Chitral Times

Dec 6, 2021

ﺗﻔﺼﻴﻼﺕ

انسداد پولیوکے موثر اقدامات پر صوبائی صحت کے محکموں اور ضلعی انتظامیہ کو خراج تحسین۔ وزیراعظم

شیئر کریں:

اسلام آباد(چترال ٹائمز رپورٹ)وزیر اعظم عمران خان نے انسداد پولیو کے 2 سالہ نیشنل ایمرجنسی ایکشن پلان کی منظوری دیتے ہوئے کہا ہے کہ ہم سب نے مل کر پولیو وائرس کا خاتمہ کرنا ہے،بین الاقوامی برادری کو پولیو کے خاتمے میں افغانستان کی بھی مدد کرنی چاہیئے۔ ان خیالات کااظہار وزیراعظم نے اپنی زیر صدارت قومی ٹاسک فورس برائے انسداد پولیو کے اجلاس میں گفتگوکرتے ہوئے کیا۔اجلاس میں وزیر اعظم نے انسداد پولیو کے موثر اقدامات پر صوبائی صحت کے محکموں اور ضلعی انتظامیہ کو خراج تحسین پیش کرتے ہوئے بین الاقوامی شراکت داروں کا مالی اور تکنیکی امداد پر شکریہ اداکیا۔

وزیراعظم نے کہا کہ موسم سرما میں پولیو کے پھیلاو کی شرح کم ہوتی ہے اور بچوں کی ایمونائزیشن کے لیے یہی موزوں ترین وقت ہوتا ہے۔ ہم سب نے مل کر پولیو وائرس کا خاتمہ کرنا ہے۔ انہوں نے کہاکہ بین الاقوامی برادری کو پولیو کے خاتمے میں افغانستان کی بھی مدد کرنی چاہیئے تا کہ ہنگامی صورتحال سے بچا جا سکے۔وزیراعظم نے ہدایت کی کہ بچوں کے دیگر ایمونائزیشن پروگرامز کو بھی انسداد پولیو مہم کے ساتھ چلایا جائے تاکہ زیادہ سے زیادہ کوریج حاصل کی جاسکے۔ اجلاس کو بتایا گیا کہ اگلے پانچ سالوں کے لیے 798.6 ملین ڈالر کا PC-I منظوری کے لیے تیار ہے جس میں بین الاقوامی اداروں اور حکومت پاکستان کی مالی معاونت شامل ہے۔اجلاس کو آگاہ کیا گیا کے سال 2020 میں پولیو کے 84 کیس رپورٹ ہوئے جبکہ گزشتہ دس ماہ میں کوئی کیس رپورٹ نہیں ہوا جو پاکستان کی انسداد پولیو کے حوالے سے بڑی کامیابی ہے۔

اجلاس کو آگاہ کیا گیا کے پاکستان میں پولیو وائرس افغان مہاجرین کے ذریعے داخل ہوتا ہے۔ اجلاس کو بتایا گیا کے پاکستان کو 36 ماہ کا عرصہ بغیر کسی پولیو کیس کے رپورٹ ہوئے مکمل کرنے کے بعد ولڈ ہیلتھ آرگنائزیشن کی طرف سے ”پولیو فری ”سرٹیفیکیٹ حاصل ہو جائے گا۔انجنئیر ان چیف پاکستان آرمی نے اجلاس کو پولیو ٹیموں کو فراہم کر دہ سکیورٹی کے حوالے سے آگاہ کیا۔بین الاقوامی اداروں کے نمائندوں نے انسداد پولیو مہم کی موثر قیادت پر وزیر اعظم کا شکریہ ادا کیا اور مکمل تعاون کے عزم کا اظہار کیا۔بین الاقوامی اداروں کے نمائندوں کا حکومت پاکستان کے انسداد پولیو اقدامات پر مکمل اعتماد کا اظہار کیا گیا۔

ٹاسک فورس کے اجلاس میں معاون خصوصی ڈاکٹر فیصل سلطان، گورنر خیبر پختونخوا شاہ فرمان، وزیر اعلی پنجاب سردار عثمان بزدار، وزیر اعلی خیبرپختونخوا محمود خان، وزیر اعلی گلگت بلتستان خالد خورشید، وزیر صحت بلوچستان سید احسن شاہ، وزیر اعظم آزاد جموں و کشمیر سردار عبدالقیوم خان نیازی، انجنئیر ان چیف پاکستان آرمی لیفٹیننٹ جنرل معظم اعجاز، تمام چیف سیکریٹریز، ڈبلیو ایچ او، یوینسف، سی ڈی سی، گاوی، بل اینڈ ملینڈا گیٹس فاونڈیشن اور روٹری انٹرنیشنل کے اعلی حکام اور سینئر سرکاری افسران کی شرکت۔


شیئر کریں: