Chitral Times

Mar 3, 2021

ﺗﻔﺼﻴﻼﺕ

تان نان تتان عزت وا ادب کوریکو بچین ہمی 35 کورمان خامخہ کورور…(خسرو حیات کاکاخیل)

شیئر کریں:


1۔ نان تتان سم اسیکہ تان موبائیلو دُودیری لاکھور

2۔ تان ہاردیو کارین تان نن تتان لوان کار کورور۔

3۔ ہیتان لوانتے اہمیت دیور ۔

4۔ ہمیش ہیتان مشقولیو موژی شامل بور۔

5۔ ہمیش ہیتان عزتو غیچھین لوڑور۔

6۔ ہیتان پروشٹہ ادبو سم روپھور  وا نیشور.

7. ہمیش جام لوان تان ہیتانتے دیور۔

8. شُم لوان ہیتان کارا نو تاراوور۔

9۔ ہیتان یار دوستانن بارا ہمیش جام لوو تان دیور وا ہاتیتانتے دی عزت دیور۔

10۔ تان نن تتان جام کورمان ہمیش یاد لاکھور۔

11۔ ہیتان بار بار دیرو لوان ہݰ کار کورور کہ گویا اویلو دفعہ کار کومیان۔

12۔ بوغدو تروق لوان ہیتان سم جوڑ نو تان کورور۔

13۔ ہیت پسہ نسہ کی استانی خوران سُم درونگار لو نو تان دیور۔

14۔ ہیتان پروشٹہ ادبو سم نیشور۔

15۔ ہیتان خیالو وا رائیو سم پھوک رو دی کم نو جوݰور۔

16۔ ہیت لو دیاوا ہیتان لووان کیاوت دی نو چھینور۔

17۔ ہیتان عمرو احترام کورور۔

18۔ ہیت نسہ اسیکہ تان اژیلیان سم نہ کھوٹ بور نہ ہتیتان دیور۔

19۔ ہیتان حکمو وا مشورو قبول کورور۔

20۔ ہیت اسیکہ خور کوسار مشورہ یا رہنمائی نو گانور۔

21۔ ہیت نسہ اسیکہ تان ہوازو دوڑ نو تان کورور ہوازو ہمیش پست لاکھور۔

22۔ ہیتان سم کوسی بوغاوا کیاوت دی نست نو نیسور نہ جُستہ کوسیکو کوشش کورور بچومکہ ہمیش جو غوزار ملالہ کوسور۔

23۔ ݰپیک ژبیکو ݰویہ ہیتان سار نست شروغ نو تان کورور۔

24۔ ہیتان پروشٹہ تان سورو بو نویوکو نو کورور۔

25۔ ہیت کیاوت تان سورو کھیو بݰ کی نو جوݰیستانی تھے پسہ ہیتانتے لو دیور کی ہیتان کندوری اہمیت شیر وا ہیت کندوری عزتو لائق اسونی۔

26۔ ہیتان نسہ نیشی اسیکہ تان پونگان ہیتان ووݰکی کوری نو نیشور نا ہیتانتے کریم کوری نیشور۔

27۔ ہیتان سم بداخلاقیہ لو نو دیور۔

28۔ ہمیش ہیتان موختو لوڑی خوشانی گانور۔

29۔ کھوشش کورور کہ ہمیش ہیتان بچین خدائیو درگاہہ دعا تن کورور۔

30۔ ہیت اسیکہ کیاوت دی ہردی پھت نو بور نہ ہردی پھتیو ہیتان پروشٹہ نویاور۔

31۔ ہیت کیہ غلطی کی ارینی روخڅی دی نو ہوسُور۔

32۔ ہیتان سم لوو دیاوا ہمیش جام لوان وا جام لوزان سار لو دیور۔

33۔ ہیتان جام شیرین وا ݰئیلی نامان سار ناموور ہے وجہین ہیت زیات خوشان بونیان۔

34۔ ہار اشناریان سار ہیتان جام جوݰور۔

35۔ نن تت دنیو بو لوٹ خزانہ ۔ ہے خزانہ دنیار بیکار پروشٹی تان ہیتانتے عزت دیور وا بیہیلی گانور۔


اللہ پاک پسہ سفان نن تتان سلامت ہالیار وا کوس نن تت کی ہیہ دنیار بی اسونی ہیتانتے جنت الفردوسہ ژاغہ دیار امین۔


شیئر کریں: