عالمی یوم سیاحت کے موقع پر کالاش ویلی بمبوریت کے کلاشہ دور میوزیم میں پر وقار تقریب
چترال (نمائندہ چترال ٹائمز ) عالمی یوم سیاحت کے موقع پر کالاش ویلی بمبوریت کے کلاشہ دور میوزیم میں ایک پر وقار تقریب منعقد ہوئی ۔ جس میں ایڈیشنل آئی جی خیبر پختونخوا اختر حیات گنڈاپور ، ملک کے مختلف شہروں سے آئے ہوئے نیشنل ٹورسٹ ، ٹورزم کے فروغ کیلئے کام کرنے والے ایکٹی وسٹ ، مقامی کالاش کمیونٹی اور میوزیم کے عملے نے شرکت کی ۔ جبکہ بڑی میں سکول کے طلباء بھی شریک ہوئے ۔ اس موقع پر ایڈیشنل آئی جی نے ٹورزم کے فروغ اور محفوظ ٹورزم کے حوالے سے کلاش ویلیز کے تمام کمیونٹیز کے کردار کی تعریف کی ۔ اور کہا ۔ کہ سیاحت کی ترقی سے ہی ان وادیوں کی پسماندگی دور کی جاسکتی ہے ۔ بعدآزان مقررین نے ورلڈ ٹورزم ڈے کے حوالے سے اپنے خیالات کا اظہار کرتے ہوئے کہا ۔ کہ کنٹرولڈ ٹورزم وقت کی ضرورت ہے ۔ اور اسی سے ہی روزگار کے مواقع ملیں گے ۔ اور ماحولیاتی آلودگی ، اخلاقی آلودگی کا تدارک ہی سیاحت کے فروغ کی ضامن ہے ۔ بصورت دیگر ہمیں کئی مشکلات پیش آسکتی ہیں ۔ انہوں نے کہا ۔ کہ بعض نیشنل ٹورسٹ علاقے کے اقدار سے بے خبر ہوتے ہیں ۔ یا ان کے پاس غلط معلومات ہونے کی وجہ سے کھلے عام ایسے حرکات کا ارتکاب کرتے ہیں ۔ جس کی اجازت کوئی بھی معاشرہ نہیں دے سکتا ۔ اس لئے یہ ضروری ہے ۔ کہ تمام سیاحوں کو مقامی تربیت یافتہ گائیڈ کی رہنمائی میں وادی کے اندر سیاحت کا پابند بنایا جائے ۔ اور چیک پوسٹوں و ہوٹلوں میں سیاحت سے متعلق قواعدو ضوابط اور اخلاقیات پر مبنی پمفلٹ سیاحوں میں تقسیم کئے جائیں ۔ اور خلاف ورزی کرنے والوں کے خلاف باقاعدہ ایکشن لیا جائے ۔ کالاشہ دور میوزیم کےانچارج ریسرچ آفیسر اکرم حسین نے کہا ۔ کہ ایک اچھا ٹورسٹ وہ ہے ۔ جو ایس او پیز اور قواعدو ضوابط کی پاسداری کرتا ہے ۔ موجودہ وقت میں بعض سیاحوں کے غیر مناسب رویے کی وجہ سے کمیونٹی کو مشکلات کا سامنا کرنا پڑ رہا ہے ۔ ایسے ماحول میں کنٹرولڈ ٹورزم ہی بہترین آپشن ہے ۔ انہوں نے کہا ۔ کہ وادیوں کو صاف ستھرا رکھنا بھی ایک مستقل مسئلہ ہے ۔ کیونکہ سیاحوں کی وجہ سے مختلف تفریحی مقامات میں کچرے پھیل رہے ہیں ۔ جنہیں ٹھکانے لگانے کا کوئی مناسب انتظام موجود نہیں ہے ۔ انہوں نے کہا ۔ کہ کلاشہ دور چترال بلکہ صوبے کا اہم ترین میوزیم ہے۔جس کی روزانہ سینکڑوں سیاح وزٹ کرتے ہیں ۔ لیکن میوزیم میں لائٹ نہ ہونے کی بنا پر سیاحوں کومشکلات کا سامنا کرنا پڑ رہا ہے ۔ اس لئے اس کیلئے مستقل بنیادوں پر مناسب انتظام کا ہونا ضروری ہے ۔ انہوں نے کہا ۔ کہ گذشتہ ایک مہینے کے دوران 5635 سیاحوں نے کالاشہ دور میوزیم کی وزٹ کی ۔ جن میں غیر ملکی اور ملکی سیاح دونوں شامل ہیں ۔ جبکہ حال ہی میں فرانسیسی سیاحوں کے گروپ نے وادی اور میوزیم کی وزٹ کی ۔ اور اس میں نہایت دلچسپی کا اظہار کیا۔ درین اثنا مقررین نے سیاحت کی ترقی کیلئے کالا ش وادیوں کی سڑکوں کی تعمیر کیلئے حکومت سے پر زور مطالبہ کیا ۔ اور کہا ۔ کہ حکومت کی طرف سے سیاحت کی ترقی کیلئے اعلانات خوش آیند ہیں ۔ تاہم سڑکوں کی تعمیر کے بغیر سیاحت کے فوائد صحیح معنوں میں حاصل نہیں کئے جا سکتے ۔ انہوں نے اس حوالے سےمعاون خصوصی وزیر اعلی خیبر پختونخوا وزیر زادہ کی کوششوں کو سراہا ۔ اور مطالبہ کیا ۔ کہ کالاش ویلیز روڈ تعمیر کیلئے تمام قواعد و ضوابط مکمل ہو چکے ہیں ۔ اس لئے فوری طور چترال ایون کالاش ویلیز روڈ پر کام کا آغاز کیا جائے ۔