“چھتراری’ ژور”……………… ابو عاطف بیگال
صلہ رحمیو نامہ میراثہ سار محروم ‘ کھئو بچین ؟
قدرو لائق چھتراری اہل علم چہ دانش لکھک براگنیان!
“ژوروت’ صلہ رحمی تریر رے ” ہیہ لو اسپہ چھترارا عام . ہیہ بنیادا ہتو حقیقی میراثہ سار محروم پھیچئک چھترارا اسپہ معاشرتی روایت بیھچی گتی شیر.
اللہ جم ہوشکویان ہیہ غلط وا شریعتو احکاماتان سو متصادم روایتو اجراء کا کوری اسور.؟ وا ژورگنیان سو یہ ظلم و ناانصافیو ہیہ سلسلہ کیہ قسمہ جاری بتی شیر.؟ حالانکہ علماء اکرام وا دینو چہ دنیو معاملاتان ہوش کورک روئے پھا رو اسنی’ ای عام تعلیم یافتہ انسان دی قران مجیدو درجہ ذیل صریح المعانی آیات بیان بیرو ہیہ لوؤ ہوش کوئی کہ نان تتان “ترکہ” کی… خدائ کی ….”ژیژوان” تے حق متعین کوری اسور. ہتے خدائی “ژورگنیان”حقو دی متعین کوری اسور.
ولِلنِّسآء مِمّا تَرَ کَ الوالِدَان والاقربون مما قلّ منہ او کَثُرْ. النساء.ایۃ ۷.
یُوصیکُم اللہ فی اولادکم لذَکَرِ مِثْلُ حَظِّ الاُنثَیَیْن. النساء.۱۲.
تھے ہیہ کیا وجہ ؟ کی اسپہ “ژیژوان”حقدار جوشی تان کھل میراثو یا ترکو ہتیتان. تے کوری “ژورگنیان” صلہ رحمیو نامہ دھوکا چہ فریب دوسیان.
حال ہیہ کی . اہل علم حضرات. بو جم ہوش کونیان کیہ حقو تعین کی اللہ وشکیار صراحتا بتی اوشوئی. ہتیرا چوں چرا کو ریکو اختیار ہشکوس تے حاصل نکی.باقی صلہ رحمی دین اسلامو ای الگ مستقل عبادت. ہو بہنہ غیرئے یا حیلہ غیرئ کوس معلوم وا متعین حقہ ری محروم کوریک. ظلم. حرام اور بو لوٹ گناہ.
ہموغار تیس چالیس سال پروشٹی یا ماضی بعیدہ کی رویان تان غربتو یا علمو چہ علمان کمیو وجہیں کی ہیہ ظلمو کوراو اوشونی. ہنون تھے ہش حالات نکی.
ہنون اسپہ چھترارا ہش کیا علاقہ نکی کی ہتیرا مکتب یا مدرسہ نو بوئی. ہش کیا دہ نکی کی ہتیار دشمنان نو بونی.
علم و آگاہی دی زیاد . معاشی حالت دی پروشٹو سار بو بہتر . جدید تعلیمی و تحقیقی اداران تعداد دی بو. ہیسو جوستہ سول سوسائٹیو وسکیار دی رھنمائی مواقع دستیاب مگم بوجوہ ہیہ پہلوا ظلم چہ ستمو سلسلہ دور جاہلیتو غون بدستور جاری شیر.
علم و دانشو صفتار مالامال حضراتان سار سوال کومان.
کی اسپہ علاقائی روایاتن مطابق “ژورت”کی حق نو دئیلیک؟ تھے مہ مطمن کورور.
کی “ژوروت”حق توریلیک ؟تھے اسپہ معاشرو اکثریت ہے حقو عملی طورا نو دویان.
تھے سوال ہیہ کی ….
1. ہیہ ظلم کو بویان؟
2.ہمو وجوہات کیاع؟
3. ہمو ذمہ دار کا ؟
امید کومان اہل علم حضرات رھنماہی کومی.
ِ