ترکی کے صدر رجب طیب اردگان کا دورہ، پاکستان ترکی بزنس اینڈ انوسٹمنٹ فورم کا انعقاد

اسلام آباد (آئی آئی پی) ترکی کے صدر رجب طیب اردگان کے دو روزہ دورہ کے دوران وزارت تجارت (ایم او سی)، تجارتی ترقیاتی اتھارٹی (ٹی ڈی اے پی) اور وزارت تجارت اور خارجہ اقتصادی تعلقات بورڈ برائے ترکی (ڈی ای آئی کے) نے پاکستان ترکی بزنس اینڈ انوسٹمنٹ فورم کا 14 فروری 2020 کو انعقاد کیا۔ جس میں سیکرٹری کامرس سردار احمد نواز سکھیرا نے ایک جامع پریزنٹیشن پیش کی جس میں پاکستان کو ایک بزنس دوست ملک کی حیثیت سے اجاگر کیا گیا۔ سیکرٹری کامرس سردار احمد نواز سکھیرا نے کہا کہ پاکستان میں بے پناہ تجارت اور سرمایہ کاری کے مواقع دستیاب ہیں۔ انہوں نے کہا کہ پاکستان کے پاس ایک قابل قدر انسانی وسائل موجود ہیں، جس میں زیادہ تر تعلیم یافتہ نوجوان شامل ہیں۔ انہوں نے ترک کمپنیوں کو ڈیری، خدمات، تعمیرات، انفارمیشن ٹکنالوجی، زراعت اور سیاحت جیسے شعبوں میں سرمایہ کاری کی دعوت دی۔ انہوں نے برآمدات کے اضافہ لئے ویلیو ایڈڈ سیکٹرز کی بنیاد پر اقدامات کی ضرورت پر زور دیا۔ انہوں نے وزیر اعظم کے جذبات کا اعادہ کیا کہ پاکستان آئندہ مینوفیکچرنگ کا عالمی مرکز ہوگا۔ سردار احمد نواز سکھیرا نے دونوں ممالک کے مابین بہترین تعلقات کو اہم تجارتی روابط میں تبدیل کرنے کی ضرورت پر زور دیا۔ انہوں نے کہا کہ پاکستان کی افرادی قوت اور ترکی کی مہارت مختلف شعبوں میں تعاون کے لئے ایک مثالی مکس پیدا کرسکتی ہے۔ چائنا پاکستان اکنامک کوریڈور (سی پیک) دونوں ممالک کے مابین تعاون بڑھانے کا سنہری موقع فراہم کرتا ہے۔ فورم کے دوران پاکستان میں سرمایہ کاری کے مواقع اور ترک کمپنیوں کی پاکستان میں سرمایہ کاری کے تجربات پر پینل مباحثے بھی ہوئے۔ عمائدین نے دونوں ممالک کے مابین تجارتی اور معاشی تعلقات کو مزید گہرا اور وسیع کرنے کی سفارش کی۔ ان کا موقف تھا کہ دونوں ممالک اپنی اپنی مہارت سے بہت سے شعبوں میں ایک دوسرے کی تکمیل کرسکتے ہیں۔ پاکستان متعدد شعبوں میں ترکی کے تکنیکی فائدہ اٹھا سکتا ہے اور یورپ کو برآمد کرنے کے ترکی کے تجربے سے بھی سیکھ سکتا ہے۔ اپنے استقبالیہ خطاب میں وزیر اعظم کے مشیر برائے تجارت عبدالرزاق داد نے دوطرفہ تجارت کی اہمیت پر روشنی ڈالی اور کہا کہ تجارت کی مقدار کو دونوں ممالک کے مابین سیاسی سطح پر موجود بہت ساری خیر سگالی اور خوشگوار تعلقات سے ملنا ہے۔ انہوں نے بزنس کمیونٹی کو دعوت دی کہ وہ باہمی تجارت کو اگلی سطح تک بڑھانے کے چیلنج کو قبول کرتے ہوئے اس خیر سگالی کا فائدہ اٹھائیں۔ انہوں نے کہا کہ تعمیراتی، سیاحت، انفارمیشن ٹکنالوجی، زراعت، ڈیری اور خدمات کے شعبوں میں اس طرح کے تعاون سے بہت کچھ کیا جاسکتا ہے۔ انہوں نے کہا کہ مشترکہ ورکنگ گروپ برائے تجارت اور سرمایہ کاری میں بہت ترقی ہوئی ہے۔ انہوں نے کہا کہ ممکنہ شعبوں کو اجاگر کرنے کے لئے مشترکہ اسکوپنگ اسٹڈی کا فیصلہ کیا گیا ہے۔ اس سے پاک ترکی ایف ٹی اے پر مذاکرات کی سمت طے ہوگی۔ وزیر تجارت برائے ترکی روہسر پیکن نے کہا کہ تجارتی اور سرمایہ کاری کے تعلقات کو بڑھانے کی ضرورت ہے۔ انہوں نے ان علاقوں میں مشترکہ منصوبوں اور ٹکنالوجی کی منتقلی کی اہمیت کی وضاحت کی جہاں ترک کمپنیاں اپنے پاکستانی ہم منصبوں کے ساتھ تعاون کرسکتی ہیں۔ وزیر اعظم عمران خان نے اپنے خطاب میں ترکی کے صدر کیلئے پاکستان بھر میں بے پناہ احترام اور مقبولیت کا اعتراف کیا۔ انہوں نے فورم میں ترکی کے بڑے کاروباری وفد کی موجودگی اور ترکی کے بڑے کاروباری گروپوں کی شرکت کو سراہا۔ انہوں نے پاکستان کی سیاحت، تعمیرات، انفارمیشن ٹکنالوجی اور زراعت کے شعبوں اور مختلف ترقیاتی اقدامات کی صلاحیتوں پر روشنی ڈالی جہاں ترکی کے کاروباری گروپ پاکستان کے ساتھ تعاون کرسکتے ہیں۔ انہوں نے ترک کمپنیوں کو سی پی ای سی کے بنیادی ڈھانچے کے منصوبوں میں حصہ لینے اور خصوصی اقتصادی زون آباد کرنے کی دعوت دی۔ ترک صدر رجب طیب اردگان نے اپنے خطاب میں وزیر اعظم عمران خان کے خیالات کا گرم جوشی سے جواب دیتے ہوئے کہا کہ آنے والے سال میں دوطرفہ تجارت کی مقدار کو 5 بلین امریکی ڈالر تک بڑھایا جائے گا۔ انہوں نے پاکستان میں توانائی، انجینئرنگ، تعمیرات اور بجلی کے آلات کے شعبوں میں ترکی کی کلیدی کمپنیوں کی موجودگی پر روشنی ڈالی اور کہا کہ ڈیری، فوڈ پروسیسنگ، زراعت، ہائیڈرو الیکٹرک اور دواسازی کے شعبوں میں ترکی کی سرمایہ کاری جاری ہے۔ صدر نے سرمایہ کاری کے علاوہ ترکی میں صحت کی جدید سہولیات پر بھی روشنی ڈالی جس سے پاکستان بھی فائدہ اٹھا سکتا ہے۔ انہوں نے دونوں ممالک کے مابین اسٹریٹجک معاشی فریم ورک کی ترقی کو سراہا اور امید ظاہر کی کہ وہ آنے والے سالوں میں دوطرفہ تجارت اور سرمایہ کاری کے تعلقات کو مزید مستحکم کرنے کی راہ ہموار کرے گی۔