بی آئی ایس پی سے مستفید ہونے والے سرکاری ملازمین کے خلاف قانونی چارہ جوئی کا عندیہ

اسلام آباد(چترال ٹائمزرپورٹ) بے نظیر انکم سپورٹ پروگرام سے مستفید ہونے والے سرکاری ملازمین کے خلاف قانونی چارہ جوئی کا عندیہ دے دیا گیا۔تفصیلات کے مطابق ذرایع نے کہا ہے کہ بی آئی ایس پی سے مستفید ہونے والے غیر مستحق سرکاری ملازمین کے خلاف قانونی چارہ جوئی کی جائے گی۔سماجی تحفظ اور غربت کے خاتمے کے بارے میں وزیر اعظم کی معاون خصوصی ڈاکٹر ثانیہ نشتر نے اس حوالے سے ایک انٹرویو میں کہا کہ متعلقہ سرکاری ملازمین کی تفصیلات ان کے شعبوں کو بھجوائی جائیں گی تاکہ ان کے خلاف قانونی چارہ جوئی کی جا سکے۔ثانیہ نشتر کا کہنا تھا کہ بے نظیر انکم سپورٹ پروگرام کو مزید شفاف بنایا جائے گا، حکومت نے خصوصی مہم میں ایسے 14 ہزار 730 سرکاری ملازمین کی شناخت کر لی ہے، مجموعی طور پر 8 لاکھ 20 ہزار 165 غیر مستحق خواتین کی شناخت ہو چکی ہے۔دو دن قبل ڈاکٹر ثانیہ نشتر نے پریس کانفرنس میں کہا تھا کہ 10 سال قبل سروے کے ذریعے مستحقین کا تعین کیا گیا تھا، 10 سال میں لوگوں کے حالات بدل جاتے ہیں، حکومت نے فیصلہ کیا کہ پروگرام سرکاری ملازمین کے لیے نہیں ہے، اس لیے 8 لاکھ سے زاید خواتین کو نکالنے کا فیصلہ کیا گیا، یہ اقدام مستحق افراد تک مالی امداد پہنچانے کے لیے اٹھایا گیا۔ان کا کہنا تھا کہ غیر مستحق افراد کو 2011 سے ادائیگیاں کی جا رہی تھیں، ایسا شخص جس کے نام پر گاڑی ہو، پی ٹی سی ایل یا موبائل کا بل ایک ہزار سے زائد ہو، ایسے افراد اہل نہیں ہیں۔ لہذا ان سے ریکوری کی جائیگی.
…………………………
.
حکومت احساس کفالت پروگرام کے تحت 8.6ارب روپے کی مالی معاونت فراہم کرے گی، ڈاکٹر ثانیہ نشتر
اسلام آباد(سی ایم لنکس)وزیراعظم کی معاون خصوصی برائے تخفیف غربت اور سماجی تحفظ ڈاکٹر ثانیہ نشتر نے کہا ہے کہ حکومت احساس کفالت پروگرام کے تحت 8.6 ارب روپے کی مالی معاونت فراہم کرے گی۔ انہوں نے کہا کہ احساس کفالت پروگرام سے مالی امداد حاصل کرنے والوں کے لئے سہ ماہی گرانٹ کو 5 ہزار روپے سے 5 ہزار 5 سو روپے تک بڑھایا جا رہا ہے جس سے 4.3 ملین خاندانوں کوفائدہ ہو گا۔ انہوں نے کہا کی کفالت پروگرام کی رقم میں اضافہ سے مالی معاونت کی فراہمی کا حجم 8.6 ارب روپے تک بڑھ جائے گا جس سے معاشرہ کے غریب طبقات کی مالی معاونت سے غربت کے خاتمہ میں مدد ملے گی۔