Chitral Times

May 28, 2022

ﺗﻔﺼﻴﻼﺕ

قومی اسمبلی میں وزیراعظم نے جراتمندانہ اوردلیرانہ خطاب کرکے تاریخ رقم کی ۔ وزیراعلیٰ

شیئر کریں:

قومی اسمبلی میں وزیراعظم کاخطاب

پشاور ( چترال ٹائمز رپورٹ ) وزیر اعلی خیبر پختونخوا محمود خان نے قومی اسمبلی میں وزیر اعظم عمران خان کے خطاب کو جراتمندانہ اور دلیرانہ خطاب قرار دیتے ہوئے کہا ہے کہ وزیراعظم نے اپنے خطاب میں ایک تاریخ رقم کردی ہے اور ان کے ایک جامع، موثر اور مدلل خطاب نے پوری قوم کا سر فخر سے بلند کیا ہے۔ اس سلسلے میں یہاں سے جاری اپنے ایک بیان میں وزیر اعلی نے کہا ہے کہ وزیراعظم نے اپنے اس تاریخی خطاب کے ذریعے قوم کے لئے ایک با وقار انداز میں جینے کا راستہ متعین کردیا ہے۔ انہوں نے کہا کہ وزیر اعظم کے خطاب نے قوم کو امید دی ہے اور ان کی ولولہ انگیز قیادت میں انصاف، انسانیت، خود داری اور قومی وقار کے سنہرے اصولوں کے مطابق نیا پاکستان دنیا کے نقشے پر ابھر رہا ہے۔ وزیر اعلی کا کہنا تھا کہ ماضی کے لیڈروں نے ملکی خود داری کے سودے کئے اور ملکی عزت کو گروی رکھ کر ذاتی مفادات حاصل کئے۔ انہوں نے کہا کہ وزیر اعظم نے ملکی وقار کے لئے پر خطر راستوں کا انتخاب کیا ہے لیکن اللہ تعالیٰ خود پر بھروسہ کرنے والوں کو مایوس نہیں کرتا، اب قوم کو ملک کی خودداری اور عزت وقار کے لئے اٹھ کھڑا ہونا ہوگا۔ وزیر اعلی کا مزید کہنا تھا کہ ملک کو گروی رکھنے والوں کا کڑا احتساب ہوگا اور ملک کو ریاست مدینہ بنانے کا خواب عمران خان کی قیادت میں شرمندہ تعبیر ہوگا۔
<><><><><><>

اسپورٹس جرنلسٹس نے قابل قدر خدمات انجام دی ہیں۔وزیراعلیٰ


پشاور ( چترال ٹائمز رپورٹ )وزیر اعلیٰ خیبر پختونخوا محمود خان نے کہا ہے کہ کھیلوں کی سرگرمیوں کو فروغ دینے کے سلسلے میں اسپورٹس جرنلسٹس کا کلیدی کردار ہے، صوبہ خیبر پختونخوا میں کھیلوں کی سرگرمیوں کو اجاگر کرنے میں اسپورٹس جرنلسٹس نے قابل قدر خدمات انجام دی ہیں صوبائی حکومت کھیلوں کے شعبے سے وابستہ صحافیوں کی فلاح و بہبود کے لئے ہر ممکن اقدامات اٹھائے گی۔ ان خیالات کا اظہار انہوں نے ورلڈ اسپورٹس جرنلسٹس ڈے کے حوالے سے یہاں سے جاری ایک پیغام میں کیا۔ وزیر اعلیٰ نے کہا کہ اس دن کو منانے کا مقصد کھیلوں کے فروغ کے لیے صحافیوں کے کردار کا اعتراف کرنا ہے اور کھیلوں کے فروغ کے لیے ان کی کاوشوں کو سراہنا ہے۔ وزیر اعلیٰ کا کہنا تھا کہ کھلاڑیوں کی حوصلہ افزائی اور ان کو درپیش مسائل کے حل میں بھی اسپورٹس جرنلسٹس کا کردار نہایت اہم ہے۔ انہوں نے امید ظاہر کی ہے کہ صوبے میں کھیلوں کی سرگرمیوں کو قومی اور بین الاقوامی سطح پر اجاگر کرنے میں اسپورٹس جرنلسٹس اپنا اہم کردار مزید موثر انداز میں ادا کریں گے۔
َِ<><><><><><>

وزیراعلیٰ کی معاون خصوصی وزیرزادہ سے اظہار تعزیت

پشاور ( چترال ٹائمز رپورٹ ) وزیر اعلی خیبر پختونخوا محمود خان معاون خصوصی برائے اقلیتی امور وزیر زادہ کے چچا کے انتقال پر افسوس کا اظہار کرتے ہوئے لواحقین سے تعزیت کی ہے۔


یہاں سے جاری اپنے تعزیتی بیان میں وزیر اعلی نے اہل خانہ سے دلی ہمدردی کا اظہار کرتے ہوئے مرحوم کی معفرت اور پسماندگان کے لئے صبر جمیل کی دعا کی ہے۔یادرہے کہ وزیرزادہ کا چچااسلام قبول کرچکے تھے۔


شیئر کریں: