اویونو مولدیہا گیس سیلنڈرانگارچوکی پولیرو روئیاں بچین امداد واپیل
چھترار: (نمائندہ چھترارٹائمز) یکم اکتوبر شامو نیمیژو وختہ اویونو مولدہا گیس سلنڈر انگار چوکی کیہ سانحہ کی رونما بیتی اوشوئے ہتیرا ای خاندانو تان اوشٹ نفری سخت متاثر بیتیستانی ، ہتے موژی جو کُلانو منطور وا شاکر اللہ (برارگینی) ، تروئے عورتان ( نان وا جو روژائگینی) وا تروئے چیچیق ”کہکشان” ”تانیہ” وا ای خور چیق پولیستانی۔
تفصیلاتو مطابقہ یکم اکتوبر شامو نیمیژو وختہ ایونو مولدہا شاکر اللہ ولد شیر عالمو دورا گیس سلنڈرو سورا حصہ غاڑ بیکو وجہین اہئے نیسیکو یکدم پورا گیس دوری جمع بیتی شیر ، وا دیدانگہ انگار گیسا توری ہتے باس پورا دوروتے بولونجی دورو تمام رویان پالے شیر۔
متاثرینان اویونو ہسپتالہ تان پھوک مرہم پٹی کوریکار اچی چھیتراروتے ویشیسونی، چھیترارو ڈسٹرکٹ ہیڈ کوارٹر ہسپتالہ سوت نفریان حالتو نازک قرار دیتی پشاوروتے ویشیسونی ، وا دوری ای نان (شارانہ تختہ نیمیژ کوراوا کم رو یعنی قالپو 20 فیصد حصہ متاثر بیرو بیرائے ) ہتو ہتیرا تان علاج کوری دوروتے ویشیسونی۔
اوختی انوسو سوت نفریان پشاورا تارے حیات آباد میڈیکل کمپلیکس ہسپتالو برن اینڈ پلاسٹک سرجری یونٹہ داخل کوریسونی۔
ہتیتان موژی جو چیچیقان وا ای عورتو حالتو نازک جوشی انتہائی نگہداشت یونٹہ وا باقی متاثرینان جنرل وارڈا ہالیسونی۔ تروئے تاریخو انوسو نیوف سالہ چیق کہکشان حقوتے توریسور، وا چار تاریخو انوس تانیہ نامین چیق دی حقوت توریسور۔
عورتانن موژی ای عورت امیدوار بیرائے ہے حادثو موژی چیق ننو اشکامہ تان حقوت توریسور وا پشاورا ہسپتالہ بیہتی اژیسور، وا ہش لو دی کارا توریتائے کی ہے اژیرو چیقو کریمتو دی ژاغہ ژاغا کوش شیرانی۔
وا متاثرینان موژی شاکر اللہ ہنون حقوت توریتائے .
ڈاکٹرانن اندازو مطابقہ متاثرینان موژی شاکر اللہ برارو 78 فیصد قالپ پولی شیر وا منظور برارو 55 فیصد قالپ پولی شیر۔
شوخچیرو اتوارو انوس کھوار اہل قلم حلقہ پشاورو صدر اوا یعنی عطاو الرحمن عدیم ، تحریک تحفظ حقوق چترالو صدر جناب پیر مختار صاحب مولانا شمس النبی معاویہ صاحب ، مولانا ناصر الدین صاحب ، معروف نعت خواں جناب نصیر الدین نصیر صاحب ، معروف سماجی کارکن جناب عبید فلک صاحب وا شک ملگیری متاثرینان سوم ملاقات اریتم
زنانہ وارڈی بیکو نو بیتم شاکر اللہ برارو چے منظور برارو سوم ملاقات ہوئے۔
ہانی متاثر بیکو سم جستہ دی کافی برابر اسونی ، بو پرامید غیچی ہانی۔ اسپہ سوم پھوک لوا دی چوکیتانی دعو درخواستو ارینی وا اسپہ دی ہتیتان دلاسہ دیتی خصوصی دعو چے مکمل تعاونو یاددہانیو اریتم وا۔
متاثرینان رشتہ دارانن موژی مجیب برارو وا رحمت ولی برارو سوم ملاقات ہوئے تفصیلی لو پریتم اسپہ سوم بو تعاون ارینی وا کونیان رے پورا چھیتراری قومو میناداریو ارینی۔
چھیترارو ایم۔این۔اے جناب مولانا عبد الاکبر چترالی صاحب گیتی خیریتو بشارو گنی 25000 روپیہ امداد دیتی بوغدو بیرائے ، ایم۔پی۔اے جناب مولانا ہدایت الرحمن صاحب دی پوشاو گیتی 15000 روپیہ تعاون کاردو بیرائے ، وا ایم۔پی۔اے وزیر زادہ صاحب دی جو تروئے دفعہ گیتی این۔جی۔او تعاونو سورا ای لاکھ روپیو بندوبستو کوریسور ریتانی۔
مجموعی طورا روزانہ خرچہ 3 لاکھ روپیہ گیاک بیرائے وا ہسپتالو عملہ ایک لاکھ ستر ہزار روپیہ تعاون کوری ایک لاکھ تیس ہزار روپیہ ہیتان سر گاناک بیرانی۔ چھیتراری تنظیم وا انفرادی طورا چھیتراری روئے وا ہیسوم جستہ ہسپتالو عملہ کافی اسپہ سوم تعاون کونیان رے بو میناداری ارینی۔
فی الحال پروشٹہ خرچہ باو گوین مگر پیسو ضرورت بو شیر ہے وجہین پشاورا اسیرو تھمام ادبی فلاحی سماجی تنظیم ہیتان بچے چندہ مہم شروع کوریسونی ہیغار علاوہ کھوار اہل قلم حلقہ پشاورو ممبران لاہورا پنڈیا کراچیا وا اوورسیز حلقہ دی چندہ مہم شروع کوریسونی۔
پشاورا اساک تھمام چھیتراری قوموتے خصوص طورا چھیتراری افسرانن خدمتہ گزارش شیر کی اسپہ ہے خاندانو بچے تان وسو مطابقہ چندہ دیور وا جمع کورور تاکہ ضرورتو وختہ ہیتانتے پریشانی نو بوئے۔
وا چھیترارو اندرینی دی ادبی فلاحی سماجی کندوری کی تنظیم شینی ہیتان خدمتہ دی گزارش کوسیان کی ہیت دی تان ذرائعان استعمال کوری سرکاری ذاتی وا نجی سطحہ چندہ جمع کوری ہے متاثرہ خاندانو غمہ تان سورو شریک کوری ثواب دارین حاصل کورور۔
یقیناً ای انسانو ژانو بچ کوریک گویا پورا عالم انسانیتو ژانو بچ کوریک۔
