ڈسٹرکٹ بار ایسوسی ایشن چترال کےصدر نیاز اے نیازی ایڈوکیٹ نے مطالبہ کیا ۔ کہ اسماعیلی کمیونٹی کے جماعت خانوں کے مشنری اورمکھی حضرات کو بھی اعزازیہ دیا جائے ۔

پی ٹی آئی ضلعی صدر سجاد احمد، ودیگر رہنماوں کے علاوہ اسسٹنٹ کمشنر چترال ثقلین سلیم اورمختلف سرکاری محکمہ جات کے افسران بھی اس موقع پر موجود تھے۔

chitraltimes wazir zada giving away cheque to religious leader chitral
chitraltimes wazir zada giving away cheque to aima kiram townhall

شیئر کریں: