
وزیر اعلیٰ علی امین گنڈاپورکا ٹوارزم پولیس کے اہلکاروں کو مستقل کرنے اور تنخواہ بڑھانے کا اعلان
وزیر اعلیٰ علی امین گنڈاپورکا ٹوارزم پولیس کے اہلکاروں کو مستقل کرنے اور تنخواہ بڑھانے کا اعلان
پشاور (چترال ٹائمزرپورٹ ) وزیر اعلیٰ خیبر پختونخوا علی امین خان گنڈاپور کی زیر صدارت منگل کے روز خیبر پختونخوا کلچر اینڈ ٹوارزم اتھارٹی کے بورڈ آف ڈائریکٹرز کا چو تھا اجلاس وزیر اعلیٰ سیکرٹریٹ پشاور میں منعقد ہوا جس میں مختلف ایجنڈا آئٹمز پر غور و خوض کے بعد اہم فیصلے کیے گئے۔ صوبائی کابینہ اراکین زاہد چن زیب، بریگیڈیئر ریٹائرڈ مصدق عباسی ، ایڈیشنل چیف سیکریٹری پلاننگ و ڈویلپمنٹ اکرام اللہ خان اور بی بی فوزیہ کے علاوہ دیگر بورڈ ممبران بھی اجلاس میں شریک ہوئے۔ وزیر اعلیٰ علی امین گنڈاپور نے ٹوارزم پولیس کے اہلکاروں کو مستقل کرنے کا اعلان کیا ہے۔ بورڈ اجلاس میں ٹوارزم پولیس کے اہلکاروں کی ماہانہ تنخواہ 36 ہزار روپے سے بڑھا کر 45 ہزار روپے کرنے کی منظوری دی گئی ہے۔
اس کے علاوہ ٹوارزم پولیس کو مزید مستحکم کرنے کے لیے مزید ہیوی بائیکس اور کمیونیکیشن گیجٹس بھی فراہم کرنے کا فیصلہ کیا گیا ہے۔ وزیر اعلیٰ نے محکمہ سیاحت کے حکام کو مزید سیاحتی مقامات دریافت کرنے کے لیے بھی اقدامات کی ہدایت کی ہے اور کہا ہے کہ اگلے مالی سال کے بجٹ میں کم از کم چار نئے سیاحتی مقامات کو ڈیویلپ کرنے کے منصوبے شامل کئے جائیں۔گزشتہ سیزن میں ڈیڑھ کروڑ ملکی اور غیر ملکی سیاحوں نے خیبر پختونخوا کا رخ کیا، سیاحوں کی بڑھتی ہوئی تعداد کے پیش نظر صوبے میں نئے سیاحتی مقامات کو ایکسپلور کرنے کی ضرورت ہے۔
وزیر اعلیٰ نے ٹھنڈیانی انٹیگریٹڈ ٹوارزم زون کے ماسٹر پلان میں ضروری ترامیم کر کے مشتہر کرنے کی بھی ہدایت کی ہے اور کہا ہے کہ انٹیگریٹڈ ٹوارزم زونز کے لیے رابطہ سڑکوں کی بیک وقت تعمیر کے لیے بھی اقدامات کیے جائیں۔ سیاحت کا شعبہ ترجیحی شعبوں میں شامل ہے، اس شعبے میں روزگار اور سرمایہ کاری کی وسیع استعداد موجود ہے۔ اجلاس میں بورڈ آف ڈائریکٹرز کے تحت فنانس اور ایچ آر کمیٹیوں کی بھی منظوری دی گئی جبکہ فورم کی جانب سے آوٹ سورسنگ و انویسٹمنٹ اور کلچر کمیٹیوں کے قیام کی بھی ہدایت کی گئی ہے۔