چترال شہر سمیت اپر اور لوئیر چترال میں وقفے وقفے سے بارش اور برفباری کا سلسلہ تیسرے روز بھی جاری،سردی کی شدت میں اضافہ، لواری ٹنل سے ٹریفک رواں دواں،
چترال (نمائندہ چترال ٹائمز )چترال شہر سمیت اپر اورلوئیر چترال میں گزشتہ تین دنوں سے وقفے وقفے سے بارش اور برفباری کا سلسلہ جاری ہے، جس کے باعث سردی کی شدت میں اضافہ ہوگیا ہے، شدید سردی کے باعث لوگ گھروں میں محصور ہوکر رہ گئے ہیں، چترال شہر میں ہفتے کے روز اکثر کاروباری مراکز بھی بند رہے، تاہم ضلعی انتظامیہ کی طرف سے سڑکوں کی صفائی کا سلسلہ جاری ہے، لواری ٹنل اپروچ روڈ پر ڈیڈھ فٹ تک برف پڑنے کے باوجود صفائی کا کام جاری ہے۔اور ٹریفک رواں دواں ہے، ضلعی انتظامیہ کی طرف سے صرف سنو چین والی گاڑیوں کی ٹنل سے گزرنے کی اجازت د ی جارہی ہے،
دریں اثنا ڈپٹی کمشنر لوئر چترال محسن اقبال نے اسسٹنٹ کمشنر دروش ڈاکٹر محمد علی کے ہمراہ لواری ٹنل کا دورہ کیا۔ ڈپٹی کمشنر نے روڈ پہ جاری سنو کلئیرنس اپریشن کا جائزہ لیا۔ اور متعلقہ اداروں کے ذمہ داران کو مشینری دن رات فنکشنل رکھنے کی ہدایت کی۔
ڈپٹی کمشنر نے ڈیوٹی پہ موجود اہلکاروں سے ملاقات کی ۔سخت موسمی حالات میں ڈیوٹی سرانجام دینے اور عوام کی خدمت کرنے پر ان کی حوصلہ افزائی کی۔
ڈپٹی کمشنر نے ٹریفک اہلکاروں اور سی پی پہ موجود اہلکاروں کو ہدایات کی کہ سنو چین والی گاڑیوں کے علاوہ کسی بھی گاڑی کو سفر کرنے کی ہر گز اجازت نہیں دی جاۓ ۔ مسافروں اور سیاحوں کے ساتھ ہر ممکن تعاون اور احتیاطی تدابیر پہ عمل درامد یقینی بنایا جاۓ ۔ عوام الناس سے گزارش کی جاتی ہے کہ خراب موسم میں غیر ضروری سفر کرنے سے گریز کریں۔ موسم اور رسائی سڑکوں سے متعلق معلومات حاصل کرکے سفر کریں۔
اپر چترال اور لوئیر چترال کے بالائی علاقوں کالاش ویلی، شیشی کوہ، گرم چشمہ ، مستوج ، لاسپور ، یارخون ویلی اور کھوت ودیگر علاقوں میں ۸ انچ سے پندرہ انچ تک برف پڑنے کے اطلاعات ہیں۔ محکمہ موسمیات کے مطابق بارش اور برفباری کا یہ سلسلہ اتوار کے روز بھی جاری رہنے کی پیشنگوئی کی گئی ہے۔
