پی آئی اے کی نجکاری حتمی مراحل میں داخل
اسلام آباد( چترال ٹائمزرپورٹ)پاکستان انٹرنیشنل ایئر لائن (پی آئی اے) کی نج کاری کا عمل حتمی مراحل میں داخل ہو گیا۔ذرائع کے مطابق نج کاری میں شامل کمپنیوں نے ایئر لائن سے متعلق اثاثہ جات، طیاروں اور ہیومن ریسورس کے ریکارڈ کی جانچ پڑتال مکمل کر لی ہے۔پی آئی اے کی نج کاری کے لیے بولی آئندہ ماہ اکتوبر میں طلب کی جائے گی۔کمپنیوں نے حکومت سے درخواست کی ہے کہ پی آئی اے ملازمین کو 3 سال تک نہ نکالیکی شرط پر نرمی کی جائے گی۔کمپنیوں نے درخواست میں مؤقف اختیار کیا ہے کہ پی آئی اے ملازمین کی قابلیت اور تجربہ دیکھ کر فیصلہ خود کریں گے، کمپنیوں نے حکومت سے برطانیہ اور یورپ کے بند روٹس کی بحالی کا بھی مطالبہ کیا ہے۔پروازوں کی بحالی کے لیے ڈی جی سی اے اے اور وزیرِ خارجہ نے برطانوی اور یورپی حکام سے بات کی ہے، امید ہے کہ جَلد پی آئی اے کی برطانیہ اور یورپی ملکوں کے لیے پروازیں بحال ہو جائیں گی۔
پارلیمنٹ سے گرفتاریاں؛ قومی اسمبلی کے سارجنٹ ایٹ آرمز سمیت 5 سکیورٹی اہلکار معطل
اسلام آباد(سی ایم لنکس) پارلیمنٹ سے ہونے والی گرفتاریوں پر قومی اسمبلی کے سارجنٹ ایٹ آرمز سمیت 5 سکیورٹی اہل کاروں کو معطل کردیا گیا۔ پارلیمنٹ کے اندر سے ہونے والے گرفتاریوں کے معاملے پر اسپیکر قومی اسمبلی ایاز صادق کی جانب سے ایکشن لیے جانے کے بعد اسمبلی کی سکیورٹی میں غیر ذمے داری برتنے پر سارجنٹ ایٹ آرمز اشفاق اشرف کو معطل کردیا گیا۔اسپیکر قومی اسمبلی ایاز صادق نے سارجنٹ ایٹ آرمز کو 4 ماہ کے لیے معطل کیا ہے۔ اس کے علاوہ پارلیمنٹ میں سکیورٹی میں ناکامی پر دیگر 4 سکیورٹی اہلکاروں کو بھی معطل کردیا گیا ہے۔معطل کیے گئے سکیورٹی اہل کاروں میں سکیورٹی اسسٹنٹ وقاص احمد اور 3 جونیئر سکیورٹی اسسٹنٹ عبیداللہ، وحید صفدر اور محمد ہارون شامل ہیں۔یاد رہے کہ گزشتہ روز قومی اسمبلی اجلاس میں ارکان نے پارلیمنٹ ہاؤس میں رات گئے پولیس داخل ہونے اور لائٹس بند کرکے ارکان کی گرفتاریوں کو پارلیمان پر حملہ قرار دیا تھا۔ اسپیکر ایاز صادق کی زیر صدارت اسمبلی اجلاس میں پی پی پی، جے یو آئی، پی ٹی آئی اور ایم کیو ایم سمیت دیگر حکومتی و اپوزیشن جماعتوں نے واقعے کی شدید مذمت کی تھی۔دریں اثنا آج اپنے بیان میں اپوزیشن لیڈر عمر ایوب نے کہا ہے کہ پارلیمنٹ سے لوگوں کو اٹھانے پر ایجنسیوں کے ڈی جیز کے خلاف کارروائی ہونی چاہیے۔انہوں نے کہا کہ پارلیمنٹ سے کس نے لوگوں کو اٹھایا، یہ کوئی خلائی مخلوق تھی، دلیرانہ انداز میں لوگوں کو جبری طور پر گمشدہ کیا۔ جمہوریت میں یہ چیز نہیں چل سکتی۔ بس ہوگئی ہے، اب ایجنسیز کے ڈی جیز کے خلاف کارروائی ہونی چاہیے۔