کھوار زبانا محرم مسو صفت – تحریر: اقبال حیات اف برغذی
محرم الحرام اسلامی سالو اویلو مس۔اگر کی انسانی تاریخو بو امبوخ اہم واقیہ ھیہ مسو اوانہ مڑاغ کوری شینی مگم ھیہ مسی سرکار دو عالم صلی اللہ علیہ وسلمو خوش نیویس حضرت امام حسین رضی اللہ تعالیٰ عنہو وچے ھتوغو ملگیریان تان لیئوسورا تان نوعیتو لحاظا دین اسلامو باغو گل گلزار کوریکو واقیہ تان لحاظا بوزیات نوئیکو واہم۔
ھیہ ای ہروش واقیہ کی ہے سورا ظلمو چے زیادتیو زریعہ باطلو غالب کوریکو کھوشش حقوبچے قربانی دیکو جذبو موڑتو غیری ہمیشو بچے لیچھین بویان۔ و دونیوتے ھیہ حقیقت واضح بویان کی دین اسلام ہروش چراغ نو کی ھتو غو پھوف کوریکو سورا بوغئین بوئی۔
ھے سوم جوستہ ھیہ واقیہ قیامتہ پت اسلامو ای حق دین حیثیتہ تسلیم کوراکان ہردیہ ھیہ عقیدو میخ دیروو غون مظبوط کورویان کی ھیہ دینو حفاظتو کوریکو ضرورت کی پوریتائی تھے ھے راہا غیچی گیاک باطلو ظاہری طاقتو ھیش کیہ حیثیت نوبوئی۔
و ھیہ دینو مناکان زمینہ چوٹک لییاری ھیہ دین اوچھار اوچ باو گوئی۔ باطل کندوری دیکی طاقتور ہوئی حق پرستان ایمانی جزبو ہزیز بیر ئیرو کھانجتو دیتی نس نس تان بوئی۔ باطلو تان یراغوچے بولو امبوخیو سورا یقین بوئی وحق ایمانی فخرو قوتوچے مقصدو حقانیتو سورا فخر کوری بازو کھیڑی ساوزئیی پروشٹہ دوئی۔
کربلو واقیہ حق پرستانتے ھیہ سبقو دویان کی مادی قوتو سورا غیچی گیاک غلابو ھیش کیہ حقیقت نکی۔ اصل کامیابی ھتے لییہ شیر کیاغکی اللہ رب العزتو دینو سر بلندیو بچے ھتوغو راھا زمینہ چٹوران۔ وھے لیئی دین حقو اوچ کوریکو بنیادی ذریعہ۔ کلہ پت کی ھے لیئی ھیہ باغوتے نصیب بہچیتائی تھے دونیو کھلی باطل طاقت دی کی ای ہونی ھیہ باغو ہمیشہ بوسونیہ کیہ وت دی شوروئی پیدا کوریکو نوبونی۔ کوریکو کی حق زندگیونام وباطل تو نجیو نام۔حق عزتو چے احترامو نام وباطل ذلتو چے نفرتو نام یزیدنام کارا توریکو وٹ زیر کوریک وحسین ناموسورا غیچ روشت بیک وہردی چھیر کوسیک ھیہ حقیقتو ثبوتو بچے کافی ۔