وزیر اعلیٰ خیبر پختونخوا کا تعلیمی ایمرجنسی کے تحت تمام سرکاری سکولوں میں زیر تعلیم سو فیصد بچوں کو فرنیچر فراہم کرنے کا فیصلہ، سرکاری سکولوں میں کوئی بھی بچہ فرش پر نہ بیٹھے۔علی آمین گنڈاپور
پشاور ( نمائندہ چترال ٹائمز) وزیر اعلیٰ خیبر پختونخوا علی امین خان گنڈاپور نےصوبے میں تعلیم کے فروغ کے لئے ایک اہم اقدام کے طور پر تعلیمی ایمرجنسی کے تحت تمام سرکاری سکولوں میں زیر تعلیم سو فیصد بچوں کو فرنیچر فراہم کرنے کا فیصلہ کیا ہے اور متعلقہ حکام کو ہدایت کی ہے کہ اگلے مالی سال کے دوران تمام سرکاری سکولوں کو فرنیچرز کی فراہمی کا عمل مکمل کیا جائے اور اس بات کو ہر صورت یقینی بنایا جائے کہ سرکاری سکولوں میں کوئی بھی بچہ فرش پر نہ بیٹھے۔ وزیر اعلیٰ نے کہا کہ سکولوں میں فرنیچرز کی فراہمی کے لئے جتنے بھی فنڈز درکار ہونگے وہ ترجیحی بنیادوں پر فراہم کئے جائیں گے۔
انہوں نے مزید کہا کہ سرکاری سکولوں میں بچوں کو فرنیچر، واشرومز اور پینے کے صاف پانی کی فراہمی ہماری اولین ترجیح ہے اور سکولوں میں ان بنیادی سہولیات کی فراہمی پر کوئی سمجھوتہ نہیں ہوگا۔ وزیر اعلیٰ نے یہ بھی ہدایت کی ہے کہ سرکاری سکولوں میں تدریس کے معیار کو بھی بہتر بنانے کے لئے خصوصی پروگرام شروع کیا جائے اور اس مقصد کے لئے اساتذہ کی جدید ٹریننگ کا انتظام کیا جائے جبکہ نئے بھرتی ہونے والے اساتذہ کے لئے جدید ٹریننگ لازمی قرار دی جائے۔ یہ ہدایات انہوں نے اتوار کے روز اگلے سالانہ ترقیاتی پروگرام کی تیاری سے متعلق گھنٹوں طویل اجلاس کی صدارت کرتے ہوئے جاری کیں ۔ وزیر اعلیٰ کے مشیر برائے خزانہ مزمل اسلم کے علاؤہ چیف سیکرٹری شہاب علی شاہ، ایڈیشنل چیف سیکرٹری پلاننگ و ڈویلپمنٹ اکرام اللہ خان اور متعلقہ انتظامی سیکرٹریز بھی اجلاس میں شریک ہوئے ۔
اجلاس میں نئے ترقیاتی پروگرام میں شامل کرنے کے لئے مخلتف محکموں بشمول منصوبہ بندی، مواصلات، بلدیات، تعلیم، صحت، آبپاشی، آبنوشی، کے مجوزہ منصوبوں پر تفصیلی غوروخوص کیا گیا۔ اور مذکورہ بالا محکموں کے تمام مجوزہ منصوبوں کا فرداً فرداً جائزہ لینے کے بعد انہیں حتمی شکل دی گئی۔ اجلاس کے شراکاء سے گفتگو کرتے ہوئے وزیر اعلی نے کہا کہ صوبائی حکومت کا نیا سالانہ ترقیاتی پروگرام ایک وژنری پروگرام ہوگا کیونکہ یہ اگلے چار سالوں کے سالانہ ترقیاتی پروگراموں کے لئے بنیاد فراہم کرے گا۔ اگلے سالانہ ترقیاتی پروگرام کو منتخب عوامی نمائندوں کی تجاویز کی روشنی میں حتمی شکل دی جائے گی اور علاقوں کی عوامی ضروریات کو سامنے رکھتے ہوئے سالانہ ترقیاتی پروگرام میں نئے منصوبے شامل کئے جائیں گے۔
سالانہ ترقیاتی پروگرام میں وسیع عوامی مفاد کے ٹھوس اور قابل عمل منصوبے شامل کئے جائیں گے جبکہ اگلے مالی سال کے ترقیاتی فنڈز کا بیشتر حصہ جاری ترقیاتی منصوبوں کی تکمیل کے لئے مختص کیا جائے گا۔ انہوں نے مزید کہا کہ 80 فیصد یا اس سے زیادہ پراگرس والے جاری منصوبوں کو اگلے سال مکمل کیا جائے گا جبکہ اس سے کم و بیش 50 فیصد جاری ترقیاتی منصوبے اگلے سال مکمل ہوجائیں گے۔ نیا سالانہ ترقیاتی پروگرام حقیقت پسندانہ اور وسیع عوامی ضروریات سے ہم آہنگ ہوگا، ہم آگے دوڑ پیچھے چھوڑ والا کام نہیں کریں گے۔ عوام کے ٹیکس کے پیسوں کا دانشمندانہ اور موثر استعمال یقینی بنایا جائے گا۔ بحیثیت وزیر اعلیٰ صوبے کا ہر حلقہ میرا حلقہ ہے، ترقیاتی منصوبوں میں بھی علاقے کے ساتھ کوئی امتیازی سلوک نہیں ہوگا، پسماندہ علاقوں کو ترقی کے میدان میں آگے لانے پر خصوصی توجہ دی جائے گی۔
