دروش میں چاقو زنی کا واقعہ، چھوٹے بھائی نے بڑے بھائی کوقتل کردیا۔پولیس

چترال (نمائندہ چترال ٹائمز) لویر چترال کے دروش ٹاؤن کے نواحی گاؤں سویر کے مقام پر چھوٹے بھائی نے طیش میں آکر بڑے بھائی پر چاقو سے وار کیا جس کے نتیجے میں ان کی موت واقع ہوئی۔ چترال پولیس کے مطابق سویر گاؤں کا باشندہ سید حکیم نے پولیس اسٹیشن دروش میں رپورٹ درج کرائی ہے کہ ان کے چھوٹا بیٹا محمد جنید خان (عمر 22سال)نے گھریلو نوعیت کی تنازعے پر غصے کے عالم میں ان کے بڑے بیٹے سرور خان (عمر 24سال) پر حملہ کیا جس سے وہ لہولہان ہوگئے اور فوری طور پر تحصیل ہیڈ کوارٹرز ہسپتال دروش پہنچادئیے گئے جہاں وہ زخموں کی تاب نہ لاکر چل بسے۔ پولیس نے ملزم کو گرفتار کرلیا ہے جسے جوڈیشل ریمانڈ پر جیل بھیج دیا گیا ہے جبکہ مقتول کی لاش کو پوسٹ مارٹم کے بعد دفن کردیا گیا ہے۔ دو حقیقی بھائیوں کے درمیان چاقو زنی کا گزشتہ ایک ماہ کے اندر یہ دوسرا واقعہ بتایا جاتا ہے جبکہ اس سے پہلے چترال کے تاریخی گاؤں مروئے میں بھی اس نوعیت کا واقعہ پیش آیا تھا۔