کرم میں متحارب فریقین کے درمیان 10 دنوں کے لئے سیز فائر ہوا ہے اور مسلئے کے پر امن حل کے لئے مذاکرات کا عمل جاری ہے۔ وزیراعلیٰ خیبر پختونخوا علی امین خان گنڈاپور
کرم میں متحارب فریقین کے درمیان 10 دنوں کے لئے سیز فائر ہوا ہے اور مسلئے کے پر امن حل کے لئے مذاکرات کا عمل جاری ہے۔ وزیراعلیٰ خیبر پختونخوا علی امین خان گنڈاپور
پشاور ( چترال ٹائمزرپورٹ ) وزیر اعلیٰ خیبر پختونخوا علی امین خان گنڈاپور نے کرم کی صورتحال پر ایک اجلاس منعقد کی جس میں کرم میں امن و امان کی تازہ صورتحال کا جائزہ لیا گیا۔ چیف سیکرٹری خیبرپختونخواندیم اسلم چوہدری، انسپکٹرجنرل پولیس اخترحیات خان، ایڈیشنل چیف سیکرٹری داخلہ محمد عابد مجید اور دیگر نے اجلاس میں شرکت کی۔ متعلقہ حکام نے وزیر اعلیٰ کو کرم کی تازہ صورتحال پر بریفنگ دیتے ہوئے بتایا کہ کرم میں متحارب فریقین کے درمیان 10 دنوں کے لئے سیز فائر ہوا ہے اور مسلئے کے پر امن حل کے لئے مذاکرات کا عمل جاری ہے۔ مزید بتایا گیا کہ امن برقرار رکھنے کے لئے تمام اہم مقامات پر قانون نافذ کرنے والے اداروں کے دستے تعیناتی پر پیشرفت جاری ہے جبکہ علاقے میں ہونے والے نقصانات کے ازالے کے لئے نقصانات کا تخمینہ لگایا جارہا ہے۔
اسی طرح علاقے میں لوگوں کے محفوظ نقل و حمل کے لئے سکیورٹی پلان اور ایس او پیز جاری کئے جارہے ہیں۔ اس موقع پر گفتگو کرتے ہوئے وزیر اعلی نے کہا کہ فریقین کے درمیان جنگ بندی خوش آئند اقدام ہے اور امید ہے ہے یہ جنگ بندی علاقے میں پائیدار امن کا پیش خیمہ ثابت ہوگا۔ انہوں نے کہا کہ علاقے میں پائیدار امن کے قیام اور تنازعات کے حل کے لئے پشتون روایات کے مطابق مذاکرات کا راستہ اختیار کیا جائے گا۔ وزیر اعلی نے متعلقہ حکام کو ہدایت کی کہ علاقے میں ہونے والے مالی نقصانات کی اسسمنٹ کا کام ترجیحی بنیادوں پر مکمل کی جائے تاکہ متاثرین کے نقصانات کا جلد ازالہ کیا جاسکے جبکہ جاں بحق افراد کے لواحقین کو مالی امداد کی ادائیگیاں جلد یقینی بنائی جائیں۔
وزیر اعلی کا کہنا تھا کہ علاقے میں پائیدار امن کا قیام صوبائی حکومت کی اولین ترجیح ہے اورصوبائی حکومت اس مقصد کے لئے تمام دستیاب وسائل بروئے کار لائے گی۔