ایم این اے کی یقین دہانی،تحریک حقوق اپرچترال نے لانگ مارچ ایک ماہ کیلئے موخرکردی
بونی ( نمائندہ چترال ٹائمز) گولین گول بجلی گھر سے اپر چترال کو بجلی کی چوبیس گھنٹہ بجلی کی سپلائی کو یقینی بنانے اور غیر ضروری اور غیر اعلانیہ لوڈ شیڈنگ کے خاتمے کے لئے تحریک حقوق اپر چترال نے گولین گول کی طرف لانگ مارچ کو ایک ماہ کے لئے موخر کردیا جس کے لئے 12فروری کی تاریخ مقرر کی گئی تھی اور مستوج سب ڈویژن کے گاؤ ں گاؤں سے ہزار وں افراد کی روانگی کو حتمی شکل دی گئی تھی۔ اتوار کے روز چترال سے قومی اسمبلی کے رکن مولانا عبدالاکبر چترالی نے تحریک کے رہنماؤں پرویز لال اور دوسروں سے کامیاب مذاکرات کے بعد ان سے ایک ماہ کی مہلت لینے میں کامیاب ہوگئے۔ انہوں نے یقین دلایا کہ وہ ایم پی اے مولانا ہدایت الرحمن کو لے کر صوبائی حکومت سے اس مسئلے کو ہمیشہ ہمیشہ کے لئے حل کرنے کی کوشش کریں گے جبکہ کوشش بار آؤر نہ ہونے کی صورت میں وہ خود بھی احتجاج میں مستوج سب ڈویژن کے عوام کے ساتھ شریک ہوں گے ۔
