وزیراعلی کا سڑکوں، سرکاری عمارتوں، نہروں، آبنوشی اسکیموں کی مرمت کے لئے مختص فنڈز ’ایم اینڈ آر‘ کے کاموں کی موثر نگرانی اور فنڈز کے دانشمندانہ استعمال کے لئے ریگولیٹری فریم ورک بنانے کا فیصلہ
پشاور(نمائندہ چترال ٹائمز ) وزیر اعلی خیبر پختونخوا علی امین گنڈاپور نے ترقیاتی فنڈز کے استعمال میں شفافیت، احتساب اور کام کے معیار کو یقینی بنانے کے لئے ایک اہم اقدام کے طور پر ترقیاتی منصوبوں کی دیکھ بھال اور مرمت (ایم اینڈ آر) کے کاموں کی موثر نگرانی اور فنڈز کے دانشمندانہ استعمال کے لئے ریگولیٹری فریم ورک بنانے کا فیصلہ کرتے ہوئے متعلقہ حکام کو اس سلسلے میں ضروری کاروائی عمل میں لانے کی ہدایت کی ہے۔ وزیر اعلی سیکرٹریٹ نے اس سلسلے میں چیف سیکرٹری خیبر پختونخوا کو مراسلہ ارسال کردیا ہے جس میں سڑکوں، سرکاری عمارتوں، نہروں، آبنوشی اسکیموں اور بجلی کے ٹرانسفارمرز کی مرمت اور دیکھ بھال کے لئے مختص فنڈز کے استعمال کے لئے موثر ریگولیٹری فریم ترتیب دینے کی ہدایت کی گئی ہے۔
مراسلے میں اس بات کی نشاندہی کی گئی ہے کہ ریگولیٹری فریم ورک کے بغیر ایم اینڈ آر فنڈز کا استعمال سرکاری وسائل کے غیر ضروری استعمال، کام میں تاخیر اور غیر معیاری کام کا سبب بن رہا ہے جسے نمٹنے کے لئے ایک جامع اور ہمہ جہت ریگولیٹری فریم تیار کرنے کی ضرورت ہے۔ مراسلے میں کہا گیا ہے کہ مجوزہ ریگولیٹری فریم ورک کے تحت تمام اضلاع کی سطح پر ڈپٹی کمشنرز کی سربراہی میں ڈسٹرکٹ سپروائزری کمیٹیاں تشکیل دی جائیں جن میں متعلقہ محکموں کے ضلعی سربراہان، سول سوسائٹی کے نمائندوں اور محکمہ منصوبہ بندی کے متعلقہ حکام کو بطور ممبر شامل کیا جائے۔
ان مجوزہ کمیٹیوں کی ذمہ داریوں کے حوالے سے کہا گیا ہے کہ یہ کمیٹیاں اپنے اپنے اضلاع میں ایم اینڈ آر کے کاموں پر عملدرآمد کے سلسلے میں موثر انتظام و انصرام کے ذمہ دار ہونگے جو اپنے متعلقہ اضلاع میں ہر محکمے کے لئے ایم اینڈ آر کے کاموں کی نشاندہی اور ترجیحات کا تعین کریں گے اور ایم اینڈ آر کے کاموں کی نشاندہی کرتے وقت علاقائی ضرورت، وسیع تر عوامی مفاد اور کم سے کم اخراجات جیسے عوامل کو مدنظر رکھیں گے۔ مزید برآں یہ کمیٹیاں ایم اینڈ آر کے کاموں کی نشاندہی کے بعد مجوزہ منصوبے حتمی منظوری کے لئے متعلقہ محکمے کو ارسال کریں گے اور متعلقہ محکمے میں قائم ڈیپارٹمنٹل سکروٹنی کمیٹیاں منصوبے کی منظوری دے کر ڈسٹرکٹ سپروائزری کمیٹیوں کو باضابطہ طور پر آگاہ کریں گی۔
مراسلے میں کہا گیا ہے کہ ڈسٹرکٹ سپروائزری کمیٹیاں ایم اینڈ آر کے کاموں کی موثر نگرانی اور کام کے مطلوبہ معیار کو یقینی بنانے کے ذمہ دار ہونگے اور اس سلسلے میں ایم اینڈ آر کے کاموں کی سالانہ رپورٹ شائع کریں گے جو ایم اینڈ آر کے کاموں کی جزئیات، اخراجات، تصویری دستاویزات، جی پی ایس کوارڈینیٹس اور دیگر تفاصیل پر مشتمل ہونگی، یہ کمیٹیاں ہنگامی صورتحال میں فوری فیصلہ سازی اور رسپانس کے لئے متعلقہ حکام کو خصوصی رپورٹ پیش کریں گے۔ اضلاع کی سطح پر ہنگامی مرمت کے کام اور رابطہ سڑکوں سے برف ہٹانے کے کام سمیت ایم اینڈ آر کے دیگر تمام کام ڈسٹرکٹ سپروائزری کمیٹی کی سفارشات پر عمل میں لائے جائیں گے، یہ کمیٹیاں ایم اینڈ آر کے جاری اسکیموں پر کام کا جائزہ لینے کے لئے باقاعدگی سے اجلاس منعقد کریں گے اور ضرورت پڑنے پر جاری منصوبوں پر کام بہتری کے لئے سفارشات بھی دیں گے۔ مراسلے میں ہر سطح پر وزیر اعلی کے ان ہدایات پر فوری اور من و عن عملدرآمد یقینی بنانے کی تاکید کی گئی ہے۔