Chitral Times

Sep 20, 2018

ﺗﻔﺼﻴﻼﺕ

  • وخت کھیوتے ریر؟……تحریر: اقبال حیات اف برغذی

    March 30, 2018 at 9:46 pm

    وخت زندگیو نام ۔ وخت تازگیو نام ۔ وخت سیرو موڑوآف شوخساک سمندرو نام۔
    وخت چھورپونگیہ شروغ بک ہر غوزارو نام وخت ننار اژیکو سوم کیڑیکو نام
    وخت بوسونو شیلیہ انوازو گان شیرئیکو نام وخت شورو زریخ گانا چھو چھو چھانان تھرشکیئکونام
    وخت سورا شوخساک حالاتان نام وخت ہردیہ پیدا بک خیالاتان نام
    وخت نافخمیہ چھوتی پرونیکو جوانیہ چوکتو پیڑینگی کوریکو و ذاروئیہ خپ اچی کوری دونی شار استونیکو نام
    وخت چھوئی برابر اروپھی اورئیی اسیکہ کوس دورو اوتیکو، چیح پھوشیکو چے گورزوپھیکو نام
    وخت درونگ چھوئی سیدا پوری گناہان معافیو بچے اللہ پاکو پروشٹہ سور زوپھی کیڑیکونام
    وخت ہتے کنوالشان نام کی تان یورو پیچیو سختیان خیشی خورانتے چھاغ بونیان
    وخت ہتے عقلو خاوندانان نام کی تانوچے تان اولادان اشکمان ٹیپھیکوبچین کائناتو وجود اری کنوالشان اوچ چلایونیژیکاری دریغ نوکورونیان
    وخت خدایو سوم محبتو دعوؤ کوریکوسوم جوستہ ہتوغوراہا چموٹو بروناڑوک بوختو دکو شہ فرقان نیزی ژیرغیکونام
    وخت ہے دعوؤ سوراتان کھونگورین خدایو بچے سور چھینینو بیکو دی کی ہموش بوئی رے ارمان کوریکو نام
    وخت سفوتے ای قسمہ ہوئی دوئی کی مہ ڈانگ دوسے تہ ہوستار کی بغاتم تہ چموٹ تہ دونا بوئی
    وخت کو س انتظارو نو کوروئی۔ وخت قدردان رویو بچے آسمناری گیتی سمندرو موژی چکستو غیراک بوشیکو قطرو غون
    وخت بے قدر رویوبچے خڑاو ژوردو بیرموغو پھیشماکوغون۔
    وخت کوس گوڈاری کھیشتیوچے ژیندان نیژی باچھائیو تختہ التی نیشیر
    وخت کوساری سوؤرمین تاجوچے تختو اویری شربخ پھکوڑوچے ہمیشہ پوریکو بچے جوگز زمینوتے دی محتاج کوروئی۔
    وخت نہ بیزیمین بوئی ونہ کرینین بوئی۔
    وخت ای ہروش کرنسی کی دُنیو دروستی بازار کیہ وت دی ہورو قیمتہ کیہ فرق نو گوئی ۔ وہورو قیمت حاجتہ گیروار پو یا مغلوم بوئی۔
    وخت ہرکوس پیشانیہ ژینگئینوبیرو ہروش لکیر کی ہورو دونیو کیہ طاقت دی نہ درونگیئیکو بوئی ونہ اسکوردئیکو بوئی۔
    وخت موبائیلو دونیو سورا غیچ دیتی مست بیکوتے دی ریر
    وخت کرکٹوچے ڈرامان بچے ٹی وی پروشٹی راست بیکو تے دی ریر
    وختو شخسیسیان یا وخت نوشخسوران راک انسانو سار توری عقل تونجیرو واکا نوبوئی
    وختو ہمی صفت و اشماروچے اوشٹوریکو سلسلہ ہیہ جہانو سرحدا پت جاری بہچور ۔ وخور جہانی داخل بیروار پویا ہر کوسار شوخسیرو وختو حساب کتابار اچی وختو روپھیئنو بوئی۔

  • error: Content is protected !!