وزیراعظم شہباز شریف کا دورہ پشاور، بارش اور برفباری کے متاثرین میں امدادی چیک تقسیم ، جان بحق افراد کے ورثاء میں 20 لاکھ، زخمیوں کیلئے 5 لاکھ اور تباہ شدہ مکانات کی تعمیرکیلئے 7 لاکھ روپے کے چیک تقسیم کئے گئے
عہدہ سنھبالنے کے فوراً بعد پشاورکادورہ کرنے اور طوفانی بارشوں کے متاثرین کی بروقت مالی امداد پر وزیراعظم کے مشکورہیں، گورنرحاجی غلام علی
فراہم کی جانیوالی مالی امداد سے متاثرہ خاندانوں کی حوصلہ افزائی ہوئی ہے،وزیراعظم محمد شہبازشریف نے اپنی شفقت اور پیار سے متاثرین بلکہ پوری عوام کے دل جیت لیے ہیں،گورنر
پشاور ( چترال ٹائمزرپورٹ ) گورنرخیبرپختونخواحاجی غلام علی نے عہدہ سنبھالنے کے دودن بعدفوری طورپر پشاور کار دورہ کرنے اور خیبرپختونخوا کے بعض اضلاع میں حالیہ طوفانی بارشوں، برفباری، لینڈ سلائیڈنگ کے باعث ہونیوالی اموات پر لواحقین اورمتاثرین کی بروقت مالی امداد پروزیراعظم محمدشہبازشریف کا شکریہ ادا کیا ہے اور انہیں بحیثیت گورنر اور صوبہ کے عوام جانب سے خراج تحسین پیش کیاہے۔ وزیرعظم نے ایسے افراد جن کے لخت جگر اور خاندانوں کے سربراہان حالیہ بارشوں کی وجہ سے اس دنیا سے چلے گئے، ان کا درد اور دکھ بانٹنے کیلئے ذمہ داریاں سنبھالنے کے دوسرے ہی دن متاثرین سے ملنے اوران کے غم میں شریک ہونے کی ایک قابل تقلیدمثال قائم کی ہے۔ ان خیالات کا اظہارانہوں نے بدھ کے روز گورنرہاوس پشاورمیں منعقدہ تقریب سے خطاب کرتے ہوئے کیا۔ انہوں نے وزیراعظم اوردیگرمہانوں کاخیرمقدم کیا۔ تقریب میں اراکین پارلیمنٹ اسحاق ڈار،خواجہ آصف، عطاء اللہ تارڑ، انجینئر امیر مقام،مرتضی جاویدعباسی سمیت دیگر قومی وصوبائی اسمبلی کے اراکین،میئرپشاور حاجی زبیرعلی،چیئرمین این ڈی ایم اے لیفیٹننٹ جنرل انعام حیدر ملک، چیف سیکرٹری خیبرپختونخوا اوردیگرمتعلقہ صوبائی حکام نے بھی شرکت کی۔
گورنرنے کہاکہ خیبر پختونخوا صوبہ کئی عشروں سے دہشتگردی اور قدرتی آفات کے باعث بھاری جانی و مالی نقصان سے گزر رہا ہے لیکن یہاں کے عوام نے ہر قسم کی آزمائش کا ڈٹ کر مقابلہ کیا ہے۔دہشتگردی اور قدرتی آفات کے باعث یہ وہ گہرے زخم ہیں جن پروزیراعظم محمد شہبازشریف نے اپنی شفقت اور پیار سے مرہم لگا کر نہ صرف خیبرپختونخوا کے حالیہ طوفانی بارشوں سے متاثرین بلکہ پوری عوام کے دل جیت لیے ہیں۔ انہو ں نے کہاکہ پہلا موقع ہے کہ ایک حکومت نے بنتے ہی متاثرین کے ورثاء میں 20 لاکھ، زخمیوں کیلئے 5 لاکھ اور تباہ شدہ مکانات کی تعمیرکیلئے 7 لاکھ روپے کے چیک تقسیم کئے ہیں جس پربلاشبہ پوری عوام فخرہے۔انہوں نے کہاکہ فراہم کی جانیوالی مالی امداد سے متاثرہ خاندانوں کی نہ صرف حوصلہ افزائی ہوئی ہے بلکہ انہیں یقین ہوا ہے کہ وزیراعظم پاکستان سمیت حکومت اورریاست اُن کے دکھ میں برابرکی شریک ہیں۔ گورنرنے آئندہ 5 روز میں تمام اضلاع میں متاثرہ مکانات کی سروے مکمل کرنے اور ان متاثرین کو اُن کی دہلیز پرامدادی رقم پہنچانے کی ہدایات پر بھی وزیراعظم کاشکریہ ادا کیا۔ وزیراعظم نے متاثرین کی مدد کرنے اورسہولیات دینے پر گورنر، پی ڈی ایم اے، این ڈی ایم اے سمیت ریسکیو اوراین ایچ اے حکام کا شکریہ ادا کیا۔ قبل ازیں گورنر حاجی غلام علی نے دورہ پشاور کے موقع پر گورنرہاوس پہنچنے پر وزیرِ اعظم محمد شہباز شریف کااستقبال کیا اوروزیراعظم شہبازشریف سے ملاقات کی۔ ملاقات میں صوبے کی معاشی امور سمیت مجموعی صورتحال پرتبادلہ خیال کیاگیا۔ملاقات میں وزیرِ اعظم کو حالیہ طوفانی بارشوں و برفباری کے نتیجے میں نقصانات اور جاری امداد و بحالی کے اقدامات سے آگاہ کیا گیا۔ملاقات میں اراکین پارلیمنٹ سینیٹر اسحاق ڈار، خواجہ آصف، عطاء تارڑ، امیر مقام، مرتضی جاوید عباسی اور چیئرمین این ڈی ایم اے لیفٹیننٹ جنرل انعام حیدر ملک اور میئرپشاور حاجی زبیرعلی بھی شریک تھے۔
