چترال میں گرمی کی شدت میں اضافہ، دریائے چترال میں اونچے درجے کا سیلاب، نشیبی علاقے زیر آب اگئے، پی ڈی ایم اے کی طرف سے گلوف الرٹ جاری
چترال (نمائندہ چترال ٹائمز ) دریائے چترال میں اونچے درجے کا سیلاب، نشیبی علاقے زیر اب آگئے ، کھڑی فصلوں ، باغات اورمکانات کو نقصان، مکین محفوظ مقامات کی طرف منتقل ، پی ڈی ایم اے کی طرف سے گلوف الرٹ جاری ، تفصیلات کے مطابق چترال اپر اور لوئیر میں حالیہ گرمی میں اضافہ اور ندی نالوں میں طغیانی کے باعث دریائے چترال میں اونچے درجے کا سیلاب ہے جس کے باعث نشینی علاقے زیراب اگئے ہیں، باغات ، کھڑی فصلوں اور املاک کو نقصان پہنچا ہے، متعدد مقامات پر دریاکی کٹائی کے باعث مین سڑک کو بھی نقصان پہنچا ہے، چترال مستوج روڈ ریشن کے مقام پر دریا کی کٹائی کے سبب گزشتہ چاردنوں سے ہر قسم کی ٹریفک کے لئے بند ہے،
اسی طرح لوئیر چترال کے مختلف علاقوں میں بھی دریاکی کٹائی کا سلسلہ جاری ، آیون گاوں میں سینکڑوں ایکڑ پر محیط کھڑی فصلین اور باغات زیر آب اگئے ہیں، چترال شہر کے نواحی گاوں دنین میں ڈسٹرکٹ جیل کے سامنے بھی چترال مستوج روڈ کی کٹائی کا سلسلہ جاری ہے، جس سے مین سڑک دریا برد ہونے کے ساتھ پرائیویٹ اور سرکاری املاک کوبھی نقصان پہنچنے کا خدشہ ہے، علاقے کے عوام انتظامیہ سے فوری اقدامات کا مطالبہ ہے۔ دریں اثنا پی ڈی ایم اے کی طرف سے شدید گرمی کے باعث چترال میں گلوف الرٹ جاری کردیا گیا ہے اور ندی نالوں و دریا کے کنارے آباد مکینوں کو محفوظ مقامات کی طرف منتقل ہونے کی ہدایت جاری کی ہے، اعلامیہ کے مطابق چترال سمیت خیبرپختونخوامیں 3 سے 6 اگست تک بارش اور حرارت بڑھنے کے امکان ظاہر کیا گیا ہے۔اور برف کے پگھلنے کی شرح بڑھنے سے بالائی اضلاع میں گلاف ایونٹ /فلش فلڈ کا خدشہ ظاہر کیا گیا ہے۔۔اورتمام متعلقہ اداروں کو ہنگامی صورت حال سے نمٹنے کے لیے الرٹ رہنے کی ہدایت کی گئی ہے۔ ساتھ ڈپٹی کمشنر لوئیر چترال نے دریائے چترال سے کسی قسم کی سرگرمی اور لکڑ نکالنے پر دفعہ ۱۴۴کے تحت پابندی عائد کردی ہے۔
