- Chitral Times - https://chitraltimes.com - Chitral Times

کلچرل ونگ گلگت بلتستان کے کابینہ کی تشکیل نو، سینئر صحافی و شاعر شراف الدین فریاد صدر منتخب

گلگت ( چترال ٹائمز رپورٹ ) وزیر اعلیٰ گلگت بلتستان حافظ حفیظ الرحمٰن کی خصوصی ہدایت پر ڈپٹی سپیکر گلگت بلتستان اسمبلی جعفر اللہ خان نے پاکستان مسلم لیگ “ن” کلچرل ونگ گلگت بلتستان کی کابینہ تشکیل دے دیا ہے ۔ پیر کے روز جعفراللہ خان جو کہ پاکستان مسلم لیگ “ن” گلگت بلتستان کے ڈپٹی سکریٹری جنرل بھی ہیں کی صدارت میں فنکاروں کا ایک اہم اجلاس ہوا جس میں تمام فنکاروں کی باہمی مشاور ت سے سینئر صحافی و شاعر شراف الدین فریاد ؔ کو مذکورہ کلچرل ونگ کا صدر جبکہ صدیق مغل کو سکریٹری جنرل منتخب کرلیا گیا ۔ اس کے علاوہ معراج عالم معراج کو سینئر نائب صدر ، اویس شہزل ؔ نائب صدر اول ، ذوالفقار علی فوجی نائب صدر دوئم اور راشد اقبال راشدؔ کو پروگرام آرگنائزر منتخب کرلیا گیا ہے جبکہ طارق اعظم ڈپٹی جنرل سکریٹری ، فیاض الرحمٰن فلکؔ سکریٹری مالیات ، داود احمد داودی ؔ آفس سکریٹری اور شفیق الرحمٰن ساؤنڈ آپریٹر چن لیے گئے ہیں ۔ گلگت بلتستان کے تمام آرٹس کونسلوں کے سینئر شعرا و فنکاروں پر مشتمل 14 رکنی مشاورتی کونسل کا قیام بھی عمل میں لایا گیا جس کے مطابق شاہ زمان شاہ ، سردار حسین جمالیؔ ، غلام نبی ہمرازؔ ، اقبال حسین اقبال ؔ ، رحمٰن شاہ ساغرؔ ، آصف علی ، مجید احمد ، محمد عدنان ناز ، جہانگیر عالم بدرؔ ، اختر حسین راجہ ، سجاد الرحمٰن سجادؔ ، ابراہیم مخلص ؔ ، مبارک علی ساون ؔ اور جہانگیر شاکرؔ مذکورہ کلچرل ونگ کے مشاورتی کونسل کے ممبران ہوں گے ۔ اس موقع پر اجلاس سے خطاب کرتے ہوئے ڈپٹی سپیکر جعفر اللہ خان نے کہا کہ زبان اور ثقافت کسی بھی قوم کی پہچان ہوتی ہے اور جو قومیں اپنی زبان اور ثقافت کی قدر نہیں کرتے ان کاشمار مردہ قوموں میں ہوتا ہے ۔ گلگت بلتستان میں پی ایم ایل”ن” کلچرل ونگ کا قیام عمل میں آنا نیک شگون ہے۔ اب انشااللہ فنکاروں میں پائی جانے والی برسوں کی احساس محرومی دورہوگی اور گلگت بلتستان کی حکومت انہیں مکمل سپورٹ فراہم کرے گی ۔ اُنہوں نے کہا کہ وزیر اعلیٰ گلگت بلتستان حافظ حفیظ الرحمٰن نے وعدہ کیا ہے کہ مقامی فنکاروں کے مسائل کے ازالے کے لیے سنجیدہ اقدامات اُٹھائے جائیں گے ۔ اور فنکاروں کا دیرینہ مطالبہ ” کلچرل آڈیٹوریم ” بہت جلد فنکاروں کے سپرد کیا جائے گا اور فنکاروں کی معیاری ریکارڈنگ کے لیے قومی اسٹوڈیو بھی بنایا جائے گا جس کے لیے مذکورہ کلچرل ونگ کی ایگزیکٹیو ٹیم تیار کریں ۔ جعفراللہ خان نے مذید کہا کہ نلتر کے مقام پر سیاحت کے فروغ کے حوالے سے ثقافتی پروگرام بھی منعقدہوگا جس میں کلچرل ونگ کی نومنتخب کابینہ سے وزیراعلیٰ حلف بھی لیں گے ۔ اس کے لیے وہ پروگرام اپنے اسلام آباد دورے سے واپسی پر دیں گے ، اُنہوں نے تمام نومنتخب عہدیداروں او رمشاورتی کونسل کے ممبران کو مبارک باد بھی پیش کی اور کہا کہ اُمید ہے کہ نومنتخب عہدیداران پارٹی قیادت کی اُمیدوں پر پورا اُتریں گے ۔