گزشتہ ۱۵ برسوں سے زیر تعمیربونی بوزند تورکہو روڈ پر کام کی سست روی اور تاخیر کے عوام خلاف سراپا احتجاج ،بھرپوراحتجاج کا فیصلہ
اپر چترال ( نمائندہ چترال ٹائمز ) تحصیل تورکھو کی وادی کھوت میں جمعہ کے روز بونی بوزند روڈ پر تعمیراتی کام میں سست روی اور تاخیر کے خلاف اور تورکھو تریچ روڈ فورم کے زیراہتمام احتجاجی جلسے کی تیاریوں سے سلسلے میں کارنر میٹنگ کا انعقاد کیا گیا۔
کارنر میٹنگ میں وی سی کھوت کے چئیرمینوں، وی سی ممبران، علاقے کے سیاسی رہنماؤں، عمائدین اور سوشل ورکرز نے بھرپور شرکت کی۔۔
اجلاس میں تورکہو روڈ پر کام میں تاخیر اور ضلعی انتظامیہ، محکمہ سی اینڈ ڈبلیو اور ٹھیکیدار کی جانب سے ورکوپ میں جامع مسجد کے اندر بیٹھ کر ٹی ٹی أر ایف سے کیے گئے تحریری معاہدے پر عملدرأمد میں تاخیر اور روڈ پر کام کی سست روی پر تشویش کا اظہار کیا گیا۔۔
مقررین نے کہا کہ 15 سال سے تورکھو روڈ پر کام جاری ہے لیکن ابتدائی لاگت سے چار گنا فنڈ خرچ کرنے کے باوجود اب تک 32 کلومیٹر سڑک کا 30 فیصد بھی مکمل نہیں ہو پایا ہے۔
عمائدین علاقہ اور منتخب نمائندگان نے اس حوالے سے محکمہ سی اینڈ ڈبلیو کی کارگردگی پر عدم اعتماد کا اظہار کرتے ہوئے کہا کہ یہ محکمہ کرپشن کا گڑھ بن چکا ہے اور اس کے افسران ٹھیکیدار سے تعمیراتی کام مقررہ وقت کے اندر معیار کو برقرار رکھتے ہوئے مکمل کرانے کے بجائے کمیشن اور کرپشن میں لگے ہوئے ہیں۔
عمائدین علاقہ نے اس عزم کا اظہار کیا۔کہ اس بار محکمہ سی اینڈ ڈبلیو اور ٹھیکیدار کو بونی بزند روڈ کے فنڈ کام مکمل کیے بغیر ہڑپ کرنے کی اجازت نہیں دی جائے گی اور معاہدے کے مطابق ریلیز کردہ منڈ کے مطابق روڈ پر کام ہرصورت میں مکمل کرنا ہوگا۔
اجلاس کے شرکا نے اس بات کا اعادہ کیا کہ تورکہو تیریچ روڈ کے حوالے سے ہمیں کشتیاں جلا کر نکلنا ہوگا اجلاس میں فیصلہ کیا گیا کہ ٹی ٹی أر ایف کے
زیر اہتمام جلسے کی تیاریوں کے سلسلے میں اجلاس میں موجود علاقہ عمائدین اور نمائندگان اپنے اپنے گاؤں کے مساجد اور جماعت خانوں میں حوالے سے لوگوں کو آگاہی دیں گے اور لوگوں کو جلسے کے لئے تیار کریں گے ۔