کل محترم جاوید حیات کاکا خیل صاحب نے اپنی تصنیف ’’گرزین‘‘ کی اعزازی کاپی عنایت کرکے مجھے حیرت میں ڈال دیا۔ ’’گرزین‘‘ جاوید حیات صاحب کی کہوار شاعری کا مجموعہ ہے۔ کتاب کی خوبصورتی اور سرزمین چترال و گلگت کے ادیبوں کے خوبصورت تبصرے اور خود جاوید حیات صاحب کی خوبصورت شاعری پڑھ کر دلی مسرت ہوئی۔ یہ کتاب مسودے کی صورت میں کئی سال پہلے میری بینائیوں کی نذر ہوچکی تھی جس پر میں نے کہوار میں تبصرہ بھی لکھا تھا۔ جو کتاب میں شامل ہے۔ میں جاوید حیات صاحب کو اس علمی کامیابی پر مبارک باد دیتے ہوئے وہ کہوار تبصرہ قند مکرر کے طور پر آپ کی بینائیوں کی نذر کر رہا ہوں۔ پڑھئے اور مسرور ہوجائیں۔
ہیہ غالباً جولائی ۲۰۰۹ء عیسویو لو شیر۔ اطرب آفس گلاغمولیا جاوید حیات کاکا خیل صاحبو سوم مہ اولانو ملاقات اوشوئے۔ ہے اولانو ملاقاتہ تن متے اندازہ بِرو اوشوئے کہ جاوید حیات صاحبو ہردی تن جغہ نیکی۔ ہے کیفیت آر اندازہ کوری اَستام کہ صاحبو شاعریو سوم شغف بوئے رے۔
کما بس پروشٹی اَوا تن پیشہ وارانہ مصروفیاتن سلسلہ دوبارہ گلاغمولیوتے بی آستام۔ مہ کارا ہیہ لُو توری متے بو زیات خوشانی ہوئے کہ جاوید حیات صاحب تن کالومن کتابی شکل دِتی منظرِ عامہ اَنگیک ماشکیران۔
جاوید حیات کاکاخیل صاحب کہوار ادب غذرو اِی نویوکُو نام۔ سرزمینِ چھترار وا غذرو کہوار خوش داراکن بَچین جاوید حیات صاحبو نام کیا تعریفو محتاج نو۔ ریڈیو پاکستان گلگت وا چھترار آر موصوفو کہوار کلام نشر باؤ شینی۔ ہیہ لُو کیا چانگیک نو کہ جاوید حیات صاحب تان طالب علمیو زمانار کہوار شاعری کوراؤ گیتی آسور۔ وا کہوار ادبو سوم بو زیات دلچسپی لاکھویان۔ ہے بَچین جاوید حیات صاحبو شخصیتہ نرمی اوچے حلیمی وا مہمان نوازی نویوکُو شیر۔
کو نو بوئے۔ جاوید حیات صاحبو تعلق سرزمینِ غذرو اِی شہیلی دیہہ گلاغمولیار شیر۔ گلاغمولیو سرزمین کہوار خوش دارکن بچین بو زیات اہمیتو حامل۔ کھیوتے کہ کہوار ادب اوچے شاعریو خونزا خوش بیگیمو آخری آرام گاہ دی ہیہ شہیلی دیہا شیر۔
جاوید حیات صاحب تن کالومن کتابی شکل دِتی ’’گُرزین‘‘ نام لاکھی اَسور۔
بو شہیلی نام۔ گُرزینو بارا کہوار ادب چھترارو آسمانو کہکشاں پروفیسر ڈاکٹر عنایت اللہ فیضیؔ ، کہوار شاعریو اِی نویوکُو نام گل نواز خاکیؔ وا پریس انفارمشن ڈپارٹمنٹ چھترارو ڈائریکٹر قدرو لائق محمد یوسف شہزاد صاحب تن تأثراتن نویشی جاوید حیات کاکاخیل صاحبوتے تن ہردِیو کلومی یَن مبارکباد دِتی گُرزینو کہوار ادب و شاعریو اندرینی اِی شہیلی اِضافہ قرار دِتی اَسونی۔
