Chitral Times

Sep 24, 2021

ﺗﻔﺼﻴﻼﺕ

عالمی بینک کے وائس پریذیڈنٹ کا روڈ انفراسٹرکچر، دیہی و سیاحت کی ترقی میں تعاون پر اتفاق

شیئر کریں:

عالمی بینک کے وائس پریذیڈنٹ کا صوبے کے روڈ انفراسٹرکچر،دیہی و سیاحت کی ترقی میں تعاون پر اتفاق

پشاور ( چترال ٹائمز رپورٹ ) وزیر اعلیٰ خیبر پختونخوا محمود خا ن نے ہفتہ کے روز جنوبی ایشیاءکے لئے عالمی بینک کے وائس پریذیڈنٹ ہارٹ وگ شیفر اور ان کی ٹیم کے ساتھ بذریعہ ویڈیو لنک ایک اجلاس میں شرکت کی۔ اجلاس میں صوبے میں عالمی بینک کی معاونت سے مختلف شعبوں میں ترقیاتی منصوبوں سے متعلق امور پر تبادلہ خیال کیا گیا۔ قائم مقام چیف سیکرٹری ظفر علی شاہ، وزیراعلیٰ کے پرنسپل سیکرٹری امجد علی خان، سیکرٹری منصوبہ بندی و ترقی عامر ترین ، عالمی بینک کے کنٹری ڈائریکٹر نجے بن حسین اور دیگر متعلقہ حکام بھی اجلاس میں شریک تھے۔

اس موقع پر صوبے میں روڈ انفراسٹرکچر، دیہی ترقی، زراعت ، سیاحت، پن بجلی اور دیگر سماجی شعبوں میں اہم نوعیت کے ترقیاتی منصوبوں پر عملدرآمد کے لئے تعاون کے دائرہ کار کو مزید وسعت دینے پر اتفاق کیا گیا۔ اپنی گفتگو میں وزیراعلیٰ نے صوبے کی سماجی و اقتصادی ترقی میں عالمی بینک کے تعاون کو سراہتے ہوئے کہا کہ صوبائی حکومت اور صوبے کے عوام عالمی بینک کے تعاون کو انتہائی قدر کی نگاہ سے دیکھتے ہیں۔ انہوں نے کہا کہ عالمی بینک صوبے میں اہم نوعیت کے ترقیاتی منصوبوں پر عملدرآمد کے سلسلے میں صوبائی حکومت کا قابل اعتماد پارٹنر ہے۔ وزیراعلیٰ کا کہنا تھا کہ صوبائی حکومت اگلے دو سالوں کے اندر صوبے میں عوامی مفاد کے اہم ترقیاتی منصوبوں پر عملدرآمد اور ان کی تکمیل کےلئے لائحہ عمل ترتیب دیا ہے، جس پر عملدرآمد سے صوبے کے عوام کی زندگیوں میں واضح تبدیلی آئے گی۔

چشمہ رائٹ بینک لفٹ کینال کو صوبے کی فوڈ سیکیورٹی کے لئے ناگزیر منصوبہ قرار دیتے ہوئے وزیراعلیٰ نے کہا کہ صوبائی حکومت ہر قیمت پر اس منصوبے کو عملی جامہ پہنانا چاہتی ہے اور اس مقصد کے لئے انٹر نیشنل ڈونرز کے ساتھ اشتراک سمیت دیگر تمام دستیاب آپشنز پر غور کیا جارہا ہے۔

اس موقع پر گفتگو کرتے ہوئے جنوبی ایشیا کے لئے عالمی بینک کے وائس پریذیڈنٹ ہارٹ وگ شیفر نے روڈ انفراسٹرکچر، دیہی ترقی، پن بجلی اور دیگر سماجی شعبوں میں صوبائی حکومت کے ساتھ تعاون کے دائرہ کار کو مزید بڑھانے کے عزم کا اظہار کرتے ہوئے صوبے میںعالمی بینک کے تعاون سے جاری ترقیاتی منصوبوں اور عوامی فلاح و بہبود کے کاموں پر تیز رفتار عملدرآمد کے سلسلے میں صوبائی حکومت کی تعریف کی۔

انہوں نے بڑ ے پیمانے پر اصلاحات کے نفاذ کے سلسلے میں خیبرپختونخوا کو ملک کا پہلا صوبہ قرار دیتے ہوئے اس سلسلے میں وزیراعلیٰ محمود خان اور ان کی پوری ٹیم کو سراہااور کہا کہ مختلف شعبوں میں وسیع پیمانے پر کامیاب اصلاحاتی عمل کے لئے وزیراعلیٰ اور ان کی ٹیم مبارکباد کے مستحق ہےں۔ انہوں نے یقین دلایا کہ عالمی بینک صوبے میں سماجی و اقتصادی ترقی کے لئے صوبائی حکومت کے ساتھ تعاون کا سلسلہ مزید بہتر انداز میں جاری رکھے گا۔

دریںاثنا وزیر اعلی خیبر پختونخوا محمود خان نے نے کورونا سے متاثرہ ایوب میڈیکل کمپلیکس کے ڈاکٹر احسان الحق کے انتقال پر افسوس کا اظہار کرتے ہوئے لواحقین سے تعزیت کی ہے۔ یہاں سے جاری اپنے تعزیتی بیاں میں وزیر اعلی نے مرحوم کے اہل خانہ سے دلی ہمدردی کا اظہار کرتے ہوئے مرحوم کی معفرت اور پسماندگان کے لئے صبر جمیل کی دعا کی ہے، انہوں نے کہا ہے کہ کورونا وبا میں ڈاکٹروں سمیت دیگر طبی عملے کی خدمات قابل ستائش ہیں اور صوبائی حکومت ان کی خدمات کو قدر کی نگاہ سے دیکھتی ہے۔


شیئر کریں: