Chitral Times

Feb 9, 2025

ﺗﻔﺼﻴﻼﺕ

وزیراعظم شہبازشریف کی یوتھ پروگرام کے تحت قرض کی رقم 5 لاکھ سے بڑھا کر 15 لاکھ روپے کرنے، کی ہدایت

Posted on
شیئر کریں:

وزیراعظم شہبازشریف کی یوتھ پروگرام کے تحت قرض کی رقم 5 لاکھ سے بڑھا کر 15 لاکھ روپے کرنے، ایس ایم ایز کی سہولیات کو بین الاقوامی تقاضوں سے ہم آہنگ کرنے کے لئے ترقی یافتہ ممالک کے ماڈلز کا اطلاق یقینی بنانے کی ہدایت

 

اسلام آباد(چترال ٹائمزرپورٹ)وزیراعظم محمد شہبازشریف نے یوتھ پروگرام کے تحت قرض کی رقم 5 لاکھ سے بڑھا کر 15 لاکھ روپے کرنے، چھوٹے اور درمیانے درجے کے کاروبار کو دی جانے والی سہولیات کو بین الاقوامی تقاضوں سے ہم آہنگ کرنے کے لئے ترقی یافتہ ممالک کے ماڈلز کا اطلاق یقینی بنانے کی ہدایت کرتیہوئے کہا ہے کہ ایس ایم ایز معیشت کی ترقی میں کلیدی اہمیت کی حامل ہیں، حکومت نوجوانوں کو کاروبار کی ترغیب دینے کے لئے سہولیات فراہم کرے گی۔ جمعرات کو وزیراعظم آفس کے میڈیا ونگ کی طرف سے جاری بیان کے مطابق وزیرِ اعظم محمد شہباز شریف کی زیر صدارت چھوٹے اور درمیانے درجے کے کاروبار (ایس ایم ایز) سے متعلق جائزہ اجلاس منعقد ہوا۔ وزیرِ اعظم نے چھوٹے پیمانے کے کاروبار کے لئے وزیرِ اعظم یوتھ پروگرام کے تحت قرض کی رقم کو 5 لاکھ سے بڑھا کر 15 لاکھ کرنے، ملک بھر میں چھوٹے اور درمیانے درجے کے کاروبار کو سہولیات کی فراہمی کے لئے ان کا تفصیلی سروے جلد مکمل کرنے اور چھوٹے اور درمیانے درجے کے کاروبار کو دی جانے والی سہولیات کو بین الاقوامی تقاضوں سے ہم آہنگ کرنے کے لئے ترقی یافتہ ممالک کے ماڈلز کا اطلاق یقینی بنانے کی ہدایت کی۔

 

 

انہوں نے چھوٹے پیمانے کے کاروبار میں خواتین کیلئے خصوصی پیکیج تشکیل دے کر جلد پیش کرنے کی بھی ہدایت کی۔ وزیر اعظم نے کہا کہ حکومت شہریوں کو کاروبار کی ترغیب دینے کیلئے چھوٹے اور درمیانے درجے کے کاروبار کو سہولت دینے کیلئے پر عزم ہے۔ دنیا بھر میں ایس ایم ایز معیشت کی ترقی میں کلیدی اہمیت کی حامل ہیں۔ ایس ایم ایز کو فروغ دے کر ملکی برآمدات میں اضافہ حکومت کی اولین ترجیح ہے۔حکومت نوجوانوں اور خواتین انٹرپرینیورز کو اس قدر با اختیار بنانے کے لئے کوشاں ہے کہ وہ نہ صرف خود روزگار کمائیں بلکہ روزگار کے مزید مواقع پیدا کریں۔

 

 

اجلاس میں وزیرِ اعظم کی خصوصی ہدایات کی روشنی میں ایس ایم ایز کی ترقی و سہولت کے لئے حکومتی اقدامات پر پیش رفت سے آگاہ کیا گیا۔ اجلاس کو بتایا گیا کہ وزیرِ اعظم کی ہدایت پر عملدرآمد کرتے ہوئے تمام سٹیک ہولڈرز کو اعتماد میں لینے کے بعد ایس ایم ایز کے لئے قرض کے فارم کو مزید آسان اور سادہ بنادیا گیا ہے تاکہ زیادہ سیزیادہ ایس ایم ایز اپنے کاروبار کی بہتری کے لئے قرض کی سہولت سے مستفید ہو سکیں۔ اجلاس کو بتایا گیا کہ ایس ایم ایز کی درجہ بندی اس حوالے سے کی جارہی ہے کہ تمام چھوٹے اور متوسط پیمانے کے کاروبار حکومتی معاونت و سہولیات سے زیادہ سیزیادہ فائدہ اٹھا سکیں اور انہیں بروقت و آسان شرائط پر قرضوں کی فراہمی یقینی ہو۔ وزیرِاعظم کی ہدایت پر ایس ایم ایز میں بہت چھوٹے پیمانے اور گھریلو خواتین کے چھوٹے کاروبار کی سہولت کیلئے ایک نئی کیٹیگری متعارف کرائی جائے گی جس میں ان کو قرض کے حصول میں آسانی سے لے کر کاروبار کی بہتری کیلئے حکومتی معاونت حاصل کرنے میں آسانی ہوگی۔

 

 

اجلاس کو ادارہ برائے شماریات پاکستان کی جانب سے تین بڑے شہروں میں ایس ایم ایز کے اشاریوں سے آگاہ کیا گیا اور بتایا گیا کہ آئندہ چند ماہ میں پورے ملک میں موجود ایس ایم ایز کو بہتر سہولیات کی فراہمی کی منصوبہ بندی کیلئے سروے کیا جائیگا۔اجلاس میں وزیرِ اعظم کی ہدایت پر ایس ایم ایز کو معاونت کے حکومتی لائحہ عمل کے اہداف اور ان کی تکمیل کی مدت پر جامع بریفنگ بھی دی گئی۔ اجلاس کو بتایا گیا کہ سمیڈا رواں برس فروی تک ایس ایم ایز کیلئے فنانشل لٹریسی اور تربیتی پروگرام کا اجرا کرے گا۔ اس کے علاوہ جدید ٹیکنالوجی سے متعارف کرانے کے لئے پروگرام کو رواں برس کے وسط تک حتمی شکل دے دی جائے گی۔اجلاس کو ایس ایم ایز کے حوالے سے ملکی برآمدات میں اضافے کے لئے جامع لائحہ عمل کے اہداف اور ان کی معینہ مدت کے حوالے سے بھی آگاہ کیا گیا۔ اجلاس کو خواتین انٹرپرینیورز کی ترقی کے لئے مرتب کی جانے والی پالیسی پر پیش رفت سے بھی آگاہ کیا گیا۔ اجلاس میں وفاقی وزرا رانا تنویر حسین، احد خان چیمہ، وزیرِ مملکت شزا فاطمہ خواجہ، گورنر سٹیٹ بنک جمیل احمد، چاروں صوبائی چیف سیکریٹریز، ایس ایم ایز شعبے کے نمائندے اور متعلقہ اعلیٰ حکام نے شرکت کی۔

 

 

 


شیئر کریں:
Posted in تازہ ترین, جنرل خبریںTagged
98142