شندورفیسٹول میں‌ VVIPs کو مدعو نہ کیا جائے..عوامی حلقے

چترال ( نمائندہ چترال ٹائمز ) چترال کے مختلف مکاتب فکر نے گزشتہ سالوں کے تلخ تجربات کی روشنی میں ضلعی انتظامیہ اور صوبائی حکومت سے پرزور مطالبہ کیا ہے کہ جشن شندور کے موقع پر وی وی آئی پی شخصیات کو دعوت نہ دی جائے ۔جن کی وجہ سے بے جا سیکورٹی تشکیل دینے پر شندور میلہ کی افادیت ختم ہو تی جارہی ہے۔ اپنے اخباری بیان میں سابق ناظم یونین کونسل لاسپور سلیمان شاہ نے کہا ہے کہ شندور میلہ میں لوگ ہماری ثقافت اور فری سٹائل پولو سے لطف اندوز ہونے کیلئے آتے ہیں مگر وہاں پر بے جا سیکورٹی کی وجہ سے انتہائی مشکلات کا شکار رہتے ہیں ۔ انھوں نے بتایا کہ شندور میلہ میں جب بھی وی وی آئی پی تشریف لائے ہیں تو علاقے کیلئے کوئی نہ کوئی فائدہ ضرور پہنچا ہے ۔ مگر گزشتہ چند سالوں سے سیکورٹی کے نام پر تماشائیوں کو انتہائی تنگ کیا جاتا ہے ۔ جس کی وجہ سے مقامی لوگوں کے ساتھ دوسرے علاقوں کے سیاح بھی دوبارہ شندور آنے کی گوارہ نہیں کرتے ۔ انھوں نے کہا کہ موجودہ دور میں تماشائیوں کی ایک دفعہ چیکنگ اور سکریننگ انتہائی ضروری ہے مگروہاں پر تماشائیوں کو بے جا تنگ کیا جاتا ہے ۔ جسکا سلسلہ بند ہونی چاہیے ۔ ضلعی انتظامیہ کو چاہیے کہ وہ مقامی پولیس کے زریعے چیکنگ اور سیکورٹی کو یقینی بنائیں اگر مقامی پولیس سے ممکن نہیں تو چترال سکاوٹس کے جوان موجود ہیں جو علاقے کے روایات کو مدنظر رکھتے ہوئے لوگوں کی چیکنگ اور سیکورٹی پر نظر رکھ سکتے ہیں ۔ انھوں نے زور دیکر کہا کہ اگر گزشتہ برسوں کی طرح اس سال بھی سیکورٹی کے نام پر لوگوں کو تنگ کیا گیا تو آئندہ کوئی بھی شندور میلہ میں آنے کا نہیں سوچے گا۔ لہذا صوبائی حکومت اور ٹورزم ڈیپارٹمنٹ کو چاہیے کہ شندور میلہ میں تماشائیوں کی زیادہ سے زیادہ شرکت کیلئے لوگوں کو بے جا تنگ کرنے کے بجائے ان کو سہولت مہیا کیا جائے ۔ تاکہ وہ واپس جاکے دوسرے لوگوں‌کو بھی ان علاقوں‌کی سیرکیلئے ترغیب دے سکیں‌.