چترال بھر میں 77واں یوم آزادی انتہائی جوش وخروش منایا گیا

چترال بھر میں 77واں یوم آزادی انتہائی جوش وخروش اور اس عزم کے ساتھ منا یاگیا کہ وہ مملکت خداداد پاکستان کو عظیم سے عظیم تر بنانے میں کسی قربانی سے دریغ نہیں کریں گے

چترال (نمائندہ چترال ٹائمز ) چترال بھر میں 77واں یوم آزادی انتہائی جوش وخروش اور اس عزم کے ساتھ منا یاگیا کہ وہ مملکت خداداد پاکستان کو عظیم سے عظیم تر بنانے میں کسی قربانی سے دریغ نہیں کریں گے۔ لویر چترال اور اپر چترال کی ضلعی ہیڈ کوارٹرز کے علاوہ تمام چھوٹے بڑے قصبات میں واقع پرائیویٹ اور سرکاری سکولوں میں یوم آزادی کے سلسلے میں رنگا رنگ تقریبات منعقدہوئے جن میں بچے، جوان اور بزرگ کثیر تعداد میں شریک ہوئے جبکہ بچے اور بچیاں قومی پرچم کے رنگ میں ملبوس ہوکر سینوں پر ہاتھوں میں قومی پرچم لہراتے ہوئے ایک پرفریب منظر پیش کرتے رہے اور بازاروں اور دفاتر کو بھی بڑے بڑے سائز کے پرچموں سے سجائے گئے تھے جبکہ رات کو اکثر مقامات پر چراغان بھی کیا گیا تھا۔

چترال بھر کے مساجد میں یوم آزادی کی صبح کا آغاز مساجد میں نمازفجر کے بعد ملک کی بقا، سلامتی اور ترقی کے لئے دعاؤں سے ہوا جبکہ پرچم کشائی کی تقریبات چترال سکاوٹس ہیڈکوارٹرز، ڈی سی لویر چترال، ڈی سی آفس اپر چترال اور ڈسٹرکٹ پولیس لائنز لویر چترال کے علاوہ درجنوں مقامات پر منعقد ہوئے۔ کرنل بلال جاوید نے چترال سکاوٹس ہیڈ کوارٹرز،ڈی سی محسن اقبال نے لویر چترال، ڈی سی حسیب الرحمن خلیل نے اپر چترال میں اور ڈی پی او افتخار شاہ نے لویر چترال میں پرچم کشائی کے فرائض انجام دئیے۔ ڈسٹرکٹ سپورٹس آفس لویر چترال کے زیر اہتمام پریڈ گراونڈ میں مختلف سپورٹس ایونٹس منعقد ہوئے جس میں ڈی سی لویر چترال محسن اقبال اور ڈسٹرکٹ سپورٹس افیسر محمد خالد نے انعامات تقسیم کئے۔

یوم آزادی کی دوپہر کو کھلاڑیوں نے کھیل کے میدانوں کو سجالیا او ر پولو، فٹ بال، کرکٹ کے مقابلے ہوئے جن میں کھلاڑی قومی پرچم کے رنگ میں یونیفارم پہن کر ملک سے محبت کا اظہار کیا۔