Chitral Times

Oct 20, 2021

ﺗﻔﺼﻴﻼﺕ

“وے کورُوم شَپیر مو رانی” ……..ناصر علی تاثیر

Posted on
شیئر کریں:

موجودہ وختہ کوویڈ-19 نامین جراسیم دنیو رویان ژانہ تارے شیر وا کندوری رویان ژانان دی گانیتائے۔ ہو کیہ علاج ہمونیا پت پروشٹہ نو گیتی شیر البتہ احتیاطی تدابیران سورا عمل کی کورین ہوئے بچ بین باک بیرائے، ہے تدابیران موژی، ایوال ایوالو سوم میلاو نو بیک، ہوستان صابن دیتی جم نیگیک، دست یا دوچھار نو بیک وا دورار بیری نو نیسیک۔ ہمی سف لوان بارا ہر ایوالوت پتہ۔ وا لاک ڈاون کوریکار اچی دُورو روئے صف ایغو نسا گیتی اسومی ہے وجہین مه ای کما گُزارشات صرف مرد حضراتن یعنی کُولانن بچین ہموش اوشونی۔ (ورنہ۔۔۔ ہیہ لؤو اخیرا پیسَت دوم)۔

اویلو لو ہیس کی نان گینیان یا کائگینیان کوروم ہر وخت زیاد وا ہیت ہمیشہ اسپہ خدمتہ چُھوچھی رُوپھی شامہ پتی گُداز بیتی گیتی اسونی۔ پروشٹی پیساسُوم مختلف بہانہ اوشونی وا ہاتیتان پروشٹہ لاکھی دوری ہاموݰ قسمہ حکُم چلاو اوشتامی،
کا راو اشتامی کی آوا دفترا بی میدہ بیتی گومان کیہ مت ہر اشناری تیار بیلیک، کا راوشتامی کی اسپہ سکولار یا کالجار ݯُھوئی بیتی گوسیان رے قہرا مڑاغ چائے نگہ ملال کی ہوئے پیالان چھینیکو تاب، پھتی مزدوریار گیتی دُوری اُوتیک نما واغ کوری سورا دیتی چاپوتی تیار نما بویا ائے ریکو، وا ای پھتی کورُوم ہیش کیہ نو مگر بازاری بیکو بچین دُورو رویان سُم لوٹ اودودو مه جو جوڑا زپ لوحہ کوری تیارا ہا۔
ہموش قسمہ اسپہ نخرا بیکو سُم باوجودہ ای چھتراری نان یا ای کائے کیوت دی اچی غیری جواب نو دیتی اسور بلکہ پھیک بیتی براداشت کوری اسپہ ہر ای ڈیمانڈو پورا کوری گیتی اسونی۔

دی ہانیسے کی دُونتاو، تہ دفتر دی بند، سکول کالج دی بند، مزدوری دی بند، دوکان بازار دی بند ، بیݰ کوری بیری آسیرو برارگینی دی اساقل بیتی گیتی اسونی، نیݰی یا بیری نیسیک دی بند،
چُھوچھی رُوپھی بوتا پت 3 ٹیمو ݰاپیکو ژوتی ڈیکان ڈیکو ٹیکی درے خالی کی نیشتامی، پیساتین
“وے کوروم شاپیر رینی”

ہے وجہین دی پسہ کیہ کوریلیک، اویلہ شُکر کوریلیک کہ دورو روئے صف ایغو نسہ گیتی اسومی،
ہیغار اچی

موقعہ گیتی شیر شیرین نانو/نانیئو سم مشقول بیتی، ہاتوسوم پھوک مدد کوریکو پیساتے کا طعنہ نو دونی،

موقعہ گیتی شیر تان پھوک کائگینیان سورو ماژی، ہاتیتان ݰئیلی نصیحت کوراو تان زاپان تان لوہا کی ارتامی پیساتے کا طعنہ نو دونی،

موقعہ گیتی شیر اگر کی تان ملگیریو یعنی تان شریک- حیاتو سُم پھوک وخت تیرے، بوسونو وخت ہانیسے ہاتوسوم کھاران کیݰی (کھرداچی روݰ پسہ خوش) یا زاپان نیگاوا ای بالٹیہ اوغ تعو نسہ کی اویتامی پیست کا زن مُورید نو رینی (ویسے زاپان دی کی نیگیتامی کا پسہ پاشیران، ایوال ایوالو دوری بیک بند ہوئے، تہ دورو روئے تہ نو ژانینیانا ہاہا)

موقعہ گیتی شیر تان اژیلیان سُم پھوک وخت تیریکو ہاتیتین تے صفائیو حوالہ آگاہی دیتی، وا تان دورو نسار نس ژویان صف شئپی لغل کی ارتامی پسہ سورا کا نو ہاسینی بلکہ جراسیم پسہ پیثہ نو گوئے

موقعہ گیتی شیر ای زارُو یا اکھابیر تتو سُم کورا پھوردُو کی بوئیتامی پسہ بدَنہ لیئے دی پیدا بوئے وا بہیلی دی گانیمی۔
ہمی تمام کورمان اسپہ نان گینی، کائے گینی وا اکابیران کوری گیتی اسونی، ای کما وختو بچین ہیتانتے سکون کی ہوئے جم، نہ کی الٹہ ہیتان سورا مزید بوجھ بومی۔

ہیعین دیتی مه ژان برارگینیان، دورا اسیکہ ای کاڑوم کوروم کی ارتامی جم، ورنہ پیساتے
“وے کوروم شپیر مو رانی”
،
ناصر علی تاثیر
حال گلگت
#کھوار راوور
#کھوار نیویشور


شیئر کریں: