صادق اللہ صادق مرحومو یاداچھترارا تعزیتی نشست
مرکزی انجمن ترقی کھوارو غیچدارائیہ ہنون چترال پریس کلبہ کھوار زبانو شاعر وا ادیب وا انجمنو سابق سینئر نائب صدر جناب صادق الله صادق مرحومو یادا ای تعزیتی نشست ہوئے۔ ہیہ نشستو صدارتو جناب پروفیسر اسرالدین صاحب اریر وا سورچی مینو حیثیتہ تشریف لاکھی استائے صادق مرحومو برار جناب مینیجر ظہیراللہ صاحب۔ جناب پروفیسر ہمایون رومی صاحب ہیہ نشستو مہمانِ اعزاز اوشوئے۔
تعزیتی نشستہ صادق مرحومو خاندانو افراد، ہتوغو ژیژاؤ، ہتوغو یار دوستان وا بو امبوخ علمی وا ادبی شخصیات شامل اسیتانی۔ ہیہ موقعا مقررین وا شعراء تان احساساتان بیانو وا خیالاتان اظہارو تقریری، شعری وا مقالہ صورتہ پیش ارینی۔ صادق الله صادق مرحومو زندگیو وا ادبی خدماتان تحریرا سومئے ای خاص مقالہ جناب استاد جاوید حیات صاحب پیش اریر۔ ہیغار علاوه ہمی شخصیات تان احساساتان بیانو وا خیالاتان اظہارو ارینی: ارشاد عالم مکرر، صوبیدار بہادر الله، مولانا اسرارالدین الہلال، مئیر تنظیمو صدر فرید احمد رضا، سینئر صحافی شاہ مراد بیگ، عنایت الله اسیر، پروفیسر شفیق احمد، ݯھترار یونیورسٹیو پرووسٹ پروفیسر ڈاکٹر تاج الدین شرر، مینیجر ظہیر الله وا پروفیسر اسرارالدین صاحب۔
صادق مرحومو یادا ہمی شعراء مرثیہ کلام پیش ارینی: ذوالفقار ذلفی، فدا محمد فدا، عبدالغنی خان دول، محمد شریف عروج وا سید الرحمن سیدی۔
تان صدارتی خطبا صدرِ محفل جناب پروفیسر اسرارالدین صاحب زبان و ادبوتے خدمات گار رویان یادا وا ہتیتان خدماتان اعترافہ ہموݰ نشستان روایتو برقرار بہچئیکو سورا زور پرائے۔
اخیرا صادق الله مرحومو روحوتین ایصال ثوابو بچین اجتماعی فاتحہ خوانی وا دعو سورا ہیہ نشست پوروزیتائے۔ (ظہورالحق دانش)
