یونیورسٹی آف انجینئرنگ اینڈ ٹیکنالوجی پشاور کا کانووکیشن، وزیر اعلیٰ نے مجموعی طور پر 555 گریجویٹس کو بیچلر، ماسٹر اور پی ایچ ڈی ڈگریاں دیں جبکہ نمایاں پوزیشن حاصل کرنے والے 23 گریجویٹس کو گولڈ میڈلزدیاگیا
یونیورسٹی آف انجینئرنگ اینڈ ٹیکنالوجی پشاور کا کانووکیشن، وزیر اعلیٰ نے مجموعی طور پر 555 گریجویٹس کو بیچلر، ماسٹر اور پی ایچ ڈی ڈگریاں دیں جبکہ نمایاں پوزیشن حاصل کرنے والے 23 گریجویٹس کو گولڈ میڈلزدیاگیا
پشاور ( چترال ٹائمزرپورٹ ) وزیر اعلیٰ خیبر پختونخوا علی امین خان گنڈاپور نے جمعہ کے روز یونیورسٹی آف انجینئرنگ اینڈ ٹیکنالوجی پشاور کے کانووکیشن میں بطور چانسلر شرکت کی اور گریجویٹس کو اسناد اور گولڈ میڈلز سے نوازا۔ وزیر اعلیٰ نے مجموعی طور پر 555 گریجویٹس کو بیچلر، ماسٹر اور پی ایچ ڈی ڈگریاں دیں جبکہ نمایاں پوزیشن حاصل کرنے والے 23 گریجویٹس کو گولڈ میڈلز سے بھی نوازا۔ صوبائی وزیر برائے اعلیٰ تعلیم مینا خان آفریدی ، یونیورسٹی انتظامیہ و فیکلٹی ، گریجویٹس اور انکے والدین بھی کانووکیشن میں شریک ہوئے۔ وزیر اعلیٰ نے کانووکیشن سے خطاب کرتے ہوئے گریجویشن مکمل کرنے والے طلبہ، انکے والدین اور فیکلٹی کو مبارکباد پیش کی ہے اور کہا ہے کہ وہ دعا گو ہیں کہ گریجویٹس جس فیلڈ میں جائیں وہ محنت کریں اور ملک و صوبے کا نام روشن کریں۔ وزیر اعلیٰ نے کہا کہ گریجویٹس ریسرچ اور ٹیکنالوجی میں آگے بڑھیں، ان شعبوں میں وسیع مواقع موجود ہیں۔
انہوں نے مزید کہا کہ گریجویٹس کے لیے روزگار کے مواقع پیدا کرنے کے لیے صنعتی شعبے کے فروغ پر بھرپور کام ہو رہا ہے۔ ا سکے علاوہ آئندہ سال بجٹ میں ڈاکٹرز، انجنیئرز کےلئے بھی لون اسکیم شروع کی جائے گی تاکہ گریجویٹس خود نوکریاں ڈھونڈنے کی بجائے اپنے سٹاٹ اپس اور کمپنیاں قائم کرکے لوگوں کےلئے نوکریاں پیدا کر سکیں۔ وزیر اعلیٰ نے اپنی تقریر میں کہا کہ صوبائی حکومت نے طلبہ کےلئے سکالرشپس فنڈ بڑھا دیا ہے اور طلبہ کو سکالرشپس پر بیرون ممالک تعلیم حاصل کرنے کے مواقع بھی فراہم کیے جا رہے ہیں۔ اس کے علاوہ صوبے میں طالبات کی تعلیم بالکل مفت کرنے جا رہے ہیں کیونکہ ایک پڑھی لکھی ماں ہی پڑھے لکھے معاشرے کی تشکیل کرتی ہے۔ اسی طرح صوبے کے یتیم بچوں کی تعلیم بھی بالکل مفت کرنے پر کام ہو رہا ہے۔ ہمیں ہر شعبے میں وراثت میں خسارے ملے تاہم ہم اداروں کو اپنے پاوں پر کھڑا کرنے پر کام کر رہے ہیں۔ جب ہم نے حکومت سنبھالی تو یونیورسٹیوں کے72 ارب روپے بقایاجات تھے ہم کم کر کے 24 ارب روپے پر لے آئے۔
انہوں نے مزید کہا کہ ایک ایسا نظام بنا رہے ہیں جس میں یونیورسٹیوں کو تنخواہ و پینشن کی ادائیگی کا مسئلہ ختم ہو جائے گا اور بہت جلد یونیورسٹیاں بحران سے نکل کر خود کفالت کی طرف جائیں گی۔ علی امین گنڈاپور نے اپنی تقریر میں کہا کہ ” مجھے اس بات پر فخر ہے کہ یو ای ٹی پشاور صرف صوبے کا نہیں بلکہ پورے ملک کا ایک قابل فخر ادارہ ہے، اس ادارے نے انجینئرنگ و ٹیکنالوجی کے شعبوں میں بڑے بڑے نام پیدا کیے ہیں اور مجھے اس بات پر بھی خوشی ہے کہ یو ای ٹی وقت کی ضروریات کے مطابق چل رہی ہے اور نئے پروگرامز متعارف کرا رہی ہے”۔ وزیر اعلیٰ نے گریجویٹس کو مخاطب کرتے ہوئے کہا کہ وہ اپنی تمام تر صلاحیتوں اور علم کو ملک و صوبے کی ترقی کےلئے بروئے کار لائیں اور قومی و بین الاقوامی سطح پر نام روشن کریں۔ وزیر اعلیٰ نے گریجویٹس پر زور دیا کہ وہ اپنی زندگی میں اسلامی تعلیمات اور اقدار کے اصولوں پر عمل پیرا ہوں کیونکہ ایک عظیم قوم بننے کےلئے پہلے خود کو عظیم بنانا ہوگا۔ اسلامی تعلیمات پر عمل کیے بغیر عظمت و ترقی ممکن نہیں۔