اَوا دی جاوید حیات صاحبو دولت خانہ آ گُرزینو اِی سرسری نگاہین لولی بو زیات خوشان ہوتام۔ ہیہ گلدستو اندرینی حمد، نعت، صوفیانہ کلام وا وطنو صفتن سار علاوہ زندگی، حُسنو گلاہی، تو ہوسیکو، مہ زندگی، شرین نان وا اے مسلمانو عنوانا نظم مہ بو متاثر آرینی۔ یقین بویان کہ جاوید حیات صاحب محبتو قلمو سورا تن شاعریو پروشٹی کاسے اَسور۔ وا آئندہ دی ہیہ سلسلہ لو جاری ساتیر۔
کہ لوڑین بویان محبت ہاسے وریو نام کہ وا لوسپی نسارو نو گوئے۔ محبت ہاسے ضمیر کہ ہیس خودراریو مکتبہ وفاؤ سبقو دویان۔ محبت ہاتے خلوص کہ ہیس پرجغارو شِکلا گمبوریان موخان نگیران۔ محبت ہاتے حکمران کہ ہورو سلطنتہ یور چھاغو نو دوئے۔ محبت ہاتے نانو مثال کہ ہیس تان تھمامی اَژیلان رحم اوچے عزتو نگاہین لاڑیر۔ وا جاوید حیات صاحب ہاسے خوش قسمت اِنسان کہ ہاسے رویان سوم محبت کوریک عبادت جاشوران۔
اَوا جاوید حیات صاحبوتے گزارش کوری اَستام کہ اوا تن تأثراتن اُردُو زبانہ نویشیم رے۔ مگم جاوید صاحب نو مانی یقیناًمہ امتحانا پیسی اَسور۔ کو ریکو کہوار زبانو سورا متے ہانی عبور حاصل نیکی۔ مہ آباؤ اجدادو زبان فارسی اوشوئے۔ اسپہ شیخ سعدیؒ او اولاد۔ ہیہ سلسلہ اُردُو زبانہ مہ ای تحقیقی کتاب ’’سعدیؒ سے کریمی تک‘‘ آخری مراحلہ شیر۔ انشاء اللہ بو شاؤ شائع بوئے۔ گُورا پت اسپہ خاندانَ فارسی زبانہ لو دیاو اوشونی۔ مگم معاشرو خور رویان زبان وخک وار بیکو وجہین دِتی اِسپہ دی ہاتان سوم وخک وار زبانو کوریکا پھریتام۔ مہ لوٹ بابا فارسی زبان ہمونیا پت کویان۔ کہوار زبانو ہے بچین اوا خوش داریمن کھیوتے کہ مہ زیذی کہو سیدانن جور۔ دورا اکثر و بیشتر اسپہ زیذی او سوم کہوارا لو دوسیان۔
مگم کہوار زبانو سورا مکمل عبور حاصل نیکی۔ ہے بچین کیا کمی بیشی کہ بِتی شیر تھے متے اُمید شیر کہ جاوید حیات صاحب وا چھترارو احباب متے معاف کوری اعلیٰ ظرفیو ثبوت دونی۔
اَوا قلم اُسنے اَستام کتابو دیباچہ نویشیم رے۔ مگم نویشک نو ہوتام۔ تھے دونی تام کہ دیباچہ کہ نو تعارف نویشیم۔ مگم تعارف دی نویشک نو ہوتام۔ کھیوتے کہ جَم اِجناری تعریفر بے نیاز بونیان۔ آوا صرف تن خوشیو اِظہارو کوری اَسوم۔ ہاسے دی ہانی نو، کندوری کہ اَوا تن ہردیا محسوس کومان۔
جاوید حیات کاکاخیل صاحب کی محبتو سورا کتاب کی نویشی اَسور، اَوا ہے محبتو سلامتی او بچین دُعا کومان۔

یہ خبر شیئر کریں: