وفاقی حکومت کی طرف سے جرگے کے ٹی او آرز کی منظوری کا انتظار ہے اور جونہی ٹی او آرز طے پاتے ہیں، جرگہ افغانستان بھیجا جائے گا۔ وزیر اعلیٰ
وفاقی حکومت کی طرف سے جرگے کے ٹی او آرز کی منظوری کا انتظار ہے اور جونہی ٹی او آرز طے پاتے ہیں، جرگہ افغانستان بھیجا جائے گا۔ وزیر اعلیٰ
پشاور (نمائندہ چترال ٹائمز) وزیر اعلیٰ خیبر پختونخوا علی امین خان گنڈاپور سے پشاور میں تعینات افعان قونصل جنرل حافظ محب اللہ شاکر نے اتوار کے روز ان کے دفتر میں ملاقات کی۔ ملاقات میں باہمی دلچسپی کے امور بشمول باہمی تجارت کے فروغ، علاقائی امن و استحکام، صوبے میں مقیم افعان شہریوں کو درپیش مسائل کے حل سمیت دیگر معاملات پر تبادلہ خیال کیا گیا۔ ملاقات میں تورخم پر پاک افغان سرحد کی عارضی بندش سے دونوں اطراف کے تاجروں اور عام لوگوں کو درپیش مشکلات پر گفتگو ہوئی جبکہ ماہ رمضان اور انے والے عید الفطر کے پیش نظر سرحد کو جلد سے جلد کھولنے کے لئے کوششوں پر اتفاق کیا گیا۔
اس موقع پر گفتگو کرتے ہوئے وزیر اعلی نے کہا کہ سرحد کی بندش کی وجہ سے رمضان کے مہینے میں تاجروں اور ٹرانسپورٹرز کو تکالیف کا سامنا ہے، سرحد کا بند رہنا دونوں اطراف کے لوگوں کے مفاد میں نہیں، اسے کاروباری لوگوں کے ساتھ ساتھ عام لوگوں کو بھی مشکلات کا سامنا ہے جس کے پیش نظر جلد سے جلد بارڈر کو کھولنے کی ضرورت ہے۔ انہوں نے کہا ہم بارڈر کھولنے کے لئے اپنی طرف سے کوششیں کر رہے ہیں اور افعان قونصلیٹ جنرل بھی اس سلسلے میں اپنا کردار ادا کرے۔ علی امین گنڈاپور کا کہنا تھا کہ خطے میں جاری بد امنی کی وجہ سے دونوں اطراف کے لوگ مشکلات سے دوچار ہوئے ہیں، خطے میں پائیدار امن کے لئے مذاکرات اور بات چیت ایک موثر ذریعہ ہے۔
وزیر اعلی نے مزید کہا کہ صوبائی حکومت نے اپنی سطح پر افغان حکومت کے ساتھ مذاکرات کے لئے جرگہ تشکیل دیا ہے، وفاقی حکومت کی طرف سے جرگے کے ٹی او آرز کی منظوری کا انتظار ہے اور جونہی ٹی او آرز طے پاتے ہیں، جرگہ افغانستان بھیجا جائے گا۔ انہوں نے کہا کہ تجارت، تعلیم اور علاج کی غرض سے آنے جانے والوں کی سہولت کے لئے بارڈر پر خصوصی ڈیسک کے قیام کے لئے کوششیں جاری ہیں، قانونی سفری دستاویزات کے حامل افغان بہن بھائیوں کا خیر مقدم کیا جائے گا۔ علی امین گنڈاپور کا مزید کہنا تھا کہ خیبر پختونخوا میں علاج معالجے اور تعلیم کے لئے آنے والے افعان باشندوں کو صحت کارڈ اور تعلیم کارڈ کے اجراء کے لئے متعلقہ بین الاقوامی اداروں سے بات چیت جاری ہے۔