- Chitral Times - https://chitraltimes.com - Chitral Times

لاسپورکے تاریخی ورثہ میوزیم میں گیارویں صدی عیسوی کی اشیاء کو نمائش کیلئے رکھا گیا ہے…محکمہ سیاحت

پشاور(چترال ٹائمز رپورٹ) ایکو ٹورازم کے فروغ کیلئے تجویز کردہ ایک چھوٹا سا منصوبہ ورثہ میوزیم کا اب حقیقت میں تبدیل ہوگیا، اپرچترال کے علاقے وادی لاسپورمیں ہرچین کے مقام پر یہ ایک ایسا میوزیم قائم کیا گیا ہے جس میں گیارویں صدی عیسوی کی اشیاء کو نمائش کیلئے رکھا گیا ہے ، یہ میوزیم شندور روڈ پر واقع ہے ،گلگت بلتستان سے شندور پاس سے ہوتے ہوئے مستوج کی طرف آتے ہوئے بھی اس میوزیم کی جانب باآسانی پہنچا جا سکتا ہے ،محکمہ سیاحت خیبر پختونخوا پائیدار ٹورازم فاؤنڈیشن ،اے کے آر ایس پی کی کاوشوں کو سراہتی ہے جن کی سوچ اور محنت رنگ لائی اور لاسپور وادی کے ہرچین میں ورثہ میوزیم قائم کیا گیا ہے ، تفصیلات کے مطابق میوزیم میں گیارویں صدی عیسوی میں جنگ میں استعمال ہونے والے ہتھیار، گھروں کی اشیاء، روایتی لباس، لکڑی کی بنی اشیاء، موسیقی کے آلات اور دیگر اشیاء کو رکھا گیا ہے ، پولو اس علاقے کا قدیمی اور تاریخی کھیل ہے جس کی تاریخ صدیوں پرانی ہے اس میوزیم میں قدیم دور کی پولو میں استعمال ہونے والے اشیاء بھی سجائی گئی ہیں ، اس کے علاوہ یہاں آنے والے سیاحوں کیلئے اپنی نوعیت کے انفرادی میوزیم کی سیر کے علاوہ ان کی رہائش کیلئے مقامی آبادی کے ساتھ مل کر کیمپنگ سائیڈ بھی تعمیر کی جارہی ہے جس میں 30 افراد کی رہائش کی سہولت میسر ہوگی اور وہ یہاں کے ایکو ٹورازم ماحول سے لطف اندوز ہوسکے ہیں، اس کے علاوہ لاسپورکی مقامی آبادی سے آٹھ ایسے نوجوان بھی تیار کئے جائینگے جو کہ اس علاقے کارخ کرنے والے سیاحوں کیلئے بطور ٹریول گائیڈ اپنی خدمات پیش کرینگے ، اس کے ساتھ ساتھ وادی لاسپور میں چند تاریخی ثقافتی گھروں کی تزہین و آرائش بھی کی جائے گی اور ساتھ میں مقامی آبادی پر مشتمل گیسٹ ہاؤسز اور یہاں کی مقامی آبادی کی جانب سے تیار کردہ ثقافتی اشیاء کو فروغ دیا جائے گا جبکہ اس کے علاوہ مزید نئے اقدامات اگلے مرحلے میں اٹھائے جائینگے ، ٹورازم کارپوریشن کی بھی یہی کاوش ہے کہ صوبہ میں نئے سیاحتی مقامات کو آباد کیا جائے اور اس کے علاوہ مقامی آبادی کو سیاحتی مقامات کی آباد کاری سے مکمل فائدہ پہنچایا جائے تاکہ وہ اس فائدے سے مکمل مستفید ہوسکیں۔